ខេត្តកំពង់ឆ្នាំង៖ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ អញ្ជើញជាសហអធិបតីរួមជាមួយ ឯកឧត្តម ស៊ុន សុវណ្ណារិទ្ធ អភិបាល នៃគណៈអភិបាលខេត្តកំពង់ឆ្នាំង ក្នុងកិច្ចប្រជុំស្ដីពី “ការលើកកម្ពស់ឥរិយាបថ និងទំនាក់ទំនងការងារ នៅកន្លែងធ្វើការ” នារសៀលថ្ងៃទី១៥ ខែកញ្ញា ឆ្នាំ២០២៦ នៅសាខាបេឡាជាតិសន្តិសុខសង្គមខេត្តកំពង់ឆ្នាំង ស្នាក់ការស្រុកកំពង់ត្រឡាច ដោយមានការចូលរួមពីតំណាងសហគ្រាស ក្រុមហ៊ុន និងរោងចក្រជាង ២០០នាក់ មកពីខេត្តកំពង់ឆ្នាំង និងខេត្តពោធិ៍សាត់។ កិច្ចប្រជុំនេះមានគោលបំណងពង្រឹងការយល់ដឹងអំពីការគ្រប់គ្រងប្រកបដោយប្រសិទ្ធភាព ការប្រាស្រ័យទាក់ទងដោយវិជ្ជាជីវៈ ការគោរពសេចក្ដីថ្លៃថ្នូររបស់គ្នាទៅវិញទៅមក និងការលើកកម្ពស់ផលិតភាពការងារ និងស្ថិរភាពការងារ ។
ក្នុងឱកាសនោះ ឯកឧត្តមរដ្ឋមន្ត្រីបានគូសបញ្ជាក់ពីសារៈសំខាន់នៃការកសាងបរិយាកាសការងារដែលមានការគោរពគ្នាទៅវិញទៅមក ការប្រាស្រ័យទាក់ទងប្រកបដោយវិជ្ជាជីវៈ ដោយចៀសវាងការប្រើពាក្យសម្ដី ឥរិយាបថ ឬសកម្មភាពមិនសមរម្យ ដែលអាចប៉ះពាល់ដល់សេចក្ដីថ្លៃថ្នូរ ទំនាក់ទំនងការងារ និងបរិយាកាសនៅកន្លែងធ្វើការ។ ទាំងនិយោជក អ្នកគ្រប់គ្រង បងប្អូនកម្មករនិយោជិត ត្រូវចូលរួមលើកកម្ពស់ការអនុវត្តច្បាប់ បទបញ្ជាផ្ទៃក្នុងដោយស្មើភាព និងសមស្រប។ ចំពោះជនបរទេសដែលធ្វើការនៅកម្ពុជា ត្រូវបំពេញលក្ខខណ្ឌការងារស្របតាមច្បាប់ ព្រមទាំងឈ្វេងយល់ គោរពវប្បធម៌ ទំនៀមទម្លាប់ និងសេចក្ដីថ្លៃថ្នូររបស់អ្នកដទៃ ។
ជាមួយគ្នានេះ ឯកឧត្តមរដ្ឋមន្ត្រីបានណែនាំឱ្យសហគ្រាស ក្រុមហ៊ុន រោងចក្រ ពង្រឹងគោលការណ៍ យន្តការផ្ទៃក្នុង សម្រាប់ការប្រាស្រ័យទាក់ទងដោយការគោរព បណ្ដុះបណ្ដាលអ្នកគ្រប់គ្រង និងបុគ្គលិកពាក់ព័ន្ធ ព្រមទាំងរៀបចំយន្តការទទួល ដោះស្រាយបណ្ដឹង ដើម្បីបង្ការនិងដោះស្រាយបញ្ហាបានទាន់ពេលវេលា ប្រកបដោយប្រសិទ្ធភាព។ បន្ថែមពីនេះ អ្នកគ្រប់គ្រង អ្នកបកប្រែ ជាពិសេសជនបរទេស ត្រូវបានលើកទឹកចិត្ត ឱ្យចូលរួមវគ្គបណ្ដុះបណ្ដាលរបស់វិទ្យាស្ថានជាតិការងារ ដើម្បីសិក្សាឈ្វេងយល់អំពីច្បាប់ស្ដីពីការងារ ដែលក្រសួងបានបកប្រែជា ៤ភាសា រួមមាន ភាសាអង់គ្លេស ចិន កូរ៉េ និងជប៉ុន ដើម្បីបង្កើនការយល់ដឹងអំពីសិទ្ធិ កាតព្វកិច្ច លើកកម្ពស់វប្បធម៌អនុលោមភាព រួមចំណែកធានាសុខដុមរមនា នៃទំនាក់ទំនងវិជ្ជាជីវៈ សំដៅសម្រេចបាន សហគ្រាសមួយជាសហគមន៍សុខសាន្តមួយ ។
ជាពិសេស ឯកឧត្តមរដ្ឋមន្ត្រីបានជំរុញឱ្យអ្នកគ្រប់គ្រង និងបុគ្គលិកទទួលបន្ទុកផ្នែករដ្ឋបាលនិងធនធានមនុស្ស ចូលរួមវគ្គបណ្ដុះបណ្ដាលនៅវិទ្យាស្ថានជាតិការងារ ដើម្បីពង្រឹងចំណេះដឹង ជំនាញ ការយល់ដឹងអំពីច្បាប់ បទប្បញ្ញត្តិពាក់ព័ន្ធ ដែលជាលក្ខខណ្ឌតម្រូវ សម្រាប់ការបំពេញមុខងារជាបុគ្គលិកទទួលបន្ទុកផ្នែករដ្ឋបាលនិងធនធានមនុស្ស ។
ទន្ទឹមនេះ ឯកឧត្តមរដ្ឋមន្ត្រី ក៏បានអំពាវនាវដល់ម្ចាស់ នាយកសហគ្រាស អ្នកគ្រប់គ្រង ឱ្យយកចិត្តទុកដាក់ពិនិត្យ ពង្រឹងប្រព័ន្ធគ្រប់គ្រងជាប្រចាំ ជាពិសេសការគ្រប់គ្រងធនធានមនុស្ស ការប្រាស្រ័យទាក់ទងនៅគ្រប់កម្រិត និងការដោះស្រាយបញ្ហាតាំងពីដំណាក់កាលដំបូង។ ក្រសួងនឹងបន្តសហការជាមួយរដ្ឋបាលខេត្ត មន្ទីរការងារនិងបណ្ដុះបណ្ដាលវិជ្ជាជីវៈ សមាគមនិយោជក សហជីព ភាគីពាក់ព័ន្ធ ដើម្បីពង្រឹងការអនុវត្តច្បាប់ លើកកម្ពស់សុខដុមនីយកម្ម នៃទំនាក់ទំនងវិជ្ជាជីវៈ រួមគ្នាកសាងបរិយាកាសការងារប្រកបដោយសុវត្ថិភាព វិន័យ ការគោរពគ្នាទៅវិញទៅមក កិច្ចសហប្រតិបត្តិការល្អ សំដៅលើកកម្ពស់ផលិតភាព រក្សាស្ថិរភាពការងារ រួមចំណែកដល់ការអភិវឌ្ឍប្រកបដោយចីរភាព ៕ អត្ថបទសហការ
ចែករំលែកព័តមាននេះ