រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានគូសបញ្ជាក់អំពីការចាត់វិធានការណ៍ចំពោះសកម្មភាពប៉ុនប៉ងបំផ្លាញជាតិ គឺពុំមែនជាសកម្មភាពរំលោភសិទ្ធិមនុស្សក្នុងសង្គមប្រជាធិបតេយ្យនោះឡើយ ។
សម្តេច ស ខេងបានសរសេរលើបណ្តាញសង្គម កាលពីថ្ងៃទី២៦ តុលាយ៉ាងដូច្នេះថា ថ្មីៗនេះមានការរិះគន់ពីមជ្ឈដ្ឋានខ្លះ ចំពោះការចាត់វិធានការច្បាប់របស់អាជ្ញាធរមានសមត្ថកិច្ច ក្នុងការចាប់ខ្លួនជនសង្ស័យដែលបានចូលរួមក្នុងសកម្មភាពនៃការធ្វើរដ្ឋប្រហារផ្តួលរំលំរាជរដ្ឋាភិបាលស្របច្បាប់និងរបបរាជានិយមអាស្រ័យរដ្ឋធម្មនុញ្ញ ដោយជ្រកក្រោមគម្រោងផែនការនៃការវិលត្រឡប់មកកម្ពុជាវិញ នៅថ្ងៃទី០៩ ខែវិច្ឆិកា ខាងមុខ របស់អតីតថ្នាក់ដឹកនាំមួយចំនួននៃអតីតគណបក្សសង្គ្រោះជាតិ ដែលដឹកនាំដោយទណ្ឌិត សម រង្ស៊ី នោះថា ជាទង្វើរំលោភសិទ្ធិមនុស្ស ។
សម្តេចបញ្ជាក់ថា៖« ក្នុងនាមជាថ្នាក់ដឹកនាំរាជរដ្ឋាភិបាលមួយរូប ខ្ញុំព្រះករុណាខ្ញុំសូមបញ្ជាក់ជូនជនរួមជាតិជាថ្មីម្តងទៀតថា ការចាត់វិធានការច្បាប់ចំពោះសកម្មភាពទាំងឡាយណាដែលប៉ុនប៉ងបំផ្លាញ សុខសន្តិភាព ស្ថេរភាព នយោបាយ ការញុះញង់ឲ្យមានអំពើហិង្សា ចលនាបំបែកបំបាក់ផ្ទៃក្នុងជាតិ ឈានទៅផ្ដួលរំលំរាជរដ្ឋាភិបាល គឺពុំមែនជាសកម្មភាពរំលោភសិទ្ធិមនុស្សក្នុងសង្គមប្រជាធិបតេយ្យនោះឡើយ» ។
សម្តេចបញ្ជាក់បន្ថែមថា៖«បងប្អូនជនរួមជាតិយើងបានជ្រាបស្រាប់ហើយថា ការប្រកាសជាសាធារណៈ និងជាបន្តបន្ទាប់របស់ទណ្ឌិត សម រង្ស៊ី អំពីគំរោងផែនការដែលគេហៅថា ការវិលមកកម្ពុជាវិញ នាថ្ងៃ៩ វិច្ឆិកានេះ ដោយបានធ្វើការអំពាវនាវម្តងហើយម្តងទៀតឲ្យកងទ័ពជាតិផ្ដាច់ខ្លួន ដើម្បីប្រឆាំងនឹងរាជរដ្ឋាភិបាល ការបង្កើតមូលនិធិសម្រាប់ទ្រទ្រង់កងទ័ពខុសច្បាប់របស់ខ្លួន ការញុះញង់ប្រជាពលរដ្ឋឲ្យបះបោផ្តួលរំលំរាជរដ្ឋាភិបាល ការថ្លែងជាសាធារណៈប្រមាថមាក់ងាយ ព្រះមហាក្សត្រជាទីគោរពដ៏ខ្ពង់ខ្ពស់បំផុតនៃជាតិយើង និងទាមទារឲ្យព្រះអង្គដាក់រាជ្យនោះ គឺពិតជាពុំមែនជាសកម្មភាពដែលត្រូវប្រតិបត្តិជាធម្មតាក្នុងសង្គមប្រជាធិបតេយ្យនោះឡើយ » ព័ត៌មានពិស្តារមានផ្សាយនៅកាសែតកោះសន្តិភាព ៕ កែសម្រួលដោយ ៖ សុឃាក់
ចែករំលែកព័តមាននេះ