ប្រទេសអ៊ីរ៉ាក់ ៖ ពលរដ្ឋអីរ៉ាក់កាលពីយប់ថ្ងៃទី២៨តុលា បានផ្គើនបម្រាមគោចរពេលយប់ ដែលបានដាក់នៅក្រុងបាដាដបន្ទាប់ពីពួកនិស្សិតនិងបណ្ដាសិស្សសាលាលើកគ្នាហែក្បួន តាមវិថីនានានៃរដ្ឋធានីនិងនៅតាមទីក្រុងជាច្រើនទៀតនាភាគខាងត្បូងប្រទេស ដើម្បីទាមទាររំលាយរបបបច្ចុប្បន្ន។
យោងតាមប្រភពផ្លូវការថាខណៈការប្រកាសពីបម្រាមគោចរនាំឲ្យមានការសង្ស័យចំពោះការបំបែកបាតុកម្មនាពេលយប់ ក្នុងទីលានតារៀរកណ្ដាលក្រុងបាដាដ ពួកអ្នកតវ៉ាច្រើនរយនាក់នៅតែក្រាញមិនចាកចេញក្រោយបាតុកម្មពេលថៃ្ងដែលនាឱកាសនោះ បាតុករ៥នាក់បានត្រូវស្លាប់នៅទីនោះ។ សរុបចាប់តាំងពីដើមខែតុលានៃចលនាតវ៉ាពុំធ្លាប់មានពីមុនមក មនុស្ស២៣៩នាក់ហើយបានត្រូវស្លាប់និងជាង៨០០០នាក់រងរបួស។
កងទ័ពដែលបានធ្វើការគំរាមកំហែងដាក់ទណ្ឌកម្មធ្ងន់ធ្ងរបំផុត បណ្ដាមន្ត្រីនិងនិស្សិតដែលមិនទៅរៀនឬទៅធ្វើការ បានដាក់បំរាមគោចរនាពេលយប់ពីពាក់កណ្ដាលអាធ្រាត្រដល់ម៉ោង៦ព្រឹក សម្រាប់មនុស្សនិងរថយន្តក្នុងទីក្រុងបាដាដ។
ប៉ុន្តែនាពេលយប់ពួកបាតុករបានផ្គើនដោយនាំគ្នាចុចស៊ីផ្លេនិងចាក់ភ្លេងតាមប្រដាប់បំពងសំឡេងយ៉ាងកងរំពង ខណៈការតវ៉ានាថ្ងៃទី២៨តុលាពួកនិស្សិតនិងសិស្សសាលាលើកគ្នាយ៉ាងច្រើនមកចូលរួម ក្នុងចលនាដែលទាមទារការងារសម្រាប់ពួកយុវជនដែលមានដល់ទៅ៦០%នៃប្រជាជន និងឲ្យបណ្ដាសេវាកម្មសាធារណៈដំណើរការ ក្នុងរដ្ឋមួយដែលពោរពេញដោយអំពើពុករលួយ។
ក្នុងខេត្តជាច្រើននាភាគខាងត្បូងប្រទេសបណ្ដាមន្ត្រី សហជីព និស្សិតនិងសិស្សសាលា បានលើកគ្នាដើរហែក្បួននិងចាប់ផ្ដើមអង្គុយតវ៉ាខណៈសហជីពគ្រូបង្រៀនប្រកាសរយៈពេល៤ថ្ងៃនៃកូដកម្មទូទៅ ហើយពួកមេធាវីក៏ប្រកាសពីកូដកម្ម១សប្ដាហ៍៕ (កែសម្រួលដោយ ៖ បុប្ផា)
ចែករំលែកព័តមាននេះ