ខេត្តស្ទឹងត្រែង ៖ រដ្ឋបាលខេត្តស្ទឹងត្រែង ដឹកនាំដោយលោក សរ សុពុត្រា អភិបាល នៃគណៈអភិបាលខេត្តស្ទឹងត្រែង នាថ្ងៃទី១៥ ខែកញ្ញា ឆ្នាំ២០២៦ បានចុះពិនិត្យទីតាំងមន្ទីរសន្តិសុខ ១០៤ ត្រពាំងចោងហោង ដាក់ក្រោមការគ្រប់គ្រងវប្បធម៌ គ្រោងធ្វើកំណាយអដ្ឋិធាតុ និងបង្កើតបូជនីយដ្ឋានប្រវត្តិសាស្ត្រ ។
ដីប្រវត្តិសាស្ត្រខាងលើ ជាប្រវត្តិ នៃការចង់ចាំ ដែលរំលេចដោយសោកនាដកម្មសម័យខ្មែរក្រហម គឺបូជនីយដ្ឋានចងចាំឧក្រិដ្ឋកម្ម «ត្រពាំងចោងហោង» ឬមណ្ឌលឧក្រិដ្ឋកម្មត្រពាំងចោងហោង (មន្ទីរសន្តិសុខ ១០៤) ស្ថិតក្នុងភូមិរាជានុកូល សង្កាត់ក្រុងស្ទឹងត្រែង ក្រុង និងខេត្តស្ទឹងត្រែង ត្រូវបានរំដោះយកមកវិញ និងដាក់ឱ្យស្ថិតក្រោមការគ្រប់គ្រងផ្លូវការរបស់មន្ទីរវប្បធម៌ និងវិចិត្រសិល្បៈខេត្ត ។
យោងតាមផេកផ្លូវរបស់លោក សរ សុពុត្រា អភិបាលខេត្តស្ទឹងត្រែង ចេញផ្សាយនាថ្ងៃទី១៥ ខែកញ្ញា ឆ្នាំ២០២៦ បានឱ្យដឹងថា រដ្ឋបាលខេត្តបានដាក់លិខិត ផ្លូវការទៅក្រសួងវប្បធម៌ និងវិចិត្រសិល្បៈ ដើម្បីស្នើសុំកិច្ចអន្តរាគមន៍ពីមន្ត្រីជំនាញ ចុះធ្វើកំណាយរុករកអដ្ឋិធាតុជនរងគ្រោះដែលកប់តាមរណ្តៅនានា ក្នុងបរិវេណបូជនីយដ្ឋាននេះ យកមក្សាទុកដោយក្តីគោរព និងរៀបចំពិធីបុណ្យកុសលតាមទំនៀមទម្លាប់ប្រពៃណីខ្មែរ ។
បន្ថែមពីលើកិច្ចការរុករកអដ្ឋិធាតុ រដ្ឋបាលខេត្តស្ទឹងត្រែង គ្រោងដាក់ចេញនូវផែនការយុទ្ធសាស្ត្រអភិវឌ្ឍន៍ទីតាំងនេះជាបន្តបន្ទាប់ (ក្រោយកំណាយរួចរាល់) ៖ ស្ថាបនាស្តូបគោរពវិញ្ញាណក្ខន្ធ ជនរងគ្រោះក្នុងរបបប្រល័យពូជសាសន៍កម្ពុជាប្រជាធិបតេយ្យ ។
កំណត់ជាទីតាំងវេទិកា រៀបចំទិវាជាតិ នៃការចងចាំ ២០ ឧសភា។ ប្រែក្លាយជាតំបន់ទេសចរណ៍ប្រវត្តិសាស្ត្រ ដើម្បីរំលឹកនិងបញ្ជ្រាបការយល់ដឹងពីសោកនាដកម្ម។ បង្កើតជាមជ្ឈមណ្ឌលសិក្សាស្រាវជ្រាវ ប្រវត្តិសាស្ត្រ សម្រាប់សាធារណជន និងយុវជនជំនាន់ក្រោយ ។
អ្នកតាមដានការងារប្រវត្តិសាស្ត្រមើលឃើញថា ការយកចិត្តទុកដាក់រំដោះ និងរៀបចំទីតាំងមន្ទីរសន្តិសុខ ១០៤ នេះ គឺជាជំហានគន្លឹះក្នុងការថែរក្សាភស្តុតាងប្រវត្តិសាស្ត្រ ផ្ដល់កិត្តិយសដល់វិញ្ញាណក្ខន្ធអ្នកស្លាប់ និងពង្រឹងសក្តានុពលទេសចរណ៍ប្រវត្តិសាស្ត្រនៅខេត្តស្ទឹងត្រែង៕
ចែករំលែកព័តមាននេះ