ដំណឹង​ឮថា​រថយន្ត​ត្រកូល Hummer នឹង​ត្រឡប់​ឈាន​ចូល​មក​ទីផ្សារ​រ​រថយន្ត​ម្តងទៀត គឺ​មិ​ន​មែន​ជា​អ្វី​ថ្មី​ទេ​ តែ​នៅ​ពេល​នេះ​សារព័ត៌មាន Reuters បាន​ចុះ​ផ្សាយ​ថា ក្រុមហ៊ុន GM នឹង​ផលិត​រថយន្ត Hummer ឱ្យទៅ​ជា​រថយន្ត​អគ្គិសនី ដែល​មាន​ទាំង​សេ​រ៊ី Pickup និង SUV​។ គេ​គ្រោង​នឹង​ផលិត​វា​នៅ​រោងចក្រ Detroit-Hamtramck នៅ​ចុងឆ្នាំ​២០២១ ។

យោង​តាម​កិច្ចព្រមព្រៀង​ការងារ​ដែល​ស្នើ​ឡើង​រវាង​ក្រុមហ៊ុន GM និង សហព័ន្ធ​សហជីព​កម្មករ​ស្វ័យភាព បានឱ្យ​ដឹង​ថា ក្រុមហ៊ុន​រថយន្ត GM នឹង​វិនិយោគ ៣​ពាន់​លាន​ដុល្លារ​អា​មេ​រិ​ក នៅ​ក្នុង​រោងចក្រ Detroit-Hamtramck ជា​ពិសេស​សម្រាប់​រថយន្ត​អគ្គិសនី Hummer ដែល​គ្រោង​នឹង​ផលិត​នេះ​។

យោង​តាម​សារព័ត៌មាន Reuters បានឱ្យ​ដឹង​ថា គម្រោង​ដែល​មានឈ្មោះ​ថា BT1 Program មាន​រាប់​បញ្ចូល​ទាំង​រថយន្ត Pickup អគ្គិសនី​សម្រាប់​យីហោ​របស់ GMC និង រថយន្ត SUV អគ្គិសនី​របស់ Cadillac ដែល​នឹង​ចាប់ផ្តើម​នៅ​ឆ្នាំ​២០២៣​។ នៅ​ខណៈ​នេះ យីហោ Hummer កំពុង​តែ​ត្រូវ​គេ​ដាក់​ក្នុង​ការ​ពិចារណា​ឱ្យ​ជាក់លាក់​សិន​។

យើង​បានដឹង​ស្រាប់​មក​ហើយ​ថា រថយន្ត​ស្តេច​ស៊ីសាំង Hummer គឺជា​រថយន្ត​ដែល​ធំ​ពិបាក​ទុកដាក់ ហើយ​ហុត​សាំង​ដូច​ហុត​ទឹក​សម្ល​អ៊ីចឹង​។ ទោះបីជា​យ៉ាងនេះ​ក៏​ដោយ បងប្អូន​មួយ​ចំនួន​នៅ​តែ​អត់​ស្រឡាញ់​វា​មិន​បាន​។ ចុះ​ទម្រាំ​តែ​លើក​នេះ Hummer ចេញ​ជា​រថយន្ត​អគ្គិសនី​ទៀត? តើ​ពួក​គាត់​កាន់តែ​ស្រឡាញ់​វា​ប៉ុនណា?

រថយន្ត​ប្រភេទ SUV កំពុង​តែ​ត្រូវប៉ាន់​យ៉ាង​ខ្លាំង​នា​ពេល​បច្ចុប្បន្ន ខណៈ​ដែល​សន្ទុះ​ការ​លក់​រថយន្ត​អគ្គិសនី​ក៏​មានការ​កើនឡើង​ដែរ​។ ប្រសិនបើ Hummer ដែល​ជា​រថយន្ត SUV ពេញ​និយម​ស្រាប់ ចេញ​ជា​រថយន្ត​អគ្គិសនី វា​កាន់តែ​កប់​ជាក់​ជា​មិន​ខាន​។ វា​ជា​រថយន្ត​ដែល​ប្រជាជន​អា​មេ​រិ​ក​មិន​ចេះ​ធុញ​នឹង​រូបរាង​របស់​វា​។

ក្រុមហ៊ុន GM នៅ​ពេល​នេះ​បាន​បញ្ជាក់​ពី​ឈ្មោះ​រោងចក្រ​ដែល​នឹង​ដាក់​ផលិត​រថយន្ត Hummer អគ្គិសនី​។ គេ​នៅ​មិន​ទាន់​ដឹង​ព័ត៌មាន​ឱ្យ​ច្បាស់​ជាង​នេះ​នៅឡើយ​ទេ ៕

ប្រភព ៖ carbuzz , កែសម្រួល​ដោយ ៖ សំណាង