ខេត្តកំពង់ឆ្នាំង ៖ អ្នកភូមិបឹងកក់ ភូមិឡពាង និងភូមិសំរោង ឃុំតាជេស ប្រមាណ៣០នាក់ កាលពីព្រឹកថ្ងៃទី២៨ មេសា បានលើកគ្នាមកសាលាខេត្តកំពង់ឆ្នាំង ដើម្បីសុំធ្វើការតវ៉ាទាមទារដី ឬជាលុយកាក់ពីក្រុមហ៊ុន K.D.C ដោយចោទប្រកាន់ថា មានទំនាស់ដីធ្លីជាមួយគ្នាជាយូរយាណាស់មកហើយ និងបានអះអាងថា ខាងគេម៉េចក៏បាន ឯខាងខ្លួនម៉េចមិនបាន ។
ខេត្តកំពង់ឆ្នាំង ៖ អ្នកភូមិបឹងកក់ ភូមិឡពាង និងភូមិសំរោង ឃុំតាជេស ប្រមាណ៣០នាក់ កាលពីព្រឹកថ្ងៃទី២៨ មេសា បានលើកគ្នាមកសាលាខេត្តកំពង់ឆ្នាំង ដើម្បីសុំធ្វើការតវ៉ាទាមទារដី ឬជាលុយកាក់ពីក្រុមហ៊ុន K.D.C ដោយចោទប្រកាន់ថា មានទំនាស់ដីធ្លីជាមួយគ្នាជាយូរយាណាស់មកហើយ និងបានអះអាងថា ខាងគេម៉េចក៏បាន ឯខាងខ្លួនម៉េចមិនបាន ។
ប៉ុន្តែបើតាមអ្នកដែលបានដឹងពីប្រវត្តិវិវាទនេះ បាននិយាយថា ក្រុមនេះគ្មានលិខិតស្នាមអ្វីដែលអាចបញ្ជាក់ជាផ្លូវការណាមួួយបានឡើយ ។ ការមកតវ៉ានេះ ដោយសារឃើញអ្នកភូមិឡពាងដែលគ្មានដីសោះក្រាញននៀលតវ៉ា បានទទួលប្រាក់គោលនយោបាយពីក្រុមហ៊ុនទទេៗ ងាយស្រួលពេក ដូចត្រូវឆ្នោត ឬដូចទេវតាប្រទាន ។ ទើបលើកគ្នាមកតវ៉ាតាមមេខ្លោងថ្មីម្នាក់ទៀតឈ្មោះ ស្ងួន ញឿន ដែលត្រូវជាបងបង្កើតរបស់ឈ្មោះ ស្ងួន ញេន ហៅ រាជ សីមា ជាមេខ្លោងក្រៅសង្គមដែលតវ៉ាមិនឈប់ ។ ទោះបីមានគណៈកម្មការព្យាយាមសម្របសម្រួលយ៉ាងណាក្តី អាងអីដើរចេញពីកិច្ចប្រជុំពិភាក្សារបស់គណៈកម្មការ ព្រោះមេខ្លោងនេះអត់មានដីមួយចំអាមណាឡើយ ប្រឹងទាមទារដូចចោរចាប់ក្រុមហ៊ុនជម្រិតយកប្រាក់ ។
នៅព្រឹកនោះ ក្រោយពីមានការអនុញ្ញាត គេឃើញឈ្មោះ ស្ងួន ញឿន បានកាន់លិខិតមួយបាច់ធំ អមដំណើរដោយបក្ខពួកពីរបីនាក់ បានចូលទៅដាក់ពាក្យប្តឹងនៅខុទ្ទកាល័យសាលាខេត្ត ហើយខុទ្ទកាល័យបានទទួលយក និងប្រាប់ថា ចាំដាក់ជូនលោកអភិបាលខេត្ត ។ ក្រោយពីត្រឡប់ចេញមកវិញ ឈ្មោះ ស្ងួន ញឿន