ខេត្តកំពង់ឆ្នាំង ៖ វិវាទរវាងប្រជាពលរដ្ឋស្រុកបរិបូណ៏ និងប្រជាពលរដ្ឋស្រុកកំពង់លែងត្រូវបានបញ្ចប់ កាលពីរសៀលថ្ងៃទី២៧ មេសា បន្ទាប់ពីមានការអញ្ជើញទៅសម្រប សម្រួលរបស់អាជ្ញាធរស្រុកទាំង២ខាងលើ ដល់ទីកន្លែងដើមរឿងនៃវិវាទ ស្ថិតនៅចំណុចកោះតាប៉ាង និងចំណុចសោកម៉ោកស្ថិតក្នុងភូមិសាស្ត្រ ឃុំផ្លូវទូក ស្រុកកំពង់លែង ខណៈដែលប្រជាពលរដ្ឋទាំង២ស្រុកវិវាទរឿងម្ខាងមានក្របី និងម្ខាងទៀតមានចម្ការ ។
គួររំលឹកថា កាលពីពាក់កណ្តាលខែមីនា កន្លងទៅនេះ ប្រជាពលរដ្ឋស្រុកបរិបូណ៏ ដែលជាភាគីមានសត្វក្របីជិត១ពាន់ក្បាល បានប្តឹងទៅអាជ្ញាធរស្រុករបស់ខ្លួន ឱ្យជួយអន្តរាគមន៍ទៅលោកអភិបាលខេត្ត ពីរឿងប្រជាពលរដ្ឋស្រុក កំពង់លែងបានហាមមិនឱ្យពួកគាត់ទៅឃ្វាលក្របី នៅចំណុចកោះតាប៉ាង និងកោះសោកម៉ោក ស្ថិតក្នុងភូមិសាស្ត្រ ឃុំផ្លូវទូក ស្រុកកំពង់លែង ។ ចំណែកប្រជាពលរដ្ឋស្រុកកំពង់លែងបានប្តឹងតបវិញថា មកពីក្របីដ៏ច្រើនទាំងនោះបានទៅស៊ីដំណាំចំការរបស់ខ្លួននៅចំណុចខាងលើនេះដែរ ទើបពួកគាត់ហាមបែបនេះ ។
ក្រោយពីមានវិវាទទាំងសងខាងនេះបានមកដល់សាលាខេត្ត លោក ឈួរ ចន្ទ័ឌឿន អភិបាលខេត្តបានអនុញ្ញាតឱ្យលោកអភិបាលរងខេត្ត ចុះធ្វើការសិក្សាស្រាវជ្រាវ លើចំណុចមានទំនាស់ខាងលើនេះដោយ ត្រូវស្វែងយល់ពីការចង់បានរបស់ពួកគាត់ទាំងសងខាង ព្រោះម្ខាងបានអះអាងថា ការលែងក្របីនៅចំណុចនោះ វាជាទម្លាប់ពីដូនតា និងចាប់ពីក្រោយថ្ងៃរំដោះឆ្នាំ១៩៧៩មកម្លេះ ។ ចំណែក ភាគីស្រុកកំពង់លែងវិញ តើដីចម្ការនោះជាយូរយារណាស់មកហើយ ឬទើបនឹងរុករានកាន់កាប់ថ្មី ព្រោះថាដីនៅចំណុចនោះវាជាតំបន់ដីព្រៃលិចទឹក ដែលរដ្ឋបានហាមកាប់រុករាន ។
ចែករំលែកព័តមាននេះ