រាជធានីភ្នំពេញ ៖ បន្ទាប់ពីជំនួបក្រៅផ្លូវការតាមទូរស័ព្ទមុនថ្ងៃបុណ្យចូលឆ្នាំថ្មីប្រពៃណីជាតិនោះ ថ្នាក់ដឹកនាំគណបក្សប្រជាជនកម្ពុជា សម្តេចតេជោនាយករដ្ឋមន្ត្រី ហ៊ុន សែន និងលោក សម រង្ស៊ី នឹងជួបពិភាក្សាគ្នាជាថ្មីទៀត នៅចុងខែមេសានេះ តែមិនដឹងថាជួបគ្នានៅតុចរចា ឬជួបតាមទូរស័ព្ទនោះទេ បន្ទាប់ពីត្រឡប់មកពីក្រៅប្រទេសវិញ ដើម្បីបញ្ចប់បញ្ហាដែលសេសសល់ពីកិច្ចពិភាក្សាគ្នាលើកមុនតាមទូរស័ព្ទនោះ ។
នេះបើតាមការឱ្យដឹងពីមន្ត្រីជាន់ខ្ពស់របស់គណបក្សប្រជាជនកម្ពុជា និងជាសមាជិកគណៈកម្មការចម្រុះកែទម្រង់ការបោះឆ្នោត លោក ជាម យៀប ប្រាប់កោះសន្តិភាពតាមទូរស័ព្ទនៅថ្ងៃទី២៤ មេសា ។ លោក ជាម យៀប បានឱ្យដឹងថា តាមរយៈភ្នាក់ងារព័ត៌មានរបស់លោកនៅក្រៅប្រទេសបានឱ្យលោកដឹងថា លោក សម រង្ស៊ី ប្រធានគណបក្សសង្គ្រោះជាតិ បានធ្វើសន្និសីទកាសែតថា រូបលោកនឹងជួបពិភាក្សាជាមួយសម្តេចតេជោ ហ៊ុន សែន នាយករដ្ឋមន្ត្រី បន្ទាប់ពីលោកត្រឡប់មកកម្ពុជាវិញ ។ ក្នុងជំនួបនោះ លោក សម រង្ស៊ី នឹងនិយាយបញ្ចប់ពីកិច្ចការដែលមានពីមុនមកឱ្យចប់សព្វគ្រប់ ដើម្បីរកយុត្តិធម៌ សុខសន្តិភាពជូនប្រទេសជាតិ និងក្នុងបំណងផ្សះផ្សាជាតិ ។
មន្ត្រីជាន់ខ្ពស់របស់គណបក្សប្រជាជនកម្ពុជារូបនេះ បានលើកឡើងទៀតថា រូបលោកស្វាគមន៍ឱ្យមានជំនួបរវាងថ្នាក់ដឹកនាំសម្តេចតេជោ ហ៊ុន សែន ជាមួយលោក សម រង្ស៊ី និងមានសុទិដ្ឋិនិយម និងជាគោលគំនិតរបស់គណ បក្សប្រជាជនកម្ពុជា ក្នុងការបើកជើងមេឃទូលាយជានិច្ចកាល គឺចង់ធ្វើយ៉ាងណាឱ្យកម្ពុជាមានសុខសន្តិភាព យុត្តិធម៌ និងស្រុះស្រួលជាមួួយគ្នា និងចង់ឱ្យធ្វើការជាមួយគ្នាដើម្បីកសាងជាតិជាមួយគ្នា ជាការត្រឹមត្រូវ ។ ទោះជាយ៉ាងណាក្តី លោក ជាម យៀប មិនបានបញ្ជាក់ច្បាស់លាស់ថា ជំនួបកំពូលរវាងថ្នាក់ដឹកនាំគណបក្សទាំងពីរ កំណត់ថ្ងៃណាមួយជាក់លាក់ឡើយ គ្រាន់តែថា នៅពេលដែលសម្តេចតេជោនាយករដ្ឋមន្ត្រីត្រឡប់មកពីបំពេញទស្សនកិច្ចនៅក្រៅប្រទេស ក៏ដូចជាលោក សម រង្ស៊ី ដែរ ។
ចំពោះទស្សនកិច្ចនៅក្រៅប្រទេសរបស់ប្រធានគណបក្សប្រឆាំង លោក សម រង្ស៊ី នោះ ត្រូវបានលោក ជាម យៀប សង្ឃឹមថា ជាកាដូថ្មីសម្រាប់ការចរចាជាមួយថ្នាក់ដឹកនាំគណបក្សប្រជាជនកម្ពុជា ប្រសិនបើគាត់ពិតជាមានគំនិតចង់បញ្ចប់បញ្ហាដែលសេសសល់មែននោះ ។ លោកថ្លែងថា ការវិលត្រឡប់មកវិញនោះជាដំណឹងល្អ សម្រាប់រកដំណោះស្រាយបញ្ហានានាដែលថ្នាក់ដឹកនាំគណបក្សទាំងពីរ បានជជែកគ្នាតាមទូរស័ព្ទអស់៤៤នាទី មុនថ្ងៃដែលលោក សម រង្ស៊ី ទៅធ្វើទស្សនកិច្ចនៅក្រៅប្រទេស គឺបានជជែកគ្នាយល់ព្រមជាមួយគ្នាលើចំណុចជាច្រើន គឺនៅសល់តែចំណុចបន្តិច (២០%) តែប៉ុណ្ណោះ ដែលមិនទាន់ដោះស្រាយចប់ ។
