ខេត្តកំពង់ឆ្នាំង ៖ មងបង្ក្រាបគឺជាឧបករណ៍បែបថ្មីមួយ ដែលច្បាប់ជលផលបានហាមឃាត់ ប៉ុន្តែមងប្រភេទនេះកំពុងប្រើប្រាស់ចាប់ត្រីយ៉ាងអនាធិបតេយ្យ ពុំឃើញមានសមត្ថកិច្ចជំនាញណាមួយបង្ក្រាបក្រុមនេសាទទាំងនេះឡើយ។ ដោយក្រុមអ្នកនេសាទទាំងនោះបានអះអាងប្រាប់ប្រជាពលរដ្ឋថា ពួកគេបានបង់ប្រាក់ឱ្យមន្ត្រីជំនាញជលផលរួចហើយ ទើបអាចរកបានយ៉ាងរំភើយបែបនេះ ។
ថ្មីៗនេះ អ្នកយកព័ត៌មាន១ក្រុមបានចុះយកព័ត៌មានតាមដងទន្លេ ហើយប្រទះឃើញកាណូតវ៉ៃមងបង្ក្រាបចំនួន៣គ្រឿងរបស់ប្រជានេសាទខ្មែរអិុស្លាម កំពុងធ្វើសកម្មភាពនៅចំណុចទន្លេមុខភូមិកោះឬស្សី ក្នុងភូមិប្រឡាយមាស ស្រុកកំពង់លែង ដោយពុំឃើញមានសមត្ថកិច្ចជំនាញណាមួយមកបង្ក្រាបពួកគេឡើយ។
ប្រជាពលរដ្ឋនៅក្នុងភូមិកោះឬស្សី បានឱ្យអ្នកយកព័ត៌មានយើងដឹងថា ពួកគាត់ធ្លាប់ឃើញ អ្នកប្រើប្រាស់ឧបករណ៍មងបង្ក្រាបខុសច្បាប់នេះមានចំនួនពី១០ទៅ១៥ទូកមករកទាំងយប់ទាំងថ្ងៃ នៅតាមដងទន្លេក្នុងភូមិកោះឬស្សី ដោយគេបានប្រាប់ថាពួកគេបានបង់លុយឱ្យសមត្ថកិច្ចរួចហើយ ខ្លាចអីនឹងរក។ ដោយឡែកនៅចំណុចមាត់ស្ទឹងសែនក្នុងភូមិសាស្ត្រស្រុកបរិបូរណ៍ឃើញមានកាណូតមងបង្ក្រាបចំនួន៥វង់កំពុងធ្វើសកម្មភាព និងចំណុចក្បាលកោះ ភូមិកោះក្របី សង្កាត់ផ្សារឆ្នាំង ឃើញមានចំនួន១វង់ទៀតដែរ។
មន្ត្រីជំនាញជលផលធ្លាប់ឱ្យដឹងថា មងបង្ក្រាបនេះជាឧបករណ៍នេសាទបែបថ្មីដែលច្បាប់បានហាមឃាត់ ព្រោះមងបង្ក្រាបនេះគេកែច្នៃជាមងជាប់ត្រួតគ្នាចំនួន៣ជាន់ ដែលមានក្រឡាពីតូចទៅធំបន្តបន្ទាប់គ្នា ដោយអាចចាប់ត្រីបានគ្រប់ប្រភេទ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