និងបក្សពួកបានប្រាប់អ្នកកាសែតថា មកដាក់ពាក្យតវ៉ានៅពេលនេះ ព្រោះឃើញមានបង្កើតគណៈកម្មការ ហើយឃើញអ្នកភូមិឡពាងដែលអត់មានដីដូចគ្នា បានទទួលប្រាក់ឧបត្ថម្ភជាគោលនយោបាយពីក្រុមហ៊ុន ទើបពួកគេមកដែរ ក្រែងបានខ្លះ ។ នៅព្រឹកនោះ គេឃើញឈ្មោះ អុំ សុភី ត្រូវជាប្រពន្ធរបស់ឈ្មោះ ស្ងួន ញឿន ដែល២នាក់ប្តីប្រពន្ធជាមេខ្យល់ បានប្រាប់អ្នកកាសែតថា ពួកគាត់ចំនួន៥២គ្រួសារនៅភូមិឡពាង បានដោះស្រាយមួយចំនួនហើយ នៅសល់១៧គ្រួសារទៀត ដែលមិនទាន់បានទទួលការចរចាដោះស្រាយ ។
ពេលអ្នកកាសែតសួរថា ចុះពេលហៅចរចា ម៉េចបានចេះតែងើបចេញ ឈ្មោះ អុំ សុភី បានឆ្លើយថា ការហៅចូលទៅចរចាម្តងម្នាក់បែបនេះមិនអាចទទួលយកបានទេ ពួកគេត្រូវការចរចាជាសាធារណៈ មានការចូលរួមពីប្រជាពលរដ្ឋ ពីអង្គការឈ្មោះ សំ ចាន់គារ ដែលជួញរុញពី ក្រោយ ព្រោះពួកគាត់ខ្លះមិនចេះអក្សរផង គាត់មិនត្រូវការជួបចរចាដោះស្រាយម្តងម្នាក់ទេ ។ អ្នកកាសែតសួរថា មានឯកសារសម្គាល់ដីទេ ពួកគេឆ្លើយថាអត់មានទេ ព្រោះឈ្មោះ ញឿន ធានាថានឹងបានប្រាក់ខ្លះមិនខាន បានជាប្រឹងមិនខ្លាចខ្មាស់គេ ។ ជំុវិញករណីប្រជាពលរដ្ឋបានដាក់ពាក្យប្តឹងចំនួន៤០គ្រួសារនេះ ក្នុងនោះអ្នកភូមិបឹងកក់៣១គ្រួសារ អ្នកភូមិសំរោង៣គ្រួសារ និងអ្នកភូមិឡពាង៦គ្រួសារ សុទ្ធតែជាឈ្មោះថ្មី ឈ្មោះក្រៅបញ្ជី ។ សកម្មភាពអាក្រក់បំផុតនេះត្រូវបានគេដឹងច្បាស់ថា នេះគឺបណ្តាលមកពីឃើញអ្នកភូមិឡពាងមួយភាគធំ បានទទួលប្រាក់គោលនយោបាយពីក្រុមហ៊ុន ដែលអាណិតខ្ជិលរឿងឈ្លោះវែងឆ្ងាយ ម្លេ៉ោះហើយពេលនេះប្រឹងប្រែងមកជាមួយគេដែរ ក្រែងបានខ្លះ ។
ដែលតាមដឹង តាំងពីដើមរៀងមក ក្រុមនេះមិនដែលចេញមុខមកតវ៉ាទេ ។ ហើយបើតាមពាក្យបណ្តឹងវិញបានដាក់ថា បានតវ៉ាតាំងពីឆ្នាំ២០០១ ខណៈដែលក្រុមហ៊ុនទើបនឹងទិញដីនៅឆ្នាំ២០០៧សោះ ។ សូមបញ្ជាក់ថា ក្រុមហ៊ុនបានសម្បទាន