ខេត្តសៀមរាប ៖ សេចក្តីរាយការណ៍បឋមបានឲ្យដឹងថា ផ្ទុះហេតុការណ៍បង្កការភ្ញាក់ផ្អើលដល់ពលរដ្ឋ និងសមត្ថកិច្ចទាំងយប់ និងបានចុះមកត្រួតពិនិត្យដោយមានករណីកាប់រលំ ពុះច្រៀកឈើ នៅក្នុងបរិវេណវត្តប្រាសាទអធ្វារ ។
សេចក្តីរាយការណ៍សមត្ថកិច្ចបានឲ្យដឹងថា ការចុះពិនិត្យនេះធ្វើឡើងនៅវេលាម៉ោង២២ និង២៦នាទីយប់ នៅថ្ងៃទី១៥ ខែតុលានេះ ស្ថិតក្នុងភូមិក្រសាំងរលើង សង្កាត់សៀមរាប ក្រុង-ខេត្តសៀមរាប ។
នគរបាលប្រឆាំងបទល្មើសសេដ្ឋកិច្ចខេត្តសៀមរាបបានឲ្យដឹង នៅរសៀលថ្ងៃទី១៦ ខែតុលានេះថា ប្រតិបត្តិការនេះមានកម្លាំងការិយាល័យនគរបាលប្រឆាំងបទល្មើសសេដ្ឋកិច្ចខេត្តបានសហការជាមួយកម្លាំងជំនាញរដ្ឋបាលព្រៃឈើចុះត្រួតពិនិត្យជាក់ស្ដែង ករណីសង្ស័យកាប់ឈើ និងអារឈើ នៅក្បែរបរិវេណវត្តអធ្វារ ជាប់ឈាបនដ្ឋាន ដែលមានទីតាំងស្ថិតនៅក្នុងភូមិសាស្ត្រ ភូមិក្រសាំងរល៉ើង សង្កាត់សៀមរាប ក្រុង-ខេត្តសៀមរាប ដោយសមត្ថកិច្ចចម្រុះបានរកឃើញមានឈើដូចខាងក្រោម ឈើអាររួចចំនួន៤៦សន្លឹក ,ឈើហ៊ុបមូល ចំនួន០២ដើម ,ជំនៀឈើមួយចំនួន ។
សមត្ថកិច្ចបន្តថា ចំពោះវត្ថុតាងទាំងអស់នេះកម្លាំងជំនាញបានសម្រេចស្ទូចដឹកយកទៅរក្សាទុកនៅផ្នែករដ្ឋបាលព្រៃឈើ បន្ទាយស្រី ដើម្បីបន្តនីតិវិធីដោយអនុលោមតាមច្បាប់ស្តីពីព្រៃឈើ ។
សមត្ថកិច្ចបន្តថា ករណីនេះបានបន្តទៅជួបព្រះសង្ឃព្រះនាម ភ្លឿន រ័ត្ន ព្រះគ្រូសូត្រស្តាំ ព្រះអង្គបានបំភ្លឺដូចខាងក្រោម កាប់រលំដើមឈើបានប្រព្រឹត្តដោយព្រះសង្ឃពិតមែន ដើម្បីយកឈើមកកសាងគុដ្ឋ និងរោងដាំបាយ ។ ដើមឈើកាប់រួចមាន០១ដើម ហើយមិនបានយកមកធ្វើអាជីវកម្មដូចការចុះផ្សាយ ក្នុងបណ្តាញសង្គម Facebook នោះទេ ។ ដើមឈើនេះកាប់បានរយៈពេល១សប្តាហ៍ ។
សមត្ថកិច្ចបន្ថែមថា ក្រុមការងារចម្រុះពិនិត្យឃើញថា ការកាប់ពុះច្រៀកឈើពុំបានជូនដំណឹងទៅអាជ្ញាធរមូលដ្ឋាន និងស្ថាប័នពាក់ព័ន្ធ ។ ប៉ុន្តែករណីនេះកម្លាំងចម្រុះបានជម្រាបជូនព្រះសង្ឃ និងគណៈកម្មការវត្តនៅពេលកាប់រលំដើមឈើ នាពេលក្រោយៗទៀតត្រូវ ដាក់ពាក្យស្នើសុំទៅអង្គភាពពាក់ព័ន្ធឲ្យបានត្រឹមត្រូវជាមុនសិន និងបានធ្វើកំណត់ហេតុដកហូតម៉ាស៊ីនង៉ោងយកទៅរក្សាទុកបណ្តោះអាសន្ននៅស្នាក់ការរដ្ឋបាលព្រៃឈើ បន្ទាយស្រី ៕ កែសម្រួលដោយ ៖ សុឃាក់
ចែករំលែកព័តមាននេះ