រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ជនសង្ស័យម្នាក់ក្នុងចំណោម២នាក់ ត្រូវសន្តិសុខឯងជនប្រគល់ឲ្យសមត្ថកិច្ចឃាត់ខ្លួនយកទៅសួរនាំ បន្ទាប់ពីធ្វើសកម្មភាពលួចមួកសុវត្ថិភាពនៅលើម៉ូតូរបស់បុគ្គលិកបម្រើការនៅក្នុងហាងកាហ្វេប្រ៊ោនកាលពីវេលាម៉ោង៩និង១០នាទីយប់ ថ្ងៃទី៣១ ខែតុលា ឆ្នាំ២០១៩ត្រង់ចំណុចហាងកាហ្វេប្រ៊ោនខាងក្រោយធនាគារកាណាឌីយ៉ា ស្ថិតក្នុងសង្កាត់វត្តភ្នំ ខណ្ឌដូនពេញ ។
តាមប្រភពព័ត៌មានពីបុរសដែលជាសន្តិសុខយាមនៅទីតាំងកើតហេតុខាងលើបានរៀបរាប់ប្រាប់ឲ្យដឹងថា នៅមុនពេលកើតហេតុ គឺមានបុគ្គលិកម្នាក់បានស្រែកថា បាត់មួកសុវត្ថិភាពចំនួន១ ដែលដាក់នៅលើម៉ូតូឈប់ចតនៅខាងមុខហាងកាហ្វេប្រ៊ោនខាងលើ ខណៈពេលដែលបុគ្គលិកទាំងអស់ដល់ម៉ោងត្រូវសម្រាក និងបិទទ្វារហាង ។
ភ្លាមៗនោះបុរសដែលជាសន្តិសុខ ក៏ប្រទះឃើញជនសង្ស័យខាងលើរួមជាមួយបក្សពួកម្នាក់ទៀតបានដើរបណ្តើរគ្នាដោយមានកាន់មួកសុវត្ថិភាពចំនួន១ ចេញមកពីកន្លែងកើតហេតុ ។ ដោយមានការសង្ស័យ បុរសជាសន្តិសុខក៏បំរុងហៅជនសង្ស័យសួរនាំ ខណៈពេលដែលជនសង្ស័យឃើញសន្តិសុខក៏បាននាំគ្នាព្យាយាមរត់គេចខ្លួន ត្រូវបុរសជាសន្តិសុខខាងលើរត់ដេញតាមពីក្រោយរហូតទើបស្ទាក់ចាប់ជនសង្ស័យខាងលើបានម្នាក់ និងដកហូរមួកសុវត្ថិភាពចំនួន១នៅត្រង់ចំណុចស្តុបR6 តាមបណ្តោយផ្លូវR6 ក្នុងសង្កាត់ស្រះចក ខណ្ឌដូនពេញ ។
ចំណែកបក្សពួកម្នាក់ទៀតបានរត់គេចខ្លួនបាត់ស្រមោល ដោយសុវត្ថិភាព បន្ទាប់មកសន្តិសុខខាងលើក៏រាយការណ៍ជូនសមត្ថកិច្ចមូលដ្ឋានឲ្យចុះមកជួយធ្វើការអន្តរាគមន៍ ។
តាមប្រភពពីសមត្ថកិច្ចមូលដ្ឋានឲ្យដឹងថា ជនសង្ស័យខាងលើមានឈ្មោះ សុធា អាយុ២០ឆ្នាំ ជាជនអនាថា ។ នៅចំពោះមុខសមត្ថកិច្ចជនសង្ស័យខាងលើក៏បានឆ្លើយសារភាពថា រូបគេពិតជាបានធ្វើភាពលួចមួកសុវត្ថិភាពពិតប្រាកដមែន គឺព្រោះតែរូបគេគ្មានលុយទិញបាយហូប ។
ក្រោយពេលកើតហេតុជនរងគ្រោះបានយកមួកសុវត្ថិភាពត្រឡប់ទៅវិញដោយមិនបានទៅដាក់ពាក្យបន្តឹងនៅប៉ុស្តិ៍នគរបាលរដ្ឋបាលវត្តភ្នំនោះទេ គឺគ្រាន់តែសូមឲ្យសមត្ថកិច្ចជួយធ្វើការណែនាំជនសង្ស័យខាងលើប៉ុណ្ណោះ ។
ដោយឡែកជនសង្ស័យត្រូវបានសមត្ថកិច្ចមូលដ្ឋាននាំយកសាកសួរនៅប៉ុស្តិ៍នគរបាលរដ្ឋបាលវត្តភ្នំ រង់ចាំទាក់ទង និងបញ្ជូនទៅមន្ទីរសង្គមកិច្ចអតីតយុទ្ធជន និងយុវនីតិសម្បទារាជធានីភ្នំពេញធ្វើការអប់រំ ៕ កែសម្រួលដោយ ៖ សុឃាក់
ចែករំលែកព័តមាននេះ