មនុស្សកាន់តែច្រើនចាប់ផ្តើមងាកពីការចាយវាយលើសម្ភារប្រើប្រាស់ទៅការចាយវាយដើម្បីប្តូរយកបទពិសោធន៍ផ្សេងៗទៅវិញ ។ ទោះជាវាជាការចាយលុយដូចគ្នា តែឥទ្ធិពលដែលជះលើអ្នកកាន់លុយមានលក្ខណៈខុសគ្នាយ៉ាងខ្លាំង ។ ទោះជាមនុស្សម្នាក់ៗមានភាពខុសគ្នាច្រើន ការយកលុយទៅប្តូរយកបទពិសោធន៍ភាគច្រើនធ្វើឲ្យមនុស្សសប្បាយចិត្តជាងសម្ភារៈព្រោះតែមូលហេតុខាងក្រោមនេះ៖
១. អារម្មណ៍រីករាយពីការមានសម្ភារៈមិនអាចរក្សាបានយូរទេ៖
យោងតាមការសិក្សារបស់អ្នកជំនាញផ្នែកចិត្តវិទ្យាបានឲ្យដឹងថា អារម្មណ៍សប្បាយរីករាយបន្ទាប់ពីការទិញផ្ទះ រថយន្ត ឬទូរស័ព្ទថ្មីមិនអាចរក្សាបានយូរទេព្រោះមិនយូរប៉ុន្មាន មនុស្សនឹងសុំានឹងរបស់ដែលមានថ្មី ។ ផ្ទុយមកវិញ បទពិសោធន៍ដែលបានមកពីការធ្វើដំណើរកម្សាន្តទៅកន្លែងថ្មី ឬសាកល្បងភោជនីដ្ឋានថ្មីវិញនឹងក្លាយជាផ្នែកមួយនៃអត្តសញ្ញាណរបស់មនុស្ស ហើយធ្វើឲ្យមនុស្សសប្បាយរីករាយបានយូរជាង ។
២. បទពិសោធន៍ជួយឲ្យមនុស្សដឹងពីគោលដៅ និងអ្វីដែលខ្លួនស្រលាញ់៖
រាល់សកម្មភាពដែលអ្នកធ្វើជារៀងរាល់ថ្ងៃតែងត្រូវបានធ្វើឡើងដោយអាស្រ័យលើគោលដៅ និងអ្វីដែលអ្នកស្រលាញ់ មិនមែនសម្ភារៈដែលអ្នកមានទេ ។
៣. សម្ភារៈមិនជួយពង្រឹងដល់ទំនាក់ទំនងក្នុងសង្គមទេ៖
ពេលដែលអ្នកយកលុយទៅប្តូរយកបទពិសោធន៍ អ្នកទទួលយកបទពិសោធន៍ជាមួយអ្នកដទៃ ហើយពេលដែលចប់ហើយ អ្នកអាចចែករំលែកបទពិសោធន៍ជាមួយអ្នកផ្សេងបន្តទៀតបាន ។ តែអ្នកប្រហែលជាមិនអាចកាន់តែស្និទ្ធជាមួយមនុស្សម្នាក់ទៀតបានងាយព្រោះតែអ្នកមានសម្ភារៈទេ ។
៤. បទពិសោធន៍ជួយឲ្យអ្នកស្គាល់ពិភពលោកច្បាស់ជាងមុន៖
បទពិសោធន៍អាចជួយផ្លាស់ប្តូរទស្សនៈរបស់អ្នក និង បង្រៀនអ្នកពីមេរៀនជីវិត ។ ហើយការដឹងពីភាពខុសគ្នាផ្នែកវប្បធម៌ និងទស្សនៈអាចជួយឲ្យពង្រឹងដល់ការគិតរបស់អ្នក និងជួយឲ្យអ្នកមានអារម្មណ៍ត្រេកអរនឹងអ្វីដែលខ្លួនមាន ខុសពីការយកលុយទៅប្តូរសម្ភារៈដែលភាគច្រើនដាក់សម្ពាធឲ្យអ្នកមិនពេញចិត្តនឹងអ្វីដែលមាន ៕ កែសម្រួលដោយ ៖ សុឃាក់
ចែករំលែកព័តមាននេះ