អាជ្ញាធរស្រុកកំពង់ត្រឡាច ព្រមានបិទការលក់ដូរមុខកងពលលេខ១ បើអាជីវករនៅតែបំពានសណ្តាប់ធ្នាប់ និងអនាម័យ
- កំពង់ឆ្នាំង
ខេត្តកំពង់ឆ្នាំង ៖ អាជ្ញាធរស្រុកកំពង់ត្រឡាច បានព្រមានដល់អាជីវករដែលលក់ដូរនៅទីតាំងមុខកងពលលេខ១ (ចំណុចដីឡូត៍ឈ្មោះ ង៉ូ ហេងជុំ និងឈ្មោះ ជិន ចាន់សា) ស្ថិតក្នុងភូមិអន្លង់ត្នោត ឃុំល្វែក ស្រុកកំពង់ត្រឡាច ខេត្តកំពង់ឆ្នាំង អាចប្រឈមមុខផ្អាកមិនឱ្យមានការលក់ដូរនៅទីនោះតែម្តង បើសិនជាមិនចូលរួមអនុវត្តតាមការណែនាំរបស់អាជ្ញាធរ។
ចំណាត់ការនេះ ក្រោយពីលោក វន ស៊ីផា អភិបាលនៃគណៈអភិបាលស្រុកកំពង់ត្រឡាច នៅថ្ងៃទី១៣ ខែកញ្ញា ឆ្នាំ២០២៦ បានចាត់ឱ្យក្រុមការងារមានលោក សាយ ប៊ុនថេង និងលោក កើ ម៉ាត់ អភិបាលរងស្រុក បានដឹកនាំកងកម្លាំងសមត្ថកិច្ច និងអាជ្ញាធរមូលដ្ឋាន ចុះពិនិត្យ និងរៀបចំសណ្តាប់ធ្នាប់ អនាម័យបរិស្ថាន នៅទីតាំងខាងលើ ។
ដោយក្នុងនោះ ពិនិត្យឃើញថា មានបញ្ហាប្រឈមមួយចំនួនដូចជា ៖ កន្លងមក អាជីវករភាគច្រើនមិនបានវេចខ្ចប់សំរាម ថង់ប្លាស្ទិក ឬដបទឹកឱ្យបានត្រឹមត្រូវ ក្រោយពេលលក់ដូររួចឡើយ ។ ខ្វះសណ្តាប់ធ្នាប់ ដោយការរៀបចំតុ គ្រែ និងតូបលក់ដូរត្រូវបានទុកចោលរញ៉េរញ៉ៃ រំលោភលើចិញ្ចើមផ្លូវសាធារណៈ ទោះជាមានការអប់រំណែនាំជាច្រើនលើកពីអាជ្ញាធរឃុំ-ភូមិក៏ដោយ ។
អាជ្ញាធរស្រុកបញ្ជាក់ថា ទីតាំងនេះជាប្រភពចំណូលដ៏សំខាន់សម្រាប់បម្រើឱ្យកម្មករ-កម្មការិនី មុន និងក្រោយម៉ោងធ្វើការ ។ ដូច្នេះ គណៈបញ្ជាការឯកភាពរដ្ឋបាលស្រុក ស្នើសុំឱ្យអាជីវករទាំងអស់ចូលរួមសម្អាតបរិស្ថាន រៀបចំតូប និងវេចខ្ចប់សំរាមឱ្យបានស្អាតបាត ដើម្បីលើកកម្ពស់សោភ័ណភាព ទាក់ទាញអតិថិជន និងការពារសុខភាពទាំងអស់គ្នា ។
ប្រសិន អាជីវករនៅតែបន្តល្មើស ហើយមិនព្រមចូលរួមអនុវត្តតាមការណែនាំ អាជ្ញាធរនិងចាត់វិធានការក្តៅផ្អាកការលក់ដូរនៅទីនោះតែម្តង ៕
ចែករំលែកព័តមាននេះ