ដោះស្រាយប្រាក់គោលនយោបាយជូនប្រជាពលរដ្ឋនៅភូមិឡពាងចំនួន៥២គ្រួសារ ដោយបានដោះស្រាយអស់មួយចំនួនធំ នៅសល់តែ១៦គ្រួសារប៉ុណ្ណោះ ដែលភាគច្រើនគឺជាក្រុមគ្រួសារឈ្មោះ រាជ សីម៉ា ហៅញេន ដែលជាមេខ្យល់អុកឡុកប្រចាំខេត្តកំពង់ឆ្នាំង ។ ក្នុងនោះ ស្ងួន ញេន ហៅ រាជ សីមា, ឈ្មោះ ស្ងួន ញឿន ត្រូវជាបងបង្កើតរបស់ រាជ សីមា និងឈ្មោះ អ៊ុន ទុំ ត្រូវជាម្តាយ រាជ សីមា, ឈ្មោះ កែវ ខា ជាកូនយាយ អ៊ុន ទុំ, និងឈ្មោះ សាន សុខុម ជាចៅយាយ អ៊ុន ទុំ ។ ទាំង៥នាក់ជាកូន ជាបងប្អូន និងជាចៅ តែពួកគេបំបែកគ្នាជា៥គ្រួសារ ដែលទាមទារដីកេរ ដែលមេកេរឈ្មោះយាយទុំនោះ អត់មានដីមួយចំអាមសោះ ។
លោក ថៃ ហុី តំណាងក្រុមហ៊ុន បាននិយាយពីប្រវត្តិ យាយ អ៊ុន ទុំ ថា ក្រោយពីលែងលះគ្នាជាមួយប្តី គាត់គ្មានដីនៅទេ ហើយកាលណោះ គាត់បានសុំដីរបស់ក្រុមហ៊ុនស្នាក់នៅ ដោយមានលិខិតស្នាមត្រឹមត្រូវ ដែលក្រុមហ៊ុនឱ្យស្នាក់នៅ ដើម្បីជួយបោចស្មៅ និងរើសអាចម៍គោ-ក្របី ។ កាលណោះឈ្មោះ ស្ងួន ញេន ហៅ រាជ សីមា និងឈ្មោះ ស្ងួន ញឿន នៅស្រាតនៅឡើយ នៅជាក្មេងបៀមដៃ នេះមិននិយាយដល់ចៅយាយ អ៊ុន ទុំ ផង ដែលកាលណោះទើបតែចេះរត់ ។ ប៉ុន្តែអ្នកទាំងនោះ ពេលឆ្លើយជាមួយគណៈកម្មការ សុទ្ធតែឆ្លើយដូចគ្នាថា ដីកេរម៉ែចែកឱ្យទាំងអស់ ។ សួរថាម៉ែមានដីពីណាមកចែកឱ្យ បើដីសុំគេនៅសោះហ្នឹង ។ ដូច្នេះក្រុមនេះ មានដីមកពីណា ហើយក្រុមហ៊ុនទេ ជាអ្នកជួយឧបត្ថម្ភប្រាក់គោលនយោបាយ ទោះដឹងថាក្រុមនេះគ្មានដីមួួយចំអាមយ៉ាងណាក្តី ព្រោះមិនចង់ទាស់ជាមួយ ។ រឿងអីមកដាក់គំនាបឱ្យក្រុមហ៊ុនដោះស្រាយជាសាធារណៈនោះ ។ ក្រុមហ៊ុនដោះស្រាយគោលនយោបាយ ឱ្យនរណាប៉ុនណា វាជារឿងភាគីក្រុមហ៊ុនធ្វើសម្បទាន ហើយចាំបាច់អី ដោះស្រាយជាសាធារណៈ និងមានអង្គការចូលរួម ដូចស្ត្រីឈ្មោះ អុំ សុភី លើកឡើងនោះ ។
