និន្នាការមិនចូលចិត្តអំណាននៅកម្ពុជា នឹងជះឥទ្ធិពលដល់ការអភិវឌ្ឍប្រទេសដោយជៀសមិនរួច បើនៅតែបណ្តែតបណ្តោយ តែវានៅមិនទាន់យឺតពេលនៅឡើយទេ ដើម្បីបង្កើតវប្បធម៌អំណាន ។ ដើម្បីសម្រេចការងារនេះ អ្នកជំនាញថា កម្ពុជាត្រូវការការចូលរួមពីគ្រប់ៗគ្នា ហើយការវិនិយោគលើអំណាន…
និន្នាការមិនចូលចិត្តអំណាននៅកម្ពុជា នឹងជះឥទ្ធិពលដល់ការអភិវឌ្ឍប្រទេសដោយជៀសមិនរួច បើនៅតែបណ្តែតបណ្តោយ តែវានៅមិនទាន់យឺតពេលនៅឡើយទេ ដើម្បីបង្កើតវប្បធម៌អំណាន ។ ដើម្បីសម្រេចការងារនេះ អ្នកជំនាញថា កម្ពុជាត្រូវការការចូលរួមពីគ្រប់ៗគ្នា ហើយការវិនិយោគលើអំណាន ជាការជួយយុវជនអោយឆ្ពោះទៅកាន់អនាគតមួយដ៏ល្អ និងក្លាយជាធនធានមួយដ៏ល្អក្នុងសង្គម ។
លោក ជា តុងហ៊ួរ សហគ្រិនវ័យក្មេង និងជាអ្នកនិព្ធនសៀវភៅបានអោយនិយាយថា ការវិនិយោគលើអំណាន មិនត្រឹមតែជួយអភិវឌ្ឍគំនិតដល់យុវជននោះទេ តែវាមានសារៈសំខាន់សម្រាប់មនុស្សម្នាក់ៗ ដែលសង្គមជាតិមួយត្រូវការយ៉ាងពិតប្រាកដ ។ លោក ជា តុងហ៊ួរ ថ្លែងនៅសន្និសីទសារព័ត៌មាន ស្តីពីយុទ្ធនាការ២៥ថ្ងៃ ២៥ខេត្តក្រុង ដើម្បីលើកកម្ពស់ការអាននៅតាមសហគមន៍ថា «ដើម្បីអោយយុវជនគាត់ងាកមកចាប់កាន់អានសៀវភៅ យើងផ្តោតសំខាន់លើ៣ចំណុច ទី១ទាក់ទង និងការអភិវឌ្ឍសមត្ថភាពខ្លួនឯង ។ នៅពេលគាត់អានសៀវភៅ នៅសាលាគាត់ចូលរៀនគាត់ត្រូវបណ្ណាល័យនៅសាលា ដូច្នេះនៅសាលាត្រូវមានសៀវភៅដើម្បីអាន ហើយសៀវភៅដែលអានច្រើនពីអ្នកនិពន្ធ។ អ្នកនិពន្ធខ្លះប្រើពេលពេញមួយជីវិតរបស់គាត់ទើបអាចនិពន្ធបានសៀវភៅមួយក្បាល»។
លោក ជា តុងហ៊ួរ បន្តថា សៀវភៅដែលអ្នកនិពន្ធម្នាក់ បានសរសេរឡើង គឺតែងតែបង្កប់នូវជំនាញវិជ្ជាជីវៈ បំនិនជីវិតរបស់អ្នកនិព្ធន។ យុវជនត្រូវតែវិនិយោគ ដើម្បីយកមកអភិវឌ្ឍចំណេះដឹងរបស់ខ្លួន។ លោក ជា តុងហ៊ួរ បន្ថែមថា «ទី២ មូលហេតុដែលគាត់ត្រូវតែចូលរួម ការវិនិយោគលើការអានសៀវភៅ ដោយទិញសៀវភៅយកមកអាន ដើម្បីអោយគាត់រស់នៅក្នុងសង្គម គាត់អាចចិញ្ចឹមខ្លួនឯងរស់ មានន័យថា គាត់អាចមានសមត្ថភាពនៅក្នុងការ ដែលគាត់អាចធ្វើអ្វីមួយបានដោយខ្លួនឯង ដើម្បីអោយគាត់ទទួលបានចំណេះដឹងច្រើន ប្រាក់ចំណូលនិងបទពិសោធរបស់គាត់ទៀត គាត់អាចធ្វើកិច្ចការងារដោយខ្លួនឯង »។
សហគ្រិនវ័យក្មេងរូបនេះ បន្តថា ការវិនិយោគលើការអានសៀវភៅ អាចធ្វើអោយយុវជនអភិវឌ្ឍនូវ ចំនេះដឹង សីលធម៌ វិជ្ជាជីវៈក្នុងការរស់នៅ។ នៅពេលដែលយុវជនអានសៀវភៅបានច្រើន ការរស់នៅ ការនិយាយរបស់យុវជននោះ កាន់តែមានភាពរីកចម្រើនច្រើន ហើយនិងយល់ដឹងពីការរស់នៅក្នុងសង្គមបានច្រើន ៕
ចែករំលែកព័តមាននេះ