ប្រទេសអង់គ្លេស ៖ មនុស្សប្រមាណជា១លាននាក់បើតាមពួកអ្នករៀបចំ បាននាំគ្នាធ្វើបាតុកម្មកាលពីថ្ងៃទី១៩តុលានៅទីក្រុងឡុងដ៏ ដើម្បីទាមទារឲ្យមានការបោះប្រជាមតិថ្មី លើការចាកចេញរបស់អង់គ្លេសពីសហភាពអឺរ៉ុបហៅBREXIT។
តាមTWITTERចលនាPEOPLE’S VOTEសរសេរថា នេះជាការប្រមូលផ្ដុំមនុស្សដើរហើរក្បួនដល់ទៅ១លាននាក់ ដើម្បីឲ្យមានការបោះប្រជាមតិលើកទី២ស្ដីពីBREXIT ខណៈសល់ពេលតែ១២ថ្ងៃទៀតដល់កាលបរិច្ឆេទដែលបានគ្រោងទុក សម្រាប់ការចាកចេញពីសហភាពអឺរ៉ុប។ ជាង៣ឆ្នាំហើយក្រោយការបោះប្រជាមតិស្ដីពីBREXIT ការបោះប្រជាមតិលើកទី២គឺជាមធ្យោបាយតែមួយគត់ដើម្បីរំលាយចោលការសម្រេចរបស់ការបោះប្រជាមតិលើកមុន។
ច្បាប់របស់អង់គ្លេសដែលចាប់បង្ខំនាយករដ្ឋមន្ត្រីលោកបូរីសចនសុន ឲ្យពន្យារពេលBREXITចែងថា ប្រសិនបើគ្មានកិច្ចព្រមព្រៀងណាមួយត្រូវបានអនុម័តដោយបណ្ដាសមាជិកសភានាថ្ងៃទី១៩តុលាទេ នោះនាយករដ្ឋមន្ត្រីត្រូវប្រកាសពីការពន្យារពេលBREXITរហូតដល់ថ្ងៃទី៣១មករាឆ្នាំ២០២០។ នាយករដ្ឋមន្ត្រីដែលសន្យាធ្វើឲ្យសម្រេចBREXITត្រឹមថ្ងៃទី៣១តុលា បានប្រឆាំងរាល់ការពន្យារពេលទៀតដែលដំបូងគ្រោងនាថ្ងៃទី២៩មីនា តែត្រូវបានពន្យារពេល២លើករួចមកហើយ។
សភាអង់គ្លេសកាលពីថ្ងៃទី១៩តុលា បានបោះឆ្នោតប្រឆាំងកិច្ចព្រមព្រៀងថ្មី ដែលនាយករដ្ខមន្ត្រីសម្រេចបានជាមួយសហភាពអឺរ៉ុបកាលពីសប្ដាហ៍មុន។ ការអនុម័តបែបនេះនាំំឲ្យពួកអ្នកមិនគាំទ្រ BREXITច្រើនពាន់នាក់សម្ដែងក្ដីរីករាយទះដៃសាទរ ហើយលើកគ្នាធ្វើបាតុកម្មនៅមុខសភាទាមទារឲ្យមានការបោះប្រជាមតិលើកទី២៕ (កែសម្រួលដោយ ៖ បុប្ផា)
ចែករំលែកព័តមាននេះ