រាជធានីភ្នំពេញ ៖ ការចាកចេញរបស់ជនជាតិចិនពីប្រទេសកម្ពុជា នៅតែជាប្រធានបទក្ដៅ សម្រាប់កម្ពុជា ក្នុងពេលដែលប្រជាពលរដ្ឋក្នុងតំបន់មួយចំនួនកំពុងរងផលប៉ះពាល់ពីការចាកចេញនេះ ពីព្រោះពួកគេធ្លាប់តែទទួលផលពីវត្តមានជនជាតិចិន ដូចជាការជួលអចលនទ្រព្យ ជួលយានយន្តសម្រាប់ជាដើម ។…
រាជធានីភ្នំពេញ ៖ ការចាកចេញរបស់ជនជាតិចិនពីប្រទេសកម្ពុជា នៅតែជាប្រធានបទក្ដៅ សម្រាប់កម្ពុជា ក្នុងពេលដែលប្រជាពលរដ្ឋក្នុងតំបន់មួយចំនួនកំពុងរងផលប៉ះពាល់ពីការចាកចេញនេះ ពីព្រោះពួកគេធ្លាប់តែទទួលផលពីវត្តមានជនជាតិចិន ដូចជាការជួលអចលនទ្រព្យ ជួលយានយន្តសម្រាប់ជាដើម ។ តែសម្រាប់អ្នកជំនាញអចលនទ្រព្យវិញបានបង្ហាញថា ផលប៉ះពាល់ទាំងនេះ វាគ្រាន់តែជាផលប៉ះពាល់តិចតួច ហើយជាសញ្ញាវិជ្ជមានសម្រាប់វិស័យអចលនទ្រព្យទៅវិញទេ ។
បើតាមលោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា ការចាកចេញរបស់ជនជាតិចិនពីកម្ពុជា ជាពិសេសនៅខេត្តព្រះសីហនុ ភាគច្រើនជាជនជាតិចិន ប្រកបមុខរបរហ្គេមអនឡាញ ដូច្នេះពួកគេមិនបានផ្ដល់ផលចំណេញអ្វី ដល់វិស័យអចលនទ្រព្យនោះទេ ។ ការចាត់វិធានការរបស់រាជរដ្ឋាភិបាលទៅលើជនជាតិចិនទាំងនោះ គឺបានធ្វើឡើងទាន់ពេលវេលា ព្រោះបើសិនជាបណ្ដែតបណ្ដោយកាន់តែយូរ បញ្ហាប្រឈមវាកើតឡើងកាន់តែធ្ងន់ធ្ងរ ដូច្នេះហើយការប៉ះពាល់នៅពេលនេះ វាមិនបានធ្វើអោយប៉ះពាល់ធ្ងន់ធ្ងរណាស់ណាដល់វិស័យអចលនទ្រព្យនោះទេ ហើយការវិនិយោគក្នុងខេត្តព្រះសីហនុនៅតែបន្តដដែល ដោយមិនមានការបញ្ឈប់ការសាងសង់គម្រោងធំៗណាមួយឡើយ ។ ម្យ៉ាងទៀតវិនិយោគិនបរទេស នៅតែចូលមកបណ្ដាក់ទុនក្នុងវិស័យអចលនទ្រព្យដដែល ។
លោកបន្តថា អាជីវកម្មល្បែង វាមិនបានធ្វើអោយប្រទេសរីកចម្រើននោះទេ ហើយក៏មិនបានចូលរួមចំណែកក្នុងការកសាងប្រទេសធំដុំអីដែរ ។ ផ្ទុយទៅវិញ ល្បែងវានឹងធ្វើអោយប្រទេសជួបហានិភ័យសេដ្ឋកិច្ច ហើយអាចអូសបន្លាយរយៈពេលយូរទៀតផង ដូច្នេះការវះកាត់របស់រាជរដ្ឋាភិបាលទៅលើអាជីវកម្មល្បែង វាគឺជារឿងល្អសម្រាប់វិស័យអចលនទ្រព្យទាំងមូល ។ លោកថា៖ «ល្បែងកាន់តែរីកចម្រើន វានឹងធ្វើអោយការវិនិយោគទៅលើវិស័យអចលនទ្រព្យកាន់តែធ្លាក់ចុះបន្តិចម្ដងៗ និងអាចធ្ងន់ធ្ងរនៅពេលណាមួយ» ។
