ការសិក្សាថ្មី ៖ ផឹកភេសជ្ជៈប៉ូវកម្លាំងកំប៉ុងបង្កើនល្បឿននៃការជ្រុះសក់សម្រាប់បុរស
អង់គ្លេស ៖ ស្ថានភាពស្ត្រេស របបអាហារមិនត្រឹមត្រូវ រួមនិងលក្ខខណ្ឌវេជ្ជសាស្ត្រជាមូលដ្ឋានចម្បង
អង់គ្លេស ៖ ស្ថានភាពស្ត្រេស របបអាហារមិនត្រឹមត្រូវ រួមនិងលក្ខខណ្ឌវេជ្ជសាស្ត្រជាមូលដ្ឋានចម្បង ដែលបណ្តាលឱ្យជ្រុះសក់ ប៉ុន្តែការសិក្សាថ្មីមួយបានបង្ហាញថា ការទទួលទានភេសជ្ជៈប៉ូវកម្លាំង ក៏ស្ថិតក្នុងមូលដ្ឋាននៃការជ្រុះសក់ផងដែរ។ នេះបើយោងតាមប្រភពពីសារព័ត៌មាន Independent របស់អង់គ្លេស ដែលបានចេញផ្សាយ កាលពីថ្ងៃទី០៩ ខែមករា ឆ្នាំ២០២៣។
អ្នកវិទ្យាសាស្ត្រចិនមួយក្រុមបានអះអាងថា បុរសដែលទទួលទានភេសជ្ជៈប៉ូវកម្លាំងកំប៉ុង និងសូម្បីតែ និងកាហ្វេដែលមានជាតិផ្អែម គឺមានហានិភ័យខ្ពស់ក្នុងការទទួលរងការជ្រុះសក់។
អ្នកជំនាញមកពីសាកលវិទ្យាល័យ Tsinghua ក្នុងទីក្រុងប៉េកាំង បានប្រមូលផ្តុំបុរសចំនួន១ពាន់នាក់ ដែលតម្រូវឱ្យទទួលទានភេសជ្ជៈប៉ូវកម្លាំងកំប៉ុងពី ១-៣លីត្រក្នុងមួយសប្តាហ៍។ ពួកគេបានកត់សម្គាល់ឃើញថា អ្នកដែលទទួលទានភេសជ្ជៈផ្អែមលើសពីមួយកែវក្នុងមួយថ្ងៃ មានហានិភ័យខ្ពស់ក្នុងការប្រឈមមុខនឹងការជ្រុះសក់ ៤២% បើប្រៀបធៀបទៅនឹងបុរស ដែលមិនទទួលទានភេសជ្ជៈ ដែលមានជាតិកាហ្វេអ៊ីន និងជាតិស្ករខ្ពស់។ លើសពីនេះទៅទៀត បុរសដែលទទួលស្គាល់ថា ពួកគេកំពុងជួបប្រទះបញ្ហាជ្រុះសក់ក៏បាននិយាយថា ពួកគេបានទទួលទានភេសជ្ជៈផ្អែមជាមធ្យម ១២កែវក្នុងមួយសប្តាហ៍។
នៅក្នុងទស្សនាវដ្តី Nutrients អ្នកស្រាវជ្រាវបានពិនិត្យមើលទម្លាប់របស់បុរសជនជាតិចិនជាង១ពាន់នាក់ ដែលមានអាយុចន្លោះពី ១៨-៤៥ឆ្នាំ ហើយបានសិក្សាពីពួកគេលើសពី៤ខែ ដោយអំឡុងពេលនេះ ពួកគេត្រូវតែកត់ត្រាទម្លាប់នៃការញ៉ាំរបស់ពួកគេ ក៏ដូចជាសុខភាពផ្លូវចិត្តរបស់ពួកគេផងដែរ។ ជាលទ្ធផលនៃការសិក្សាក៏បានបង្ហាញថា អ្នកដែលញ៉ាំអាហារឆ្អិនស្រាប់ (Fast Food) និងបន្លែតិច ក៏ជួបប្រទះនឹងការជ្រុះសក់ក្នុងអត្រាលឿនជាងមុនផងដែរ។ លើសពីនេះ អ្នកដែលត្រូវបានគេដឹងថា ជួបប្រទះការថប់បារម្ភត្រូវបានគេនិយាយថាមានហានិភ័យច្រើនជាង។
យោងតាមប្រភពពីសារព័ត៌មាន The Sun របស់អង់គ្លេស បានដកស្រង់សម្តីវេជ្ជបណ្ឌិត Sharon Wong ដែលបាននិយាយថា «កោសិកាឫសសក់ គឺជាកោសិកាបំបែកលឿនបំផុតទី២ នៅក្នុងរាងកាយ ហើយត្រូវការសារធាតុចិញ្ចឹមទាំងអស់នៃរបបអាហារ ដែលមានសុខភាពល្អជាតុល្យភាព។ នេះរួមបញ្ចូលទាំងប្រូតេអ៊ីនគ្មានខ្លាញ់ កាបូអ៊ីដ្រាតល្អ ខ្លាញ់ វីតាមីន និងសារធាតុរ៉ែ ប៉ុន្តែពុំមានអាហារបំប៉នសម្រាប់សក់នោះទេ»។
លោកបានបន្តថា «ដោយសារសក់មិនមែនជារចនាសម្ព័ន្ធសំខាន់សម្រាប់ការរស់រានមានជីវិត រាងកាយមិនបានផ្តល់អាទិភាពដល់ការប្រើប្រាស់សារធាតុចិញ្ចឹមសម្រាប់ការលូតលាស់សក់នោះទេ។ កង្វះសារធាតុចិញ្ចឹម និងរបបអាហារមិនត្រឹមត្រូវ ដែលកង្វះសុខភាព គឺជាមូលហេតុទូទៅនៃបញ្ហាជ្រុះសក់ និងសក់ស្តើង»៕
ចែករំលែកព័តមាននេះ