លោក ជាម យៀប បានលើកឡើងទៀតថា ក្នុងនាមជាសមាជិកក្រុមគណៈកម្មការចម្រុះកែទម្រង់ការបោះឆ្នោត និងជាមន្ត្រីជាន់ខ្ពស់គណបក្សប្រជាជន គឺមានតែការចរចាគ្នាទេ ដែលជាគន្លឹះក្នុងការដោះស្រាយបញ្ហាដែលសេសសល់នៅកម្ពុជាទាំងអស់នោះបាន ។ មិនអាចយកការធ្វើបាតុកម្មមកដោះស្រាយបញ្ហាដែលនៅសេសសល់នៅកម្ពុជា ដូចលោក កឹម សុខា អនុប្រធានគណបក្សសង្គ្រោះជាតិលើកឡើងបានទេ ។ លោកថ្លែងថា ចាប់តាំងពីផ្អាកការចរចាគ្នារវាងក្រុមគណៈកម្មការចម្រុះកែទម្រង់ការបោះឆ្នោតមក រហូតមកដល់ពេលនេះមិនទាន់មានការជួបពិភាក្សាគ្នាជាផ្លូវការឬក្រៅផ្លូវការណាមួយនៅឡើយទេ។
ទាក់ទិននឹងការលើកឡើងរបស់លោក ជាម យៀប ដែលថា នឹងមានជំនួបរវាងថ្នាក់ដឹកនាំកំពូលគណបក្សជាប់ឆ្នោតទាំង២ លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានឱ្យដឹងនៅថ្ងៃដដែលនោះថា មិនទាន់មានគម្រោងជំនួបណាមួយទេ ដោយសារពេលនេះថ្នាក់ដឹកនាំគណបក្សទាំងពីរកំពុងនៅក្រៅប្រទេស ។ លោក យ៉ែម បុញ្ញឫទ្ធិ បន្តថា លោកគ្រាន់តែដឹងថា ថ្នាក់ដឹកនាំគណបក្សសង្គ្រោះជាតិនឹងត្រឡប់ពីក្រៅប្រទេសវិញនៅចុងខែមេសានេះ ដោយលោក សម រង្សុី នឹងត្រឡប់មកកម្ពុជានៅថ្ងៃទី២៩ មេសា ចំណែកលោក កឹម សុខា នឹងត្រឡប់មកវិញនៅថ្ងៃទី២៨ មេសា ខាងមុខ ។
គួររំឭកថា កាលពីថ្ងៃទី៩ មេសា សម្តេចតេជោនាយករដ្ឋមន្ត្រី ហ៊ុន សែន និងលោក សម រង្សុី ប្រធានគណបក្សសង្គ្រោះជាតិ បានសន្ទនាគ្នាតាមទូរស័ព្ទអស់រយៈពេល៤៤នាទី ដោយផ្តោតទៅលើ ទី១-ពេលវេលានៃការបោះឆ្នោតឡើងវិញ សម្រាប់ការបោះឆ្នោតជាតិ និងក្រុមប្រឹក្សាឃុំ-សង្កាត់ ទី២-កំណែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប) និងការកែទម្រង់ប្រព័ន្ធផ្សព្វផ្សាយ ប៉ុន្តែលោក សម រង្សុី បានស្នើសុំពេលពិភាក្សាជាមួយលោក កឹម សុខា ដែលជាអនុប្រធានគណបក្សសិន ។ ស្របពេលនោះដែរ សម្តេច ហ៊ុន សែន ជឿជាក់ថា បញ្ហានយោបាយនឹងត្រូវបានបញ្ចប់មុនថ្ងៃចូលឆ្នាំខ្មែរ ។ ក្រោយពីពិភាក្សាគ្នា លោក សម រង្សុី បានធ្វើសន្និសីទសារព័ត៌មានថា លោកពិតជាបាននិយាយជាមួយសម្តេច ហ៊ុន សែន ពិតមែន និងលើកឡើងថា លទ្ធផលដែលលោកជជែកជាមួយសម្តេចតេជោ ហ៊ុន សែន ទទួលបានលទ្ធផលប្រមាណ៨០% គឺសល់តែប្រមាណ២០%ប៉ុណ្ណោះ ។ ទោះជាយ៉ាងណាក្តី លោក សម រង្ស៊ី ប្រកាន់ជំហរថា លោកត្រូវតែមានការពិភាក្សាជាមួយលោក កឹម សុខា ព្រោះថារូបលោក និងលោក កឹម សុខា ជាមនុស្សតែមួយ គ្មានថ្ងៃបែកបាក់គ្នាឡើយ ហើយរាល់កិច្ចការនិងចុះហត្ថលេខាអ្វីមួយត្រូវតែមានវត្តមានទាំងពីរនាក់ ។
ការចាត់ទុកថា ដំណោះស្រាយដែលជាប់គាំងសល់តែ២០%នោះ សម្រាប់លោក សម រង្ស៊ី ហាក់បានខ្វែងគំនិតគ្នានឹងការអះអាងរបស់លោក កឹម សុខា ដែលបានផ្តល់បទសម្ភាសន៍ដល់វិទ្យុក្រៅស្រុកមួយក្នុងថ្ងៃដដែលនោះ បង្ហាញថា នៅមានបញ្ហាជាច្រើនទៀតដែលពិបាកនឹងបោះជំហានទៅមុខដោយរលូនណាស់ ពិសេសគឺកាលបរិច្ឆេទបោះឆ្នោតមុនអាណត្តិ ៕
ចែករំលែកព័តមាននេះ