មន្ត្រីកីឡាជាន់ខ្ពស់របស់ឥណ្ឌូណេស៊ីបានបញ្ជាក់ កាលពីថ្ងៃអង្គារសប្តាហ៍នេះថា ប្រទេសរបស់ខ្លួននឹងប្រកាសជាផ្លូវការពីការត្រៀមខ្លួនរួចរាល់ធ្វើម្ចាស់ផ្ទះព្រឹត្តិការណ៍កីឡាអាស៊ីហ្គេមលើកទី១៨នា ឆ្នាំ២០១៩ ក្នុងអំឡុងដំណើរទស្សនកិច្ចរបស់ក្រុមប្រឹក្សាអូឡាំពិកអាស៊ី (OCA) នាថ្ងៃទី៥ ឧសភា ខាងមុខ ។
មន្ត្រីកីឡាជាន់ខ្ពស់របស់ឥណ្ឌូណេស៊ីបានបញ្ជាក់ កាលពីថ្ងៃអង្គារសប្តាហ៍នេះថា ប្រទេសរបស់ខ្លួននឹងប្រកាសជាផ្លូវការពីការត្រៀមខ្លួនរួចរាល់ធ្វើម្ចាស់ផ្ទះព្រឹត្តិការណ៍កីឡាអាស៊ីហ្គេមលើកទី១៨នា ឆ្នាំ២០១៩ ក្នុងអំឡុងដំណើរទស្សនកិច្ចរបស់ក្រុមប្រឹក្សាអូឡាំពិកអាស៊ី (OCA) នាថ្ងៃទី៥ ឧសភា ខាងមុខ ។
លោក Roy Suryu រដ្ឋមន្ត្រីក្រសួងអប់រំយុវជននិងកីឡាបានថ្លែងថា៖ «ក្រុមប្រឹក្សាអូឡាំពិកអាស៊ីនឹងមកទស្សនកិច្ចប្រទេសឥណ្ឌូណេស៊ីនៅថ្ងៃទី៥ ឧសភា ដើម្បីស្វែងយល់ថាតើយើងបានត្រៀមខ្លួនហើយឬនៅ ។ យើងនឹងបង្ហាញពីការរៀបចំខ្លួនរួចរាល់ក្នុងការធ្វើម្ចាស់ផ្ទះកីឡានេះ» ។ លោករដ្ឋមន្ត្រីបានបន្ថែមថា ឥណ្ឌូណេស៊ីបានទទួលនូវការផ្តល់ជូនពីក្រុមប្រឹក្សាប្រតិបត្តិ OCAក្រោយពីប្រទេសវៀតណាមដែលជាអ្នកជាប់ជម្រើសប្រកាសបោះបង់ចោលឱកាសដោយមូលហេតុសេដ្ឋកិច្ច ។
កាលពីថ្ងៃទី៨ ខែវិច្ឆិកា ឆ្នាំ ២០១២ ទីក្រុងហាណូយរបស់ប្រទេសវៀតណាមត្រូវបានជ្រើសរើសឱ្យធ្វើជាម្ចាស់ផ្ទះកីឡាអាស៊ីហ្គេមឆ្នាំ២០១៩ អំឡុងការបោះឆ្នោតរៀបចំដោយ OCA ។ ក្រុងហាណូយទទួលបានសំឡេងឆ្នោតសរុប ២៩សន្លឹកឈ្នះទីក្រុង Surabaya របស់ឥណ្ឌូណេស៊ី។តាមលោក Suryu ទីក្រុងចំនួន២ដែលឥណ្ឌូណេស៊ីគ្រោងនឹងជ្រើសរើសឱ្យរៀបចំការប្រកួតគឺទីក្រុងបាន់ឌុង ស្ថិតក្នុងកោះជ្វាខាងលិច និងទីក្រុងប៉ាឡេមបាង ស្ថិតលើកោះសូម៉ាត្រាខាងត្បូង ។ រដ្ឋមន្ត្រីរូបនេះបានបន្តថា បាន់ឌុងនិងប៉ាឡេមបាង ជាទីក្រុងសក្តានុពលផ្នែកកីឡាដោយមានហេដ្ឋារចនាសម្ព័ន្ធគ្រប់គ្រាន់ ។
សូមបញ្ជាក់ថា ព្រឹត្តិការណ៍កីឡាអាស៊ីហ្គេមត្រូវបានរៀបចំធ្វើរៀងរាល់៤ឆ្នាំម្តង ។ ដោយឡែក ការប្រកួតលើកទី១៨គ្រោងរៀបចំនៅខែវិច្ឆិកានា ឆ្នាំ ២០១៩ ។ ព្រឹត្តិការណ៍ដែលមាន៣៥ប្រភេទកីឡានេះសង្ឃឹមនឹងមានការចូលរួមពីអត្តពលិកចំនួន១ម៉ឺន២ពាន់នាក់មកពី៤៥ប្រទេស ៕
ចែករំលែកព័តមាននេះ