ទីក្រុងវ៉ាស៊ីនតោន៖ អែហ្វប៊ីអាយថ្លែងថាភ្នាក់ងារសម្ងាត់រុស្ស៊ីមានផែនការធ្វើឃាតជាច្រើនករណីនៅលើទឹកដីអាមេរិក និងអឺរ៉ុបនូវអ្នកដែលគាំទ្រអ៊ុយក្រែន។ ប៉ុន្តែផែនការទាំងនោះត្រូវបានទប់ស្កាត់ទាន់ពេលវេលា។ ជាក់ស្ដែងករណីប៉ុនប៉ងធ្វើឃាតជនជាតិរុស្ស៊ីដ៏ល្បីម្នាក់ដែលជាអ្នកប្រឆាំងនឹងរដ្ឋអំណាចរុស្ស៊ី និងកំពុងរស់នៅទីក្រុងវ៉ាស៊ីនតោនក៏ត្រូវបានទប់ស្កាត់ផងដែរ។ មនុស្ស៥នាក់ដែលត្រូវបានអែហ្វប៊ីអាយសន្មតថាកំពុងរស់នៅឯបរទេសត្រូវបានចោទប្រកាន់ទៅតុលាការពីបទរៀបចំផែនការធ្វើឃាត។ នេះបើយោងតាមសេចក្ដីចោទប្រកាន់ដែលដាក់តម្កល់នៅតុលាការសហព័ន្ធប្រចាំសង្កាត់ម៉ាន់ហាថាន់។
ការចោទប្រកាន់នោះមានសេចក្ដីជាអាទិ៍ថា «បណ្ដាញចារកម្មរបស់រុស្ស៊ីបានជួលលុយ ឬព្យាយាមជួលមនុស្សនៅអាមេរិក និងនៅប្រទេសដទៃទៀតចាប់តាំងពីឆ្នាំ២០២៤ដើម្បីតាមដាន និងធ្វើឃាតជនជាតិរុស្ស៊ីដែលជាក្រុមប្រឆាំង។ ជនដែលត្រូវរុស្ស៊ីទាក់ទងនោះក៏មានភារកិច្ចប្រព្រឹត្តអំពើភេរវកម្មបំផ្លិចបំផ្លាញហេដ្ឋារចនាសម្ព័ន្ធស៊ីវិល និងយោធានៅបណ្ដាប្រទេសអឺរ៉ុបដែលជាសម្ព័ន្ធមិត្តរបស់អ៊ុយក្រែនផងដែរ។ ប្រធានអែហ្វប៊ីអាយប្រចាំទីក្រុងញូយ៉កថ្លែងថាស្ថាប័នរបស់ខ្លួនបានទប់ស្កាត់ផែនការទុច្ចរិតទាំងនោះក្រោមកិច្ចសហការគ្នាយ៉ាងដុតដៃដុតជើង ខណៈដែលក្រុមចារកម្មរុស្ស៊ី និងបក្សពួករបស់ពួកគេរួមគំនិតប្រព្រឹត្តអំពើបំភិតបំភ័យ គំរាមកំហែង ឬធ្វើឃាតមនុស្សនៅលើទឹកដីអាមេរិក និងទីកន្លែងដទៃទៀត។
ប្រធានអែហ្វប៊ីអាយប្រចាំទីក្រុងវ៉ាស៊ីនតោនថ្លែងថាអែហ្វប៊ីអាយនៅតាមរដ្ឋផ្សេងៗគ្នាបានសហការគ្នាយ៉ាងល្អដើម្បីទប់ស្កាត់ផែនការអាក្រក់ទាំងនោះទាន់ពេលវេលា។ យោងតាមរបាយការណ៍សម្ងាត់នោះ បណ្ដាញនៃក្រុមឧក្រិដ្ឋជនដែលធ្វើការឱ្យភ្នាក់ងារចារកម្មរុស្ស៊ីចាប់តាំងពីឆ្នាំ២០២៤បានរួមគំនិតប្រព្រឹត្តអំពើវាយប្រហារ និងធ្វើឃាតមនុស្សនៅទូទាំងសាកលលោករួមទាំងនៅប្រទេសអាមេរិកផងដែរ។ កាលពីមុននេះ រុស្ស៊ីច្រើនផ្ដោតសំខាន់លើការចាត់ការក្រុមប្រឆាំង ឬក្រុមផ្ដាច់ខ្លួនទៅចុះចូលជាមួយប្រទេសដទៃ។ ប៉ុន្តែចាប់តាំងពីសង្គ្រាមអ៊ុយក្រែនផ្ទុះឡើងកាលពីឆ្នាំ២០២២ រុស្ស៊ីច្រើនចាត់ការក្រុមប្រទេសដែលមានសម្ព័ន្ធភាពជាមួយអ៊ុយក្រែន។
ថ្មីៗនេះ សមាជិកនៃបណ្ដាញឧក្រិដ្ឋជនទាំងនេះព្យាយាមទាក់ទងមនុស្សនៅអាមេរិក។ រដ្ឋអាជ្ញាអាមេរិកថ្លែងថាអ្នកដែលត្រូវបានចោទប្រកាន់ទៅតុលាការលើកនេះបានរួមគំនិតបង្កវិច្ឆេទកម្មនៅទូទាំងសាកលលោក។ នៅក្នុងចំណោមជនត្រូវចោទទាំងនោះ បីនាក់ជាសមាជិកជាន់ខ្ពស់នៃចារកម្មរុស្ស៊ី។ ទី១-ឈ្មោះយូរី ក្រាមីវ (Yuri Khrameev) ជាអតីតវរសេនីយ៍ឯកនៅក្នុងចារកម្មរុស្ស៊ី, ទី២-កូនប្រុសគាត់ឈ្មោះគីរីល ក្រាមីវ (Kirill Khrameev) ជាមន្ត្រីនៃសេវាសន្តិសុខសហព័ន្ធរុស្ស៊ី និងទី៣-អូអេមីស រ៉ូម៉ាហ្គោហ្សា ឌូរូតធី (Oemis Romagoza Durruthy) ជាជនជាតិគុយបា និងជាសមាជិកដ៏មានឥទ្ធិពលមួយរូបនៃចលនាគុយបានៅប្រទេសរុស្ស៊ី៕ ប្រភព៖ AP
ចែករំលែកព័តមាននេះ