ខេត្តកំពង់ឆ្នាំង ៖ បុរសម្នាក់ត្រូវជនដៃដល់ លបកាប់មួយកាំបិតផ្គាក់ បណ្តាលឱ្យរងរបួសធ្ងន់ និងបានស្លាប់តាមផ្លូវពេលដឹកទៅសង្គ្រោះនៅមន្ទីរពេទ្យស្រុកកំពង់ត្រឡាច ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ ថ្ងៃទី០៣ ឧសភា នៅក្នុងភូមិស្ពានដែក ឃុំធ្លកវៀន ស្រុកសាមគ្គីមានជ័យ ។ ទោះយ៉ាងណាជនដៃដល់ត្រូវបានមន្ត្រីនគរបាលធ្វើការចាប់ខ្លួនផងដែរ ។
លោក គង់ ហុង អធិការនគរបាលស្រុកសាមគ្គីមានជ័យ ឱ្យដឹងថា បុរសជាជនដៃដល់រូបនោះឈ្មោះ ឃួន សំណប់ អាយុ២៥ឆ្នាំ រស់នៅក្នុងភូមិឃុំកើតហេតុខាងលើ ចំណែកជនរងគ្រោះឈ្មោះ វុន វី អាយុ៣២ឆ្នាំ រស់នៅក្នុងភូមិឃុំជាមួយគ្នា។ មុនពេលកើតហេតុពួកគេបានចូលរួមស៊ីផឹកក្នុងពិធីមង្គលការអ្នកភូមិជាមួយគ្នា បន្ទាប់មកបានចូលរាំវង់ធុងបាស់ ហើយភាគីទាំងពីរបានប៉ះសម្តីឈ្លោះប្រកែកគ្នា ហើយក៏បែកគ្នាទៅផ្ទះរៀងៗខ្លួន ។
លោកបន្តថា ជនដៃដល់ ពេលដើរទៅដល់ផ្ទះបងថ្លៃខ្លួនក៏បានលួចយកកាំបិតផ្គាក់ដងដែកមួយ ដែលមានទម្ងន់ជិត១គីឡូក្រាម ដើរសំដៅទៅផ្ទះជនរងគ្រោះ ។ ខណៈនោះដែរជនរងគ្រោះមិនបានដឹងខ្លួន គឺពេលទៅដល់ផ្ទះបានបើកម៉ាញ៉េ និងដេកស្តាប់លើគ្រែក្រោមផ្ទះ ស្រាប់តែជនដៃដល់បានលបទៅកាប់ជនរងគ្រោះមួយទំហឹងចំក្បាល១កាំបិត បណ្តាលឱ្យមុតផុងលលាដ៍ក្បាលរងរបួសធ្ងន់ និងបានស្លាប់នៅពាក់កណ្តាលផ្លូវ ពេលក្រុមគ្រួសារបញ្ជូនជនរងគ្រោះទៅកាន់មន្ទីរពេទ្យស្រុកកំពង់ត្រឡាច។
ចែករំលែកព័តមាននេះ