រាជធានីភ្នំពេញ ៖ នៅរសៀលថ្ងៃទី២១ ខែតុលា ឆ្នាំ២០១៩នេះ ក្រសួងយុត្តិធម៌បានបើកកិច្ចប្រជុំពិនិត្យពិភាក្សាសំណើសុំលើកលែងទណ្ឌិតចំនួន៥១២នាក់ សម្រាប់ពិធីបុណ្យអុំទូក។ យោងតាមមន្ត្រីក្រសួងយុត្តិធម៌បានឲ្យដឹងថា នៅរសៀលម៉ោង២និង៣០នាទី ថ្ងៃទី២១ ខែតុលានេះ នាទីស្តីការក្រសួងយុត្តិធម៌ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងដឹកនាំកិច្ចប្រជុំគណៈកម្មការជាតិ ដើម្បីពិនិត្យបញ្ជីស្នើសុំបន្ធូរបន្ថយទោស និងលើកលែងទោសដល់ទណ្ឌិតក្នុងឱកាសពិធីបុណ្យអុំទូកបណ្តែតប្រទីបសំពះព្រះខែ និងអកអំបុក(តាំងតុ) ដែលប្រព្រឹត្តទៅនាថ្ងៃទី១០-១១ និង១២ ខែវិចិ្ឆកាខាងមុខនេះ ។
មន្ត្រីដដែលបានឲ្យដឹងទៀតថា កិច្ចប្រជុំពិនិត្យលើបញ្ជីស្នើសុំបន្ធូរបន្ថយទោស និងលើកលែងទោសពីពន្ធនាគាររាជធានី-ខេត្ត ចំនួន២៣ និងពីមណ្ឌលអប់រំកែប្រែចំនួន៤ ដោយមានទណ្ឌិតសរុប ៥១២នាក់ (ស្រី៥៨នាក់) ។
លោក សុច សុផាន់ណារ៉ា អគ្គនាយករងនៃអគ្គនាយកដ្ឋានកិច្ចការអយ្យការ និងព្រហ្មទណ្ឌ ក្រសួងយុត្តិធម៌ធ្លាប់បានឲ្យដឹងថា ការលើកលែងទោសនេះ គឺផ្តោតសំខាន់លើទណ្ឌិតណាដែលបានកែប្រែខ្លួនបានល្អតាមបណ្តារាជធានីខេត្តក្រុង ដែលគាត់ជាគម្រូនៅក្នុងពន្ធនាគារ ហើយបានអនុវត្តស្របតាមបទដ្ឋាននៅក្នុងពន្ធនាគារដែលធ្វើឱ្យខាងពន្ធនាគារស្នើសុំបន្ធូរ បន្ថយទោស និងលើកលែងទោស ៕ កែសម្រួលដោយ ៖ សុឃាក់
ចែករំលែកព័តមាននេះ