ខេត្តបាត់ដំបង ៖ បើទោះជាប្រទេសកម្ពុជា និងប្រទេសថៃ បានប្រកាសរួមគ្នាបិទព្រំដែនគោកដែលមានប្រវែងប្រមាណ៨០០គីឡូម៉ែត្រ មិនឱ្យឆ្លងកាត់ ឬទំនាក់ទំនងគ្នាទាល់តែសោះអស់រយៈពេលច្រើនខែកន្លងមកនេះក្ដី ក៏នៅតែមានចន្លោះប្រហោងអាចឲ្យពលរដ្ឋកម្ពុជាមួយចំនួនលួចឆ្លងព្រំដែនចេញទៅរកការងារធ្វើនៅប្រទេសថៃបានដដែលតាមរយៈមេខ្យល់ទុច្ចរិត ។
ប៉ុន្តែពេលខ្លះក៏ត្រូវពួកទាហានថៃចាប់បាន ហើយពេលខ្លះក៏ត្រូវកម្លាំងការពារព្រំដែនកម្ពុជាទប់ស្កាល់ទាន់ពេល ឬចាប់បានទាំងមេខ្យល់ជាបន្តបន្តាប់ទៀតផង ។ ជាក់ស្ដែងកាលពីថ្ងៃទី១៥ តុលា កម្លាំងចម្រុះការពារព្រំដែនជួរមុខ សហការជាមួយមន្ត្រីនគរបាលមូលដ្ឋានផងបានធ្វើការស្រាវជ្រាវបង្ក្រាបក្រុមមេខ្យល់នាំមនុស្សឆ្លងដែនខុសច្បាប់ចំនួន០២ករណី និងបានចាប់ខ្លួនមេខ្យល់ចំនួន០៤នាក់ជាបន្តបន្ទាប់នៅស្រុកសំពៅលូន ខណៈប៉ុន្មាននាក់ទៀតបានរត់គេចខ្លួន ។
ក្រុមនេះធ្លាប់មានប្រវត្តិរកស៊ីរត់ពន្ធមនុស្សឆ្លងដែនចេញទៅប្រទេសថៃ តាំងពីបន្ទាត់ព្រំដែនបើកចំហររហូតមកដល់ពេលនេះ បន្ទាត់ព្រំដែនត្រូវបិទខ្ទប់ទាំងស្រុង ។ នេះបើតាមការកំណត់មុខសញ្ញារបស់សមត្ថកិច្ច ។ តាមរយៈរបាយការណ៍ អធិការស្រុកសំពៅលូន លោក ទឹម វិឆ័យ បានឲ្យដឹងថា មេខ្យល់នាំមនុស្សឆ្លងដែនខុសច្បាប់ទាំង០៤នាក់នោះ ត្រូវបានកម្លាំងចម្រុះឃាត់ខ្លួនក្នុងករណីផ្សេងគ្នា តែក្នុងថ្ងៃតែមួយ ។ លោកបានប្រាប់ថា ករណីទី១-ឃាត់ខ្លួនមេខ្យល់០២នាក់ គឺឈ្មោះឌឿន ឡៃហ៊ាង ហៅខ្មៅ ភេទប្រុស អាយុ៣៥ឆ្នាំ និងឈ្មោះចឹក ប៉ក់ ភេទប្រុស អាយុ២៨ឆ្នាំ តែនៅមានបក្សពួក០២នាក់ទៀតកំពុងគេចខ្លួន ។
បើតាមចម្លើយសារភាព ក្រុមនេះបាននាំពលរដ្ឋខ្មែរចំនួន០៥នាក់ លួចឆ្លងព្រំដែនចំនួន០២លើក គឺនៅថ្ងៃទី១៣ និង១៤ តុលា លួចឆ្លងអូរព្រំដែនតាមច្រករបៀង ក្នុងទឹកដីឃុំសន្តិភាព ស្រុកសំពៅលូន ដោយបញ្ជូនទៅប្រគល់ឲ្យស្ត្រីជនជាតិខ្មែរម្នាក់ឈ្មោះ ប៊ុន មុំ ហៅ ចែមុំ បានប្ដីថៃ ដែលរង់ចាំទទួលនៅខាងទឹកដីថៃ ។ ហើយពួកគេទទួលបានកំរៃជើងសារពីមនុស្សម្នាក់ត្រឹម១០០០បាតប៉ុណ្ណោះ ។