ចំពោះមូលហេតុដែលក្រុមអ្នកនៅសេសសល់ ពិសេសឈ្មោះ រាជ សីម៉ា ជាមេខ្យល់នេះ តវ៉ាចង់ឱ្យមានការចរចាជាសាធារណៈ គឺដោយសារក្រុមនេះចង់ឱ្យក្រុមហ៊ុនដោះស្រាយថវិកាជាកញ្ចប់ ហើយចង់យកមកបែងចែកគ្នា ព្រោះសង្ស័យមានមេខ្យល់ទាមទារចំណែក ដែលតែងតែនៅពីក្រោយខ្នងជួយរុញ ។ ម៉្លោះហើយ ទើបក្រុមនេះមិនទទួលយកការចូលជួបដោះស្រាយម្តងម្នាក់ ដូចអ្នកមុនៗ ។ ចំណែកឈ្មោះ រាជ សីមា វិញ ក្រោយពីដឹងថាអស់អ្នកភូមិឡពាង គាំទ្រខ្លួនហើយនោះ (នៅសល់ដែរតែមួយដំបរស្វាជាក្រុមគ្រួសារខ្លួន) ក៏ងាកទៅកៀងគរអ្នកភូមិបឹងកក់មកបន្ថែមជាកម្លាំង ភ្លេចគិតថា អ្នកទាំងនោះគ្មានឈ្មោះក្នុងបញ្ជីទេ ។ មេខ្យល់បងប្អូនក្រៅសង្គម២នាក់នេះ តាមដឹងនៅមានបណ្តឹងមួយនៅតុលាការនៅឡើយ គឺរឿងចូលដុតផ្ទះអ្នកចាំដីរបស់ក្រុមហ៊ុន ដែលជាបទល្មើសព្រហ្មទណ្ឌ អាចជាប់គុកបានគ្រប់ពេលវេលាយ៉ាងស្រួល ។
អ្នកខេត្តកំពង់ឆ្នាំងនិយាយថា ប្រសិនគ្មានមនុស្សខូច គ្មានឈ្មោះ សំ ចាន់គារ ញុះញង់ពីក្រោយទេ ម្លេ៉ះខេត្តកំពង់ឆ្នាំងមានរោងចក្រធំមួយបោះទីតាំង គ្រាន់កូនចៅអ្នកស្រុកមានការងារធ្វើ និងជាមុខមាត់របស់ខេត្ត ខាងវិស័យសេដ្ឋកិច្ច ។ និយាយច្រើនពេកទៅ ពួកគេអាណិតលោកអភិបាលខេត្តជាងគេ ព្រោះស្លូតពេកទុកឱ្យមនុស្សមួយក្តាប់តូចអុកឡុកស្រេចតែចិត្ត ។ ចំណែកមេសិទ្ធិមនុស្សម្នាក់ប្រចាំខេត្តឈ្មោះ សំ ចាន់គារ លូកជ្រៅហួសព្រំដែនកំណត់ បង្កើតបាននូវបរិយាកាសអាក្រក់ក្នុងតំបន់ឃុំតាជេស។ លោក ចាន់គារ មានភារកិច្ចត្រឹមតែតាមដានការអនុវត្តសិទ្ធិមនុស្សតែប៉ុណ្ណោះ ប៉ុន្តែបែរជាលូកជ្រៅណាស់ រហូតចូលរួមក្នុងគណៈកម្មការដោះស្រាយ ដោយមិនទទួលខុសត្រូវទៀត ។ លោក ចាន់ សាវេត ក៏លូកជ្រៅដែរ ធ្វើឱ្យអាជ្ញាធរខេត្តកំពង់ឆ្នាំងមុខក្រហមមិនតិចឡើយ ។
មហាជនកំពុងរង់ចាំមើល អាជ្ញាធរខេត្តកំពង់ឆ្នាំង តើអាចវះកាត់ជាគំរូបានហើយឬនៅ ព្រោះអ្នកទាំងនោះកំពុងធ្វើព្យុះ ធ្វើភ្លៀងក្នុងខេត្ត និងដូចសង្គមអត់មានច្បាប់ ៕
ចែករំលែកព័តមាននេះ