ផ្លូវដែលល្អក៏គឺកុំប្រមាទ កុំទុកចិត្តអ្វីៗឲ្យជ្រុលហួស ត្រូវចេះរក្សាខ្លួន ទុកចិត្តខ្លួនឯងឱ្យប្រាកដ ព្រោះថាសម្បត្តិនៅក្នុងលោកនេះមិនមានសម្បត្តិណាដែលធ្វើឲ្យយើងទុកចិត្តទាំងស្រុងបានឡើយសុទ្ធតែប្រែប្រួលទាំងអស់ រកសង្ឃឹមមិនបានទេ ។
មែនទែនទៅ កុំថាឡើយរបស់ក្រៅខ្លួនដូរផ្លាស់ ផ្លាស់ប្តូរជានិច្ចនោះ សូម្បីតែចិត្តរបស់យើងក៏យើងគ្រប់គ្រងមិនបានដែរ ប្រសិនបើបណ្តោយឲ្យអារម្មណ៍អូសទាញ អារម្មណ៍នឹងបន្សាត់ចិត្តរបស់យើងឲ្យហូរទៅតាមខ្សែតណ្ហាជាក់ជាមិនខាន ។
បើនិយាយឱ្យមែនទែនទៅមានមនុស្សមិនតិចនាក់ទេដែលធ្លាប់ស្រឡាញ់ គោរពរាប់អានយើង តែពេលនេះគេបែរជាខឹងក្រោធនឹងយើង ស្អប់យើង ឈប់គោរពរាប់អានយើង ។ ត្រង់នេះហើយដែលអ្នកប្រាជ្ញលោកពោលថា អ្វីក៏ដោយនៅក្នុងលោកនេះរកឋិតថេរ រកសង្ឃឹមមិនបានទេ គឺរមែងមានការប្រែប្រួល ផ្លាស់ប្តូរទៅជាធម្មតា ។
ដូច្នេះតើឲ្យយើងសង្ឃឹមទៅលើរបស់អ្វី ? ផ្លូវដែលល្អក៏គឺកុំប្រមាទ កុំទុកចិត្តអ្វីៗឲ្យជ្រុលហួសពេកត្រូវចេះរក្សាខ្លួន ទុកចិត្តខ្លួនដោយខ្លួនឯងទើបជីវិតកក់ក្តៅ ។ (ដោយសាន សារិន)
ចែករំលែកព័តមាននេះ