រាជធានីភ្នំពេញ ៖ ករណីអគ្គិភ័យឆាបឆេះផ្ទះប្រជាពលរដ្ឋមួយកន្លែងយ៉ាងសន្ធោសន្ធៅ នៅចំណុចជាន់ទី២ បណ្តាលឲ្យរងការខូចខាតសម្ភារៈមួយចំនួនធំ ។
ករណីអគ្គិភ័យនេះ បានកើតឡើងកាលពីវេលាម៉ោង០៣និង៣៥នាទីរសៀល ថ្ងៃទី១៥ ខែកញ្ញា ឆ្នាំ២០២៦ នៅតាមបណ្តោយផ្លូវលេខ២៨៦ ស្ថិតក្នុងមូលដ្ឋានសង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានឱ្យដឹងថា មុនពេលកើតហេតុ គេបានឃើញផ្សែងខ្មៅហុយចេញយ៉ាងខ្លាំង ព្រមទាំងមានអណ្តាតភ្លើងចាប់ផ្តើមឆាបឆេះចេញពីបន្ទប់ដេកនៅជាន់ទី២។ ដោយសារអណ្តាតភ្លើងឆេះរាលដាលលឿនពេក និងមានសម្ភារៈងាយឆេះជាច្រើន ប្រជាពលរដ្ឋ និងអ្នកជិតខាងមិនអាចប្រើប្រាស់បំពង់ពន្លត់អគ្គិភ័យតូចៗដើម្បីទប់ស្កាត់ទាន់ពេលវេលានោះឡើយ ទើបប្រញាប់ប្រញាល់រាយការណ៍ជូនអាជ្ញាធរ និងសមត្ថកិច្ចមូលដ្ឋានភ្លាមៗ ដើម្បីហៅរថយន្តពន្លត់អគ្គិភ័យមកជួយអន្តរាគមន៍ ។
សមត្ថកិច្ចនគរបាល បានបញ្ជាក់ឱ្យដឹងថា បន្ទាប់ពីកម្លាំងជំនាញបានចុះទៅដល់ទីតាំងកើតហេតុ គេឃើញថា ផ្ទះខាងលើទើបតែរៀបចំដេគ័រ ផ្នែកខាងក្នុងរួចរាល់ ដូច្នេះដែលទើបសម្បូរទៅដោយក្តារកុងផ្លាកកេ ជាហេតុបង្កឱ្យមានផ្សែងហុយយ៉ាងខ្លាំង និងបង្កការលំបាកដល់ប្រតិបត្តិការបាញ់ពន្លត់។ ទោះជាយ៉ាងណា កម្លាំងសមត្ថកិច្ចជំនាញបានខិតខំពន្លត់យ៉ាងយកចិត្តទុកដាក់ និងគ្រប់គ្រងស្ថានការណ៍បានទាំងស្រុង ។
អគ្គិភ័យនេះបានឆាបឆេះបំផ្លាញសម្ភារៈនៅជាន់ទី២ នៃផ្ទះថ្មស្ទើរទាំងស្រុង ប៉ុន្តែជាសំណាងល្អ មិនបានបណ្តាលឱ្យនរណាម្នាក់រងរបួស ឬគ្រោះថ្នាក់ដល់ជីវិតនោះទេ ។
ក្នុងប្រតិបត្តិការនេះ មានការចូលរួមអន្តរាគមន៍បាញ់ពន្លត់ពីរថយន្តពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ ,រថយន្តពន្លត់អគ្គិភ័យជំនួយពី បុរីប៉េងហួត, ទីក្រុងអូឡាំព្យា, ទីក្រុងកោះពេជ្រ និងក្រុមហ៊ុនស្រាបៀរកម្ពុជា ជាច្រើនគ្រឿង រហូតភ្លើងរលត់ទៅវិញជាស្ថាពរ ។ ចំពោះមូលហេតុពិតប្រាកដ និងទំហំនៃការខូចខាតសរុប សមត្ថកិច្ចជំនាញកំពុងបន្តធ្វើការស្រាវជ្រាវ ៕
ចែករំលែកព័តមាននេះ