រាជធានីភ្នំពេញ ៖ រថយន្តBMW X5 បើកបរដោយបុសជនជាតិចិនម្នាក់បើកកៀរម៉ូតូធុនធំ ម៉ាកPULSA ជិះ០២នាក់ប្តីប្រពន្ធ បណ្តាលឱ្យប្រពន្ធអ្នកបើកម៉ូតូរបួសស្រាលហើយរថយន្តបើករត់គេច ត្រូវបានភាគីខាងម៉ូតូទម្លាក់ប្រពន្ធចុះជិះដេញតាមទាន់នៅចំណុចក្បែរស្តុបចំការមន បង្កទៅជាហិង្សាវាយកញ្ចក់រថយន្តបង្ក ដែលធ្វើឱ្យមានការភ្ញាក់ផ្អើលដល់សមត្ថកិច្ចនិងប្រជាពលរដ្ឋផងដែរ ។ ហេតុការណ៏នេះកើតឡើងកាលពីវេលាម៉ោង១០និង១០នាទីយប់ ថ្ងៃទី ២៧ មេសា ២០១៤នៅចំណុចជិតសួនកាណាឌីយ៉ា តាមបណ្តោយផ្លូវព្រះមុនីវង្ស ស្ថិតនៅក្នុងសង្កាត់ស្រះចក ខណ្ឌដូនពេញ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្ត BMW X5 ពណ៌ស ពាក់ស្លាកលេខភ្នំពេញ 2Y-006 បើកបរដោយបុរសជនជាតិចិន តាមផ្លូវព្រះមុនីវង្សក្នុងទិសដៅពីត្បូងទៅជើង ស្របទិសគ្នាជាមួយម៉ូតូធុនធំម៉ាកPULSA ពណ៌ខ្មៅ ពាក់ស្លាកលេខភ្នំពេញ 1BY-4766 ជិះ០២នាក់ប្តីប្រពន្ធ ស្រាប់តែមកដល់ជិតសួនកាណាឌីយ៉ា រថយន្តបានស៊ីញូបត់ស្តាំ ក៏បានមកកៀរ ម៉ូតូបណ្តាលឱ្យស្រ្តីជាប្រពន្ធរបួស ស្រាល ។នៅក្នុងករណីនេះជនរងគ្រោះបានហៅរថយន្តបង្កឱ្យឈប់តែរថយន្តមិនព្រម ឈប់ទើបបុរសជាប្តីក៏ដាក់ប្រពន្ធចោលរួចទាញម៉ូតូជិះដេញតាម តាំងពីចំណុចកើតហេតុ រហូតដល់ចំណុចក្បែរស្តុបចំការមន ក៏តាមទាន់រថយន្តបង្ក ។
ដោយសារតែបុរសជិះម៉ូតូខឹងបុរសជនជាតិចិនបើករថយន្តកៀរម៉ូតូបណ្តាលឱ្យរបួសប្រពន្ធគេ ហៅឱ្យឈប់មិនព្រមឈប់ ដូច្នេះរូបគេក៏ទាញដុំថ្ម វាយកញ្ចក់ចំហៀងខាងឆ្វេងរថយន្តខាងតៃកុងបណ្តាលរថយន្តរងការខូចខាត។ហេតុការណ៏នេះគឺបង្កឱ្យមានភ្ញាក់ផ្អើលដល់ប្រជាពលរដ្ឋនិងប៉ូលិសពីខណ្ឌគឺខណ្ឌដូនពេញនិង ខណ្ឌចំការមន ចេញអន្តរាគមន៏តាមស្ទាក់ចាប់រថយន្តបង្កផងដែរ។
ក្រោយពេលកើតហេតុដោយសារតែរឿងរ៉ាវគ្រោះថ្នាក់ចរាចរណ៏បង្កទៅជាហិង្សានោះដូច្នេះទាំងជនរងគ្រោះនិងជនបង្កត្រូវសមត្ថកិច្ចជំនាញនាំទៅសាកសួរនិងដោះស្រាយគ្នាតាមផ្លូវច្បាប់នៅពេលក្រោយបន្តទៀត ។
ចែករំលែកព័តមាននេះ