ដោយឡែក ករណីទី២-វិញ បើតាមរបាយការណ៍ លោក ទឹម វិឆ័យ បាននិយាយថា មានមនុស្សចំនួន០៥នាក់ ជាប់ពាក់ព័ន្ធនឹងការរត់ពន្ធមនុស្សឆ្លងដែនខុសច្បាប់នេះ តែកម្លាំងជួរមុខនិងមន្ត្រីជំនាញរបស់លោកធ្វើការស្រាវជ្រាវតាមឃាត់ខ្លួនបានតែចំនួន០២នាក់ប៉ុណ្ណោះជាមេខ្យល់ ។ មេខ្យល់ទាំង០២នាក់នោះ មានម្នាក់ឈ្មោះ អ៊ឹម ជាលី ហៅលី ភេទប្រុសអាយុ៣៩ឆ្នាំ និងឈ្មោះ ថុល ធឿន ហៅ ទូន ភេទប្រុស អាយុ៤២ឆ្នាំ រីឯចំនួន០៣នាក់ទៀតរត់គេចខ្លួន ប៉ុន្តែក្នុងចំណោមនោះ មានម្នាក់ជាស្ត្រីឈ្មោះលឹម រ៉េម ហៅចែរ៉េម អាយុ៤៤ឆ្នាំ ជនជាតិខ្មែរ បានប្ដីសៀម កំពុងរស់នៅប្រទេសថៃ ហើយក៏ជាមេខ្យល់រង់ចាំទទូលពលរដ្ឋខ្មែរនៅខាងទឹកដីសៀមដែរ ។
នៅក្នុងរបាយការណ៍ក្រុមនេះ ក៏ធ្លាប់បាននាំមនុស្សឆ្លងដែនចំនួន០២លើកចុងក្រោយដូចគ្នាដែរ គឺនៅថ្ងៃទី១៣ តុលា ពួកគេបាននាំពលរដ្ឋខ្មែរចំនួន១៨នាក់លួចចេញតាមច្រករបៀងក្បែរ «ទឹកធ្លាក៣២» ក្នុងឃុំតាស្ដា ស្រុកសំពៅលូន និងនៅថ្ងៃទី១៤ តុលា បាននាំពលរដ្ឋខ្មែរចំនួន០៣នាក់ទៀត លួចដើរកាត់ព្រៃ និងឆ្លងអូរព្រំដែនកម្ពុជា-ថៃ ត្រង់ចំណុចភូមិគីឡូ១៣ ឃុំសន្តិភាព ស្រុកសំពៅលូន ។ សរុបទាំង០២លើក មានពលរដ្ឋខ្មែរចំនួន២១នាក់ ដែលចាញ់បោក ។
របាយការណ៍បានបញ្ជាក់ថា ក្រុមមេខ្យល់ទាំងអស់នេះ សុទ្ធតែទទួលបានប្រាក់កំរ៉ៃជើងសារប្រហាក់ប្រហែលគ្នា គឺក្នុងមនុស្សម្នាក់ទទូលបានកំរៃចំនួន១០០០បាត ។ នេះបើតាមចម្លើយសារភាពរបស់ពួកគេដែលបានប្រាប់សមត្ថកិច្ចក្រោយត្រូវចាប់ខ្លួន ។
លោក ទឹម វិឆ័យ ដែលទទូលចាត់ការលើសំណុំរឿងនេះ ក្រោយកម្លាំងចម្រុះការពារព្រំដែនជួរមុខឃាត់ខ្លួនបានក្រុមមេខ្យល់បាននិយាយថា ការឈានដល់ការតាមចាប់ខ្លួនមុខសញ្ញាក្រុមមេខ្យល់ទាំងនេះបានជាបន្តបន្ទាប់ដោយយោងតាមចម្លើយសារភាពរបស់ពលរដ្ឋខ្មែរមួយចំនួន ដែលលួចឆ្លងដែនខុសច្បាប់ចូលដល់ទឹកដីថៃ ហើយត្រូវកម្លាំងទាហានសៀមចាប់បាន ។
ពលរដ្ឋខ្មែរទាំងនោះ បានចង្អុលប្រាប់ពួកទាហានថៃចំៗ អំពីអត្តសញ្ញាណក្រុមមេខ្យល់ខ្មែរ ដែលពូកែនាំមនុស្សឆ្លងដែនខុសច្បាប់ ទើបមន្ត្រីជំនាញយើងធ្វើការស្រាវជ្រាវរហូតតាមចាប់មុខសញ្ញាមេខ្យល់រត់ពន្ធមនុស្សឆ្លងដែនខុសច្បាប់នេះ បានជាបន្តបន្ទាប់ ។ ប៉ុន្តែនៅមួយចំនួនទៀតកំពុងសំងំលាក់ខ្លួន ដែលកម្លាំងយើងកំពុងតាមរុករក ។ ក្រុមមេខ្យល់ដែលចាប់ខ្លួនបានចំនួន០៤នាក់នេះ មន្ត្រីជំនាញបានកសាងសំណុំរឿង បញ្ជូនទកាន់ស្នងការខេត្ត ដើម្បីចាត់ការតាមនីតិវិធី
ហើយ ៕
ចែករំលែកព័តមាននេះ