មេដឹកនាំចិនដែលផុសចេញពីគ្រួសារកសិករ

ថ្ងៃទី ៣០ ខែ តុលា ឆ្នាំ ២០១៩
ម៉ោង ១៣:៤៦
ប្រេវីន

នៅពីក្រោយភាពអស្ចារ្យនៃប្រទេសចិនបច្ចុប្បន្នគឺបុរសម្នាក់បានបង្កើតសាធារណរដ្ឋប្រជាមានិតចិនកាលពី៧០ឆ្នាំមុន ។ មេដឹកនាំក្រហមនោះគឺលោកម៉ៅ សេទុង ។ កោះសន្តិភាពនឹងធ្វើការពិនិត្យ លើជីវិតរបស់ម៉ៅ សេទុង ដោយ សម្លឹងមើល ថាតើគាត់បង្កើតសាធារណរដ្ឋប្រជាមានិតចិនបានយ៉ាងដូចម្តេច ? តើគាត់ដុះគំនិតបដិវត្តន៍ពីពេលណាមក ? តើគាត់មានស្ទីលដឹកនាំប្រទេសចិនដូចម្តេច ? តើគាត់មានជីវិតស្នេហាយ៉ាងដូចម្តេច ? តើគាត់លេងសន្លឹកបៀរនយោបាយជាមួយអេមេរិកយ៉ាងដូចម្តេច ?

ម៉ៅ សេទុង គឺជារដ្ឋបុរសបដិវត្តន៍ ដែលទទួលខុសត្រូវក្នុងការបង្កើតសាធារណរដ្ឋប្រជាមានិតចិននិងដាក់អោយអនុវត្តគំរូរដ្ឋាភិបាលកុម្មុយនិស្តតែមួយគត់នៅ លើពិភពលោក ។ ខណៈដែល ប្រទេស កម្ពុជាមានទំនាក់ជិតស្និទ្ឋជាមួយនឹងប្រទេសចិនវា មានសារសំខាន់ដែលត្រូវយល់ដឹងពីមេដឹកនាំចិននិងការកកើតនៃ សាធារណ រដ្ឋប្រជាមានិតចិន ។នៅពេលសតវត្សទី១៩ខិតទៅរកទីបញ្ចប់ឯសតវត្សទី២០នៅពុំទាន់លេចស្រមោលនៅឡើយ កុមារចិនម្នាក់ឈ្មោះ ម៉ៅ សេទុង បានចាប់កំណើត ។ ឪពុករបស់ក្មេងនេះតឹងតែងណាស់ចំពោះរូបគេ ហើយជារឿយៗបានវាយកុមារម៉ៅដោយសារតែរូបគេពុំបានធ្វើអ្វីៗ អោយលឿនតាមចំណង់របស់ខ្លួន ។ ពេលកុមាររូបនេះធំឡើង គេច្រើនតែនិយាយប្រឆាំងនឹងអាជ្ញាធរនិងគ្រូរបស់ខ្លួន ហើយក្រោយមកទៀតប្រឆាំងនឹងអ្នកមានឋានបុណ្យសក្តិខ្ពស់ៗក្នុងរដ្ឋាភិបាល ។ លោក មានជំនឿថា ប្រជាជនគួរគ្រប់គ្រងជោគវាសនារបស់ខ្លួនដោយខ្លួនឯង ។ ក្រោយពីអានអត្ថបទរបស់កាល់ម៉ាក្ស លោកបានក្លាយជាជនកុម្មុយនិស្តម្នាក់និងបានប្រកាសថា រាល់ពាក្យពេចន៍ពិតរាប់ពាន់ក្នុង អត្ថបទកាល់ ម៉ាក្ស ត្រូវបំព្រួញមកនៅត្រឹមប្រយោគមួយដែលមានន័យថា “ជាការសមរម្យណាស់ក្នុងការធ្វើឧទ្ទាមកម្ម” ។

