ប្រទះ​​​រូបសំណាក​ព្រះ​វិស្ណុ​​មាន​អាយុ​ជាង​១,៥០០​ឆ្នាំ​ក្នុង​ប្រឡាយ​ទឹក


ខេត្តបាត់ដំបង​ ៖ រូបសំណាក​ព្រះ​វុ​ស្ណុ ឬព្រះ​នរាយ ដែល​មាន​អាយុកាល​ជាង​១,៥០០​ឆ្នាំ ត្រូវ​បាន​អ្នក​ភូមិ​ប្រទះ​ឃើញ​នៅ​ក្នុង​ទឹក​ប្រឡាយ​មួយ​កន្លែង ក្នុង​ភូមិ​វត្ត​តា​មិ​ម ឃុំ​អូរ​ដំបង​១ ស្រុក​សង្កែ ហើយ​បាន​ប្រគល់​ឱ្យ​សមត្ថកិច្ច កាលពី​រសៀលថ្ងៃ​ទី​២៥ តុលា ដើម្បី​រក្សា​ទុកជា​បណ្ដោះអាសន្ន ​។

មន្ត្រី​នគរបាល​ប៉ុ​ស្ដិ៍អូរ​ដំបង​១បាន​ឲ្យ​ដឹង​ថា រូបសំណាក​បុរាណ​ដ៏​កម្រ​នេះ ត្រូវ​យុវជន​ឈ្មោះ​ជា រ​ដ្ឋា​នី អាយុ​២១​ឆ្នាំ និង​ឈ្មោះ​ហ៊ា​ម គឹ​ម​ផេង អាយុ​២១​ឆ្នាំ ជា​អ្នក​ប្រទះ​ឃើញ​នៅ​ក្នុង​ប្រឡាយ​ទឹក​មួយ​កន្លែង​ក្បែរផ្លូវ​រថភ្លើង កាលពី​ថ្ងៃ​ទី​២៤ តុលា នៅ​ក្នុងភូមិ-ឃុំ​ខាងលើ នៅ​ពេល​ពួក​គេ​ដើរ​ដាក់​សន្ទូច​។

មន្ត្រី​ដដែល​បាន​ប្រាប់​ថា ក្រោយ​ពី​ប្រទះ​ឃើញ យុវជន​ទាំង​២​នាក់​ក៏​បាន​ប្រាប់​ទៅ​អ្នក​ភូមិ​ឈ្មោះ​ឆ​ង ទង ដើម្បី​ជួយ​ពិនិត្យ​និង​ដឹក​យក​មក​រក្សា​ទុក ​។ លុះ​នៅ​រសៀល​ថ្ងៃ​ទី​២៥ តុលា ទើប​ប្រគល់​បន្ត​ទៅ​ឲ្យ​ប៉ុ​ស្ដិ៍​រដ្ឋបាល​អូរ​ដំបង ដើម្បី​រង​់ចាំ​ខាង​មន្ទីរ​ជំនាញ​ចុះ​ទៅ​ពិនិត្យ​បន្ត​និង​យក​ទៅ​រក្សា​ទុក​នៅ​សារ​មន្ទីរ​។ លោក​ឌី កែវ អនុប្រធាន​ការិយាល័យ​បេ​តិក​ភ័​ណ្ឌ ដែល​បាន​ចុះ​ពិនិត្យ​រូបសំណាក​បុរាណ​នោះ ត្រូវ​បាន​សមត្ថកិច្ច​ស្រង់​សំដី​ថា រូបសំណាក​បុរាណ​នេះ មាន​ទម្រង់​ជា «ព្រះ​វិស្ណុ ឬ ព្រះ​នរាយ​»មាន​ដៃ​៤ និង​មានកំ​ពស់​១,៤​ម៉ែត្រ ​។

សមត្ថកិច្ច​បាន​ស្រង់​សំដី មន្ត្រី​ជំនាញ​រូប​នេះ​ទៀត​ថា រូប​បុរាណ​ដ៍​កម្រ​នេះ​ធ្វើ​អំពី​ថ្មភក់ នៅ​ក្នុង​សតវត្ស​ទី​៦ ហើយ​បើ​គិត​មក​ដល់​ត្រិ​ម​សតវត្ស​ទី​២១​នេះ គឺ​រូបសំណាក​ដ៏​ចំណាស់​នេះ មាន​អាយុកាល​ជាង​១,៥០០​ឆ្នាំ​ហើយ​។

ពាក់ព័ន្ធ​នឹង​ការ​ប្រទះ​ឃើញ​រូបសំណាក​នេះ​ដែរ បើ​តាម​សន្និដ្ឋាន​របស់​មន្ត្រី​ជំនាញ​ក៏​ដូច​ជា​សមត្ថកិច្ច​បាន​និយាយ​ថា រូបសំណាក​បុរាណ​នេះ​អាច​ត្រូវ​ឈ្មូ​ញ​ដឹក​មក​ពី​កន្លែង​ផ្សេង និង​ព្យាយាម​នាំ​យក​ទៅ​លក់ដូរ​។ ប៉ុន្តែ​ដោយ​គ្មាន​ទីផ្សារ​ទើប​គេ​ទម្លាក់​ចោល​នៅ​ក្នុង​ទឹក​ប្រឡាយ​នៅ​ចំណុច​ខាងលើ ក្នុង​គោលបំណង​លាក់​ទុក​បណ្ដោះអាសន្ន តែ​គេ​មិនដឹង​ថា គេ​យក​មក​ទម្លាក់​តាំងពី​ពេល​ណា​នោះ​ទេ​។

ទោះ​ជាយ៉ាងណា ក្រោយ​ធ្វើការ​ពិនិត្យ​រួចរាល់ មន្ត្រី​ជំនាញ នៃ​មន្ទីរ​វប្បធម៌​និង​វិចិត្រសិល្ប​:​ខេត្ត នា​ដឹក​រូបសំណាក​បុរាណ​នេះ​ យក​ទៅ​រក្សា​ទុក​នៅ​ក្នុង​សារ​:​មន្ទីរ​ខេត្ត​ហើយ​៕ (សម្រួលដោយ៖ ស្រីណា​)

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