លោកបន្ថែមទៀតថា ប្រទេសកម្ពុជា មានសក្ដានុពលច្រើនណាស់សម្រាប់ប្រកបអាជីវកម្ម ដូច្នេះមិនគួរយកល្បែងមកធ្វើការវិនិយោគធំសម្រាប់កម្ពុជានោះទេ ហើយពលរដ្ឋក៏មិនគួរពឹងលើល្បែងនេះ សម្រាប់ជាប្រាក់ចំណូលរបស់ពួកគាត់ដែរ ។ លោកបញ្ជាក់ថា៖ «លុយដែលបានពីល្បែង ឬលុយក្នុងអាជីវកម្មល្បែង វានឹងមិនមានអ្វីរីកចម្រើនទេ គឺវានៅវិលជុំតែលើតុ ពីម្នាក់ទៅម្នាក់ទៀត ដោយមិនមានការបណ្ដាក់ទុនសម្រាប់អោយរីកចម្រើនក្នុងសេដ្ឋកិច្ចឡើយ ហើយសម្រាប់អ្នកចាញ់ល្បែង អាចប្រព្រឹត្តិនូវអំពើចោរកម្ម លួចឆក់ប្លន់នានាជាដើម និងអំពើធ្វើអត្តឃាដជាដើម » ។
បើតាមលោក គី សេរីវឌ្ឍន៍ អ្នកវិភាគសេដ្ឋកិច្ចកម្ពុជា បានមានប្រសាសន៍ថា មិនអាចប្រកែកបានទេថា មិនមានផលប៉ះពាល់ដល់ប្រជាពលរដ្ឋក្នុងមូលដ្ឋានពីការចាកចេញរបស់ជនជាតិចិនពីខេត្តព្រះសីហនុ ។ ក៏ប៉ុន្តែផលប៉ះពាល់នេះ វាគ្រាន់តែរយៈពេលខ្លីមួយប៉ុណ្ណោះ តែបើសិនជាទុកបណ្ដែតបណ្ដោយអោយអាជីវកម្មហ្គេមអនឡាញកាន់តែរីកចម្រើននៅក្នុងប្រទេសកម្ពុជា នោះផលប៉ះពាល់វានឹងកាន់តែធ្ងន់ធ្ងរ អាចឈានដល់វិបត្តិផងដែរ ។
លោក ម៉ាង ស៊ីណេ អភិបាលរងខេត្តព្រះសីហនុ បានប្រាប់ថា រដ្ឋបាលខេត្តបានជំរុញអោយក្រុមការងារសាងសង់ហេដ្ឋារចនាពន្លឿនការអភិវឌ្ឍន៍ហេដ្ឋារចនាសម្ព័ន្ធផ្លូវក្នុងក្រុង អោយបានរួចរាល់នៅរយៈពេលតែ ៨ខែ ពោលគឺដើម្បីអោយស្របនឹងកំណើនអគារក្នុងខេត្តនេះ ។ បើសិនជាអគារស្អាតល្អ ខ្ពស់ៗមានច្រើន តែមិនមានផ្លូវស្អាតសម្រាប់អោយពលរដ្ឋធ្វើដំណើរស្រួលនោះទេ វាមិនអាចទាក់ទាញ ទេសចរមកលេងខេត្តនេះបាននោះទេ ។ លោកថាខេត្តព្រះសីហនុ មានសក្ដានុពលទាក់ទាញច្រើនទាំងទេសចរ និងការវិនិយោគ ជាក់ស្ដែង កំពុងមានផ្លូវល្បឿនលឿនតភ្ជាប់ពីភ្នំពេញ មានកំពង់ផែទឹកជ្រៅ និងមានអាកាសយានដ្ឋានអន្តរជាតិសម្រាប់ទទួលភ្ញៀវអន្តរជាតិពីគ្រប់ទិសទី និងកំពុងពង្រីកការតភ្ជាប់ថ្មីៗបន្ថែមទៀតផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