ថ្ងៃ១ តុលា ១៩៤៩ ម៉ៅ សេទុង ក្នុងអាយុ៥៥ឆ្នាំ បានឡើងឈរលើយ៉ខាងមុខទ្វារចូលក្រុង
ប៉េកាំង ។ អស់រយៈពេលរាប់សិបឆ្នាំនៅពេលឆ្លងកាត់មាត់ទ្វារនេះប្រជាជនចិនតែងតែឱន
ក្បាលគោរពទាំងភ័យខ្លាចដល់ពួកអធិរាជដ៏មានអំណាចបំផុតរបស់ប្រទេស តែពេលនេះ
មហាជនទាំងហ្វូងៗមកជួបជុំគា្នយ៉ាងកកកុញដើម្បីអបអរសារទរមេដឹកនាំម្នាក់ដែល
ផុសចេញពីគ្រួសារកសិករមួយ ។

ម៉ៅបានប្រកាសពីអត្ថិភាពរបស់សាធារណ រដ្ឋប្រជាមានិតចិននិងថា “អំណើះតទៅប្រជាជាតិ
របស់ខ្លួន លែងជាប្រជាជាតិដែលត្រូវគេធ្វើអោយអាម៉ាសមុខទៀតហើយ” ។ តើម៉ៅ សេទុង អាចប្រែក្លាយខ្លួនពីកុមារមកពីគ្រួសារកសិករទៅជាមេដឹកនាំប្រទេសចិនយ៉ាងដូចម្តេច ? តើម៉ៅដែលធ្លាប់តែចំណាយពេលវេលាក្នុងវ័យកុមាររបស់ខ្លួនធ្វើការជាមួយគ្រួសារកសិកររបស់លោកនៅឯស្រែក្នុងខេត្តហូណាន អាចលេចឈ្មោះបោះសម្លេង និងក្លាយជាមេដឹកនាំ បដិវត្តន៍មហិមាក្នុងយុគសម័យយើងយ៉ាងដូចម្តេចទៅ ? ដោយសរសេររំឮកពីពេលវេលាកាលនៅជាកុមារភាព ម៉ៅនៅចាំថាឪពុករបស់គាត់បានវាយរូបគាត់និងបងប្អូនប្រុសគាត់ជារឿយៗ ។ ម៉ៅនិយាយថា “គាត់ពុំដែលបានអោយ លុយកាក់ដល់ពួកយើង ហើយផ្តល់ចំណីអាហារតែបន្តិចបន្តួចប៉ុណ្ណោះ” ។ តែម្តាយរបស់ម៉ៅគឺជាពុទ្ធសាសនិកម្នាក់ ជាមាតាចិត្តល្អ និងប្រកបដោយភាពកក់ក្តៅបំផុត ។ នៅពេលគ្រួសារគាត់កាន់តែមានទ្រព្យធនដោយសារតែការរកស៊ីលក់ដូររបស់ឪពុកទទួលបានជោគជ័យ ម្តាយរបស់ម៉ៅតែងផ្តល់ទានជាចំណីអាហារដល់អ្នកសុំទានជានិច្ចដែលនេះជាទង្វើមួយប្រឆាំងនឹងបំណងរបស់គាត់ ។

អាយុបាន៦ឆ្នាំ ឪពុកបានបញ្ចូនកុមារម៉ៅអោយទៅរៀន ជាហេតុនាំអោយគាត់ចេះគិតលេខនិងកាន់បញ្ជីរកស៊ីក្នុងគ្រួសារ ។ តែទោះជាយ៉ាងណា ម៉ៅពុំបោះបង់ចោលកិច្ចការស្រែចំការទេ គឺគាត់តែទៅធ្វើការក្នុងស្រែរៀងរាល់រសៀលរហូតដល់ពេលល្ងាច ។ រឿងនេះនៅមានវគ្គបន្តទៀត ៕ កែសម្រួលដោយ ៖សុឃាក់