រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ក្នុងមិត្តភក្តិ៣នាក់បានចូលទៅម៉ាស្សាកោសជប់ ស្រាប់តែចេញមកវិញចោទនារីម៉ាស្សាថា បន្លំដូរលុយ ដុល្លារសែនអស់ចំនួន២០០ដុល្លារ បង្កឱ្យមានការភ្ញាក់ផ្អើលកាលពីម៉ោង១២អធ្រាត្រ ថ្ងៃទី២១ ខែតុលា ឆ្នាំ២០១៩ នៅផ្ទះយីហោ «៧៧៧៧ម៉ាស្សាកោសជប់» ជិតស្ពានអាកាសស្ទឹងមានជ័យ ផ្លូវ២៧១ ស្ថិតក្នុងសង្កាត់បឹងសាឡាង ខណ្ឌទួលគោក ។
សេចក្តីរាយការណ៍បន្តថា បុរសត្រូវគេបន្លំដូរលុយខាងលើ មានឈ្មោះ សេក សោម អាយុ៣៧ឆ្នាំ មុខរបរបើករថយន្ត ស្នាក់នៅម្តុំស្ពានអាកាសស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ ចំណែកមិត្តភក្តិ២នាក់ទៀតមិនបានឱ្យដឹងឈ្មោះនោះទេ ។ ដោយឡែកនារីម៉ាស្សាដែលត្រូវគេចោទថា បន្លំដូររបស់គេនោះ សុំមិនបញ្ចេញឈ្មោះ ។
តាមសម្ដីខាងបុរសដែលត្រូវគេដូចលុយក្លែងក្លាយបានឱ្យដឹងថា មុនកើតហេតុ ពួកគាត់មានគ្នា៣នាក់សុទ្ធតែប្រុសៗ ដោយមានលុយ៥០០ដុល្លារសុទ្ធតែក្រដាស១០០ដុល្លារ និងលុយខ្មែរមួយចំនួន បាននាំគ្នាចូលទៅម៉ាស្សាកោសជប់នៅហាងខាងលើ ដោយចូលក្នុង២នាក់ និងនៅក្រៅម្នាក់ ។ ពេលនោះរូបគាត់ត្រូវបាននារីម្នាក់ឱ្យរូបគាត់ដោះខោអាវចេញ និងឱ្យដេកផ្កាប់មុខដើម្បីជប់ខ្យល់ លុះពេលគាត់កំពុងតែផ្កាប់មុខ នារីជាដៃគូររូបនោះបានស្រែកហៅនារីម្នាក់ទៀតឱ្យយកកែវជប់មកបន្ថែម។
បុរសខាងលើបន្តថា នៅពេលដែលនារីម្នាក់ទៀតនោះចូលមក រូបគាត់មិនបានចាប់អារម្មណ៍នោះទេ លុះមួយសន្ទុះរូបគាត់មានការសង្ស័យក៏ទាញខោ រួចឆែកមើលកាបូបលុយ ស្រាប់តែឃើញលុយសែនចំនួន២០៩ដុល្លារមកនៅក្នុងកាបូបរបស់គាត់ ទើបរូបគាត់ដឹងថា មានគេលួចដូរលុយរបស់គាត់ បង្កឲ្យមានការភ្ញាក់ផ្អើលដល់បងប្អូន និងសមត្ថកិច្ចចុះទៅសាកសួរតែម្ដង ។
ដោយឡែកនារីជាដៃគូរបស់គាត់បាន បដិសេធ និងហ៊ានស្បថថា មិនបានលួចដូរលុយ របស់ភ្ញៀវនោះទេ ហើយហាងខាងលើនេះ ទើបតែបើកបានតែ១ថ្ងៃប៉ុណ្ណោះ ក៏ត្រូវមានបញ្ហាតែម្ដង ។
ក្រោយពេលកើតហេតុ ដោយសារតែមានការប្រកែកចោទគ្នាទៅវិញទៅមក ភាគីទាំងសងខាងត្រូវបានសមត្ថកិច្ចហៅទៅធ្វើការសាកសួរ និងសម្របសម្រួលនៅប៉ុស្តិ៍នគរបាល បឹងសាឡាង ដោយខាងបុរសសុំឱ្យសមត្ថកិច្ចធ្វើការអប់រំកុំឱ្យទីតាំងខាងលើ ធ្វើរបៀបនេះជាបន្តទៀត ។ (កែសម្រួលដោយ ៖ បុប្ផា)
ចែករំលែកព័តមាននេះ