រាជធានីភ្នំពេញ ៖ បុរសម្នាក់សង្ស័យស្រវឹងបានបើករថយន្តមួយគ្រឿងក្នុងល្បឿនលឿនដូចហោះជ្រុលទៅបុកពីក្រោយម៉ូតូមួយគ្រឿងយ៉ាងពេញទំហឹង បណ្តាលឱ្យយុវជន៣នាក់ស្លាប់នៅនឹងកន្លែងកើតហេតុ ចំណែកអ្នកបើកបររថយន្តត្រូវបានសមត្ថកិច្ចឃាត់ខ្លួនយកទៅអធិការដ្ឋាននគរបាលខណ្ឌជ្រោយចង្វា ។
ហេតុការណ៍ដ៏រន្ធត់ខាងលើនេះបានកើតឡើងកាលពីវេលាម៉ោង១និង៣០នាទីរំលងអាធ្រាត្រឈានចូលថ្ងៃទី១៦ ខែតុលា ឆ្នាំ២០១៩ តាមបណ្តោយផ្លូវជាតិលេខ៦ នៅចំណុចមុខធនាគារកាណាឌីយ៉ា ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ ។
បុរសរងគ្រោះដែលស្លាប់ទាំង៣នាក់ខាងលើមិនស្គាល់អត្តសញ្ញាណនោះទេ បានជិះម៉ូតូមួយគ្រឿងស៊ុយហ្សុ៊យគីនិច ពណ៌ក្រហមលាយស ពាក់ស្លាកលេខ ភ្នំពេញ ១CD-១០៥៦ ។ ចំណែករថយន្តមួយគ្រឿងខាងលើម៉ាកតាកូម៉ាប្រភេទមួយបាំងកន្លះ ពណ៌ស ពាក់ស្លាកលេខ ភ្នំពេញ ២D-៩៤៤៧ បើកបរដោយឈ្មោះសយ ច័ន្ទរស្មី ភេទប្រុស អាយុ៣២ឆ្នាំ កន្លែងស្នាក់នៅផ្ទះលេខ៤៣ឈ ផ្លូវលំ ភូមិបុរី១០០ខ្នង សង្កាត់ទឹកថ្លា ខណ្ឌសែនសុខ ។
តាមប្រភពពីសាក្សីដែលឃើញហេតុការណ៍បានអោយដឹងថា មុនពេលកើតហេតុ គេ ឃើញយុវជនរងគ្រោះទាំង៣នាក់ខាងលើមិនស្គាល់អត្តសញ្ញាណនោះទេជិះម៉ូតូមួយគ្រឿងម៉ាកស៊ុយហ្ស៊ុយគីនិច ធ្វើដំណើរតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូង មិនដឹងថាទើបតែចេញមកពីណានោះទេ ។
តាមប្រភពដដែលបានបន្តថា ខណៈយុវជនរងគ្រោះទាំង៣នាក់ជិះម៉ូតូមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿងម៉ាកតាកូម៉ាប្រភេទមួយបាំងកន្លះ ធ្វើដំណើរក្នុងទិសដៅស្របគ្នា បើកក្នុងល្បឿនយ៉ាងលឿនដូចហោះសង្ស័យស្រវឹង ហើយងងុយដេកមួយភាំងក៏រេចង្កូតជ្រុលទៅបុកពីក្រោយម៉ូតូជនរងគ្រោះយ៉ាងពេញទំហឹង បណ្តាលអោយអូសទាំងជនរងគ្រោះនិងម៉ូតូចំងាយ១០០ម៉ែត្រ លុះអូសចម្ងាយ៥០ម៉ែត្រក៏ធ្លាក់ជនរងគ្រោះម្នាក់ បន្ទាប់មកជនរងគ្រោះបានបែកក្បាលស្លាប់ទាំង៣នាក់តែម្តង រីឯម៉ូតូកលជាប់ពីលើជនរងគ្រោះ ចំណែករថយន្តខ្ទេចអស់មួយកំណាត់ខាងមុខ ។
តាមប្រភពដដែលបានបន្តទៀតថា ភ្លាមៗនោះអ្នកបើកបររថយន្តបង្កបានព្យាយាមចុះចេញពីលើរថយន្តហើយរត់គេចខ្លួនដែរ ប៉ុន្តែត្រូវបានអ្នករត់រ៉ឺម៉កម៉ូតូកង់បី និងសមត្ថកិច្ចធ្វើការឃាត់ខ្លួនយកទៅអធិការដ្ឋាននគរបាលខណ្ឌជ្រោយចង្វាដើម្បីសួរនាំ ចំណែកសពជនរងគ្រោះទាំង៣នាក់មិនទាន់រកអត្តសញ្ញាណឃើញនោះ ត្រូវបានសមត្ថកិច្ចយកទៅតម្កល់ទុកនៅវត្តទឹកថ្លា រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ។
ក្រោយពេលកើតហេតុ រថយន្តនិងម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោក ៕ (កែសម្រួលដោយ ៖ ធីតា)
ចែករំលែកព័តមាននេះ