រាជធានីភ្នំពេញ ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ជំរុញឲ្យប្រជាពលរដ្ឋកម្ពុជាដែលមានជំងឺប្រចាំកាយ ហើយតែងតែទៅព្យាបាលនៅក្រៅប្រទេស ងាកមកព្យាបាលជំងឺនៅមន្ទីរពេទ្យនានាក្នុងប្រទេសវិញ ។…
រាជធានីភ្នំពេញ ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ជំរុញឲ្យប្រជាពលរដ្ឋកម្ពុជាដែលមានជំងឺប្រចាំកាយ ហើយតែងតែទៅព្យាបាលនៅក្រៅប្រទេស ងាកមកព្យាបាលជំងឺនៅមន្ទីរពេទ្យនានាក្នុងប្រទេសវិញ ។ លោករដ្ឋមន្ត្រីបានថ្លែងបែបនេះ នៅក្នុងឱកាសចុះត្រួតពិនិត្យការដ្ឋានសំណង់អគារមជ្ឈមណ្ឌលពហុឯកទេសនៅមន្ទីរពេទ្យកាល់ម៉ែត នាព្រឹកថ្ងៃទី២៨ ខែតុលា ឆ្នាំ២០១៩ ។
លោករដ្ឋមន្ត្រី ម៉ម ប៊ុនហេង បានលើកឡើងថា កន្លងមកក្រសួងសុខាភិបាលតែងតែជំរុញលើកទឹកចិត្តឲ្យប្រជាពលរដ្ឋ ចូលរួមទទួលសេវាសាធារណៈនានាដែលមាននៅក្នុងប្រទេសកម្ពុជាព្រោះថា ពីមួយថ្ងៃទៅមួយថ្ងៃមន្ទីរពេទ្យឯកទេសជាច្រើននៅក្នុងប្រទេសកម្ពុជា មានការកើនឡើង ជាបន្តបន្ទាប់ សម្រាប់បម្រើសេវាកម្មព្យាបាលជំងឺជូនប្រជាពលរដ្ឋ ស្របតាមស្តង់ដារខ្ពស់ អាចធៀបនឹងបណ្តាប្រទេសដទៃបាន ។
លោករដ្ឋមន្ត្រីបញ្ជាក់ថា ការពង្រីកមន្ទីរពេទ្យកាល់ម៉ែតតាមរយៈការសាងសង់អគារព្យាបាលជំងឺថ្មីៗជាបន្តបន្ទាប់ គឺពិតជាមានសារៈសំខាន់ខ្លាំងណាស់ ដើម្បីឆ្លើយតបតាមតម្រូវការរបស់ប្រជាពលរដ្ឋដែលមានជំងឺប្រចាំកាយ ដែលរាជរដ្ឋាភិបាលយកចិត្តទុកដាក់យ៉ាងខ្លាំង ។ លោកបានបញ្ជាក់ថា រាជរដ្ឋាភិបាលបានចាត់ទុកថា មន្ទីរពេទ្យកាល់ម៉ែតគឺជាមន្ទីរពេទ្យលំដាប់កំពូលមួយរបស់ព្រះរាជាណាចក្រកម្ពុជា ដែលមានបច្ចេកទេសខ្ពស់ មានគ្រប់ឯកទេសសម្រាប់ព្យាបាល និងជាកន្លែងបណ្តុះបណ្តាលស្រាវជ្រាវវេជ្ជសាស្ត្រដែលមានគុណភាពផងដែរ ។
លោករដ្ឋមន្ត្រីសង្ឃឹមជឿជាក់ថា អគារមជ្ឈមណ្ឌលពហុឯកទេសនៃមន្ទីរពេទ្យកាល់ម៉ែត នឹងធ្វើការសាងសង់ក៏ដូចជាបំពាក់គ្រឿងបរិក្ខារបច្ចេកទេសទំនើប តាមបច្ចេកវិទ្យាថ្មីៗក្នុងការព្យាបាលជំងឺរួចរាល់នៅក្នុងឆ្នាំ២០២២ ដើម្បីបម្រើការព្យាបាលជំងឺតាមតម្រូវការរបស់ប្រជាពលរដ្ឋកម្ពុជា ។
លោករដ្ឋមន្ត្រីបន្តទៀតថា បច្ចុប្បន្នរាជរដ្ឋាភិបាលកម្ពុជា បានសាងសង់មណ្ឌលសុខភាពនានានៅតាមតំបន់ជនបទនៃបណ្តាខេត្តនានាជាង៦០កន្លែង ដែលជាការបង្ហាញពីការយកចិត្តទុកដាក់ដ៏ម៉ត់ចត់ ចំពោះសុខភាពរបស់ប្រជាពលរដ្ឋ ដើម្បីកាត់បន្ថយការចំណាយក្នុងការធ្វើដំណើរមករាជធានីភ្នំពេញ ក៏ដូចជាការបង្ខិតសេវាសុខាភិបាលឲ្យកាន់តែជិតប្រជាពលរដ្ឋ ។
សូមបញ្ជាក់ថា អគារមជ្ឈមណ្ឌលពហុឯកទេសនៅមន្ទីរពេទ្យកាល់ម៉ែត គឺជាអគារដែលមានបំពាក់នូវបច្ចេកវិទ្យាវេជ្ជសាស្ត្រឈានមុខ ស្របតាមបទដ្ឋានបច្ចេកទេសពីអន្តរជាតិ ដែលប្រមូលផ្តុំទៅដោយឯកទេសវេជ្ជសាស្ត្រ និងសល្យសាស្ត្រសំខាន់ៗគ្រប់ឯកទេស រួមទាំងផ្នែកសង្គ្រោះបន្ទាន់ ផ្នែកប្រពោធនកម្ម ពហុឯកទេសទំនើប ។
អគារនេះមានផ្ទៃក្រឡាសរុបជាង៤២.០០០ម៉ែត្រការ៉េ មានកម្ពស់១២ជាន់ និងអាចផ្ទុកគ្រែបានរហូតដល់៣២៨ សាងសង់ឡើងក្នុងថវិកាវិនិយោគប្រមាណ៤០លានដុលារអាមេរិកដែលបានមកពីការជួយជ្រោមជ្រែងឧបត្ថមពីក្រសួងសុខាភិបាល និងបណ្ដាអង្គការក្នុងនិងក្រៅស្រុកនានា ជាពិសេសស្ថានទូតបារាំងប្រចាំនៅប្រទេសកម្ពុជា ៕
ចែករំលែកព័តមាននេះ