ចូលរួមរំលែកទុក្ខគ្រួសារសពចំនួន២នាក់បាត់បង់ជីវិតលើផ្លូវ៦០ម៉ែត្រ
- សៀមរាប
ខេត្តសៀមរាប ៖ កាលពីរសៀលថ្ងៃទី១៤ ខែតុលា ឆ្នាំ២០១៩នេះ លោក គុជ លីណា អនុប្រធានគណៈ កម្មាធិការសាខាកាកបាទក្រហមកម្ពុជាខេត្តសៀមរាប…
ខេត្តសៀមរាប ៖ កាលពីរសៀលថ្ងៃទី១៤ ខែតុលា ឆ្នាំ២០១៩នេះ លោក គុជ លីណា អនុប្រធានគណៈ កម្មាធិការសាខាកាកបាទក្រហមកម្ពុជាខេត្តសៀមរាប…
ខេត្តសៀមរាប ៖ កាលពីរសៀលថ្ងៃទី១៤ ខែតុលា ឆ្នាំ២០១៩នេះ លោក គុជ លីណា អនុប្រធានគណៈ កម្មាធិការសាខាកាកបាទក្រហមកម្ពុជាខេត្តសៀមរាប តំណាងឱ្យលោក ទៀ សីហា ប្រធានគណៈ កម្មាធិការសាខា បានដឹកនាំក្រុមប្រតិបត្តិសាខា និងអនុសាខាកាកបាទក្រហមកម្ពុជា ក្រុងសៀមរាប នាំយកអំណោយរបស់សាខាចូលរួមរំលែកមរណទុក្ខគ្រួសារសពចំនួន២នាក់ ដែលរងគ្រោះថ្នាក់ចរាចរណ៍នៅលើកំណាត់ផ្លូវ៦០ម៉ែត្រ ស្ថិតក្នុងភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប កាលពីវេលាម៉ោង៥និង៤០នាទីព្រឹកថ្ងៃទី១២ ខែតុលា ឆ្នាំ២០១៩ កន្លងទៅ។
គ្រួសារជនរងគ្រោះទាំង២ខាងលើ ក្នុងនោះ ១-ឈ្មោះ តាំ ចិន ភេទប្រុស អាយុ២៩ឆ្នាំ ជាប្រជាការពារភូមិ បានស្លាប់ ចំណែកប្រពន្ធឈ្មោះ តី អូន និងកូនប្រុសម្នាក់ឈ្មោះ ចិន ចាន់ណា អាយុ៦ឆ្នាំ ក៏បានរងរបួសធ្ងន់ក្នុងគ្រោះថ្នាក់ចរាចរណ៍នោះផងដែរ ហើយកំពុងសម្រាកព្យាបាលនៅមន្ទីរពេទ្យខេត្ត ។ ២-លោកតា ជៀប ប៉ុន អាយុ៧០ឆ្នាំ ជាកសិករ បានស្លាប់ មានប្រពន្ធឈ្មោះ ប៉ិក សឿម អាយុ៧១ឆ្នាំ។ គ្រួសារជនរងគ្រោះទាំង២ខាងលើ មានទីលំនៅក្នុងភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប ។
ក្នុងឱកាសចូលរួមរំលែកទុក្ខដ៏ក្រៀមក្រំខាងលើនេះ លោកអនុប្រធានគណៈកម្មាធិការសាខាបានពាំនាំនូវការចូលរួមរំលែកមរណទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចជាលោក ទៀ សីហា ប្រធានគណៈកម្មាធិការសាខា សូមចូលរួមរំលែកទុក្ខ និងសោកស្តាយជាទីបំផុតជាមួយក្រុមគ្រួសារសពទាំង២នាក់ ដែលបាត់បង់មនុស្សជាទីស្រឡាញ់ក្នុងរយៈពេលតែមួយប៉ប្រិចភ្នែកនាពេលនេះ ។
លោកបន្តថា សូមកុំអស់សង្ឃឹម ត្រូវតាំងស្មារតីឡើង ខិតខំប្រកបការងារបន្តទៀត ព្រោះថា គ្មានអ្នកណាម្នាក់ចង់ឱ្យកើតឡើងទេ តែធ្វើម្ដេចវាជាