រាជធានីភ្នំពេញ ៖ មានករណីជនសង្ស័យមួយក្រុមបានធ្វើសកម្មភាពលួចចូលអគាររោងចក្រកាត់ដេរមួយកន្លែងយីហោ«ហ្គ្រីន ហ្វៀល ខេមបូឌា អ៊ិនដាស់ស្ទ្រីល ឯ. ក» ហើយឡើងទៅលើជាន់ទី១ និងគាស់ទូដែកលួចយកលុយអស់ជិត៥ម៉ឺនដុល្លារ…
រាជធានីភ្នំពេញ ៖ មានករណីជនសង្ស័យមួយក្រុមបានធ្វើសកម្មភាពលួចចូលអគាររោងចក្រកាត់ដេរមួយកន្លែងយីហោ«ហ្គ្រីន ហ្វៀល ខេមបូឌា អ៊ិនដាស់ស្ទ្រីល ឯ. ក» ហើយឡើងទៅលើជាន់ទី១ និងគាស់ទូដែកលួចយកលុយអស់ជិត៥ម៉ឺនដុល្លារ បន្ទាប់មកនាំគ្នារត់គេចខ្លួនបាត់អស់ដោយសុវត្ថិភាព។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលឡើងកាលពីវេលាម៉ោង៧ព្រឹកថ្ងៃទី២២ ខែតុលា ឆ្នាំ២០១៩ នៅក្នុងរោងចក្រកាត់ដេរខាងលើ មានទីតាំងក្នុងភូមិគល់ សង្កាត់កន្ទោក ខណ្ឌកំបូល រាជធានីភ្នំពេញ។
ជនរងគ្រោះឈ្មោះ LI QIANG ភេទប្រុស អាយុ៤១ឆ្នាំ ជាជនជាតិចិន ស្រុកកំណើតនៅប្រទេសចិន កាន់លិខិតឆ្លងដែនលេខ G52007632 ចុះថ្ងៃទី២៦ ខែឧសភា ឆ្នាំ២០១១ បច្ចុប្បន្នស្នាក់នៅបណ្ដោះអាសន្នក្នុងអគាររោងចក្រ ស្ថិតនៅក្នុងភូមិកើតហេតុខាងលើ ។ ចំណែកលុយដែលបាត់បង់នោះមានចំនួន៤៩.០០០ដុល្លារ(បួនម៉ឺនប្រាំបួនពាន់ដុល្លារ)។
តាមប្រភពព័ត៌មានបានឲ្យដឹងថា ទូដែកខាងលើនោះត្រូវបានទុកដាក់នៅក្នុងបន្ទប់ជាន់ទី១ដែលជាបន្ទប់ធ្វើការរបស់ជនរងគ្រោះស្ថិតនៅទល់មុខអគារសង្វាក់ផលិតកម្មរបស់រោងចក្រ ។ ដោយឡែកកាលពីថ្ងៃទី១០ ខែតុលា គឺមានរយៈពេល១២ថ្ងៃមុនពេលកើតហេតុខាងលើ បុរសជនជាតិចិនរងគ្រោះម្នាក់ខាងលើបានយកលុយចំនួន៨ម៉ឺនដុល្លារទៅទុកនៅក្នុងទូដែកមួយនោះ។
តាមប្រភពព័ត៌មានបានបន្តថា លុះដល់ថ្ងៃទី២១ ខែតុលា គឺមុនពេលកើតហេតុ១ថ្ងៃ បុរសរងគ្រោះបានដកលុយចំនួន៣១.០០០ដុល្លារពីទូដែកនេះវិញ ដើម្បីយកទៅចំណាយលើកិច្ចការងារផ្សេងៗរបស់ខ្លួន ។ ម្យ៉ាងទៀតរោងចក្រនេះទើបនឹងបើកដំណើរការថ្មីៗប៉ុណ្ណោះ ហើយបន្ទប់ធ្វើការដែលដាក់ទូដែកនោះគ្មាននរណាចេញ-ចូលបានក្រៅពីបុគ្គលិករោងចក្រនោះឡើយ។
តាមប្រភពព័ត៌មានបានបន្តថា ចំណែកលុយដែលនៅសល់មានចំនួន៤៩.០០០ដុល្លារ ត្រូវបានរក្សាទុកនៅក្នុងទូដែកនោះវិញ ហើយបុរសរងគ្រោះបានចាក់សោទុកដាក់នៅកន្លែងដើមយ៉ាងត្រឹមត្រូវ មិនមានការធ្វេសប្រហែសនោះឡើយ។ លុះរហូតមកដល់វេលាម៉ោង៧ព្រឹកថ្ងៃទី២២ ខែតុលា ខណៈពេលបុរសរងគ្រោះចូលទៅដល់ក្នុងបន្ទប់ធ្វើការ ស្រាប់តែឃើញអីវ៉ាន់រប៉ាត់រប៉ាយ ហើយទូដែកមានស្នាមគាស់និងបាត់លុយអស់គ្មានសល់មួយរៀល ទើបមានការភ្ញាក់ផ្អើលឆោឡោ ។ បន្ទាប់មកបុរសរងគ្រោះបានហៅប្រធានរដ្ឋបាលរោងចក្រឲ្យទៅជួយមើល ព្រមទាំងនាំបុរសរងគ្រោះទៅដាក់ពាក្យបណ្ដឹងនៅប៉ុស្តិ៍រដ្ឋបាលនគរបាលកន្ទោក ដើម្បីជួយស្រាវជ្រាវវែកមុខក្រុមជនសង្ស័យខាងលើនោះយកមកផ្តន្ទាទោសតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