ទើបចេញពីពន្ធនាគារមិនរាងចាល! មុខសញ្ញាយ៉ាងសកម្ម ២នាក់ ត្រូវចាប់ខ្លួនជាថ្មី ជាមួយវត្ថុតាងលុយក្លែ.ងក្លាយ និងទូរស័ព្ទដៃ
- កំពង់ស្ពឺ
ខេត្តកំពង់ស្ពឺ ៖ ជនសង្ស័យចំនួន២នាក់ជាមុខសញ្ញា និងទើបចេញពីពន្ធនាគារមិនរាងចាល តែងតែធ្វើសកម្មភាពលួចទ្រព្យសម្បត្តិ និងសម្ភាររបស់ប្រជាពលរដ្ឋយ៉ាងសកម្ម ត្រូវបានកម្លាំងនគរបាលស្រុកសាមគ្គីមុនីជ័យ ធ្វើការស្រាវជ្រាវឃាត់ខ្លួនបាន ក្រោយពីនគរបាលទទួលបានពាក្យបណ្តឹងរបស់ប្រជាពលរដ្ឋ។
ការឃាត់ខ្លួនក្រុមជនសង្ស័យជាមុខសញ្ញាលួចទ្រព្យសម្បត្តិរបស់ប្រជាពលរដ្ឋយ៉ាងសកម្ម បានធ្វើឡើងកាលពីល្ងាចថ្ងៃទី១៤ ខែកញ្ញា ឆ្នាំ២០២៦ នៅក្នុងភូមិកណ្តក់ ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យ បាននិយាយឱ្យដឹងថា ក្រុមជនសង្ស័យដែលនគរបាលឃាត់ខ្លួនបានរួមមាន ទី១- ឈ្មោះ ឡេង កែវ ហៅ(ប៉ោង) ភេទប្រុស អាយុ២៧ឆ្នាំ មុខរបរមិនពិតប្រាកដ រស់នៅក្នុងភូមិកណ្តក់ ឃុំព្រៃក្រសាំង ស្រុកសាមគ្គីមុនីជ័យ និងទី២- ឈ្មោះ វ៉ាន់ វុទ្ធី ហៅ(ហៅវ៉ិច) ភេទប្រុស អាយុ៣១ឆ្នាំ មុខរបរមិនពិតប្រាកដ រស់នៅក្នុងភូមិថ្មីទម្លាប់ ឃុំចាន់សែន ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យបានបន្តឲ្យដឹងទៀតថា នៅមុនពេលឃាត់ខ្លួនក្រុមជនសង្ស័យ គឺដោយអនុវត្តតាមការដឹកនាំបញ្ជាដ៏ខ្ពង់ខ្ពស់ ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងបញ្ជាដោយផ្ទាល់ពីលោកវរសេនីយ៍ទោ សាវ សុភក្តី អធិការនៃអធិការដ្ឋាននគរបាលស្រុកសាមគ្គីមុនីជ័យ នៅវេលាម៉ោង៤និង៣០នាទីរសៀលថ្ងៃទី ១៤ ខែកញ្ញា ឆ្នាំ២០២៦ នៅចំនុចភូមិសាស្ត្រ ឃុំក្រាំងចេក និងឃុំចាន់សែន ស្រុកសាមគ្គីមុនីជ័យ កម្លាំងជំនាញនៃអធិការដ្ឋាននគរបាលស្រុកសាមគ្គីមុនីជ័យ បានធ្វើការស្រាវជ្រាវ និងឈានទៅធ្វើការឃាត់ខ្លួនមុខសញ្ញាចោរកម្មចំនួន២នាក់ ដែលប្រជាពលរដ្ឋរស់នៅឃុំ ក្រាំងចេក ឃុំព្រៃក្រសាំង និងឃុំចាន់សែន ក្នុងស្រុកសាមគ្គីមុនីជ័យ បានរាយការណ៍ថា ក្រុមជនសង្ស័យតែងតែធ្វើសកម្មភាព លួចទ្រព្យសម្បត្តិ និងសម្ភារមិនរើស (លួចលក្ខណៈជាអាជីពទៅហើយ) និងជាមុខសញ្ញាទើបចេញពីពន្ធនាគារពាក់ព័ន្ធនឹងករណីចោរកម្មទាំង២នាក់ផងដែរ។
នគរបាលស្រុកសាមគ្គីមុនីជ័យ បានបន្តឲ្យដឹងទៀតថា ក្រោយឃាត់ខ្លួនក្រុមជនសង្ស័យជាមុខសញ្ញាខាងលើ ដកហូតបានវត្ថុតាងរួមមានលុយក្លែងក្លាយក្រដាសប្រាក់៥ម៉ឺនរៀល ចំនួន១១សន្លឹក និងទូរស័ព្ទដៃ ដែលលួចបានចំនួន១គ្រឿង។
តាមការបញ្ជាក់របស់ជនសង្ស័យឈ្មោះ ឡេង កែវ ហៅ(ប៉ោង) ភេទប្រុស អាយុ២៧ឆ្នាំ រស់នៅក្នុងភូមិកណ្តក់ ឃុំព្រៃក្រសាំង ស្រុកសាមគ្គីមុនីជ័យ (ឆ្លើយសារភាពថា រូបគេធ្លាប់ធ្វើសកម្មភាពលួចមាន់របស់ប្រជាពលរដ្ឋបានសម្រេចចំនួន៦លើក) ហើយឈ្មោះ វ៉ាន់ វុទ្ធី ហៅ(ហៅវ៉ិច) ភេទប្រុស អាយុ៣១ឆ្នាំ រស់នៅក្នុងភូមិថ្មីទម្លាប់ ឃុំចាន់សែន ស្រុកសាមគ្គីមុនីជ័យ បានឆ្លើយសារភាពថា រូបគេធ្លាប់បានធ្វើសកម្មភាពលួចទូរស័ព្ទដៃ លួចសត្វមាន់ លួចអង្ករ និងលួចសម្ភារ:ផ្សេងៗរបស់ប្រជាពលរដ្ឋជាច្រើនថែមទៀតផង ។ ទើបតែចេញពីពន្ធនាគារ។ ជនសង្ស័យជាមុខសញ្ញាទាំង២នាក់ខាងលើ ជាមុខសញ្ញាដែលប្រើប្រាស់គ្រឿងញៀនថែមទៀតផង។
នគរបាលស្រុកសាមគ្គីមុនីជ័យ បានបញ្ជាក់ឱ្យដឹងថា ក្រោយឃាត់ខ្លួនក្រុមជនសង្ស័យ ត្រូវបាននគរបាលកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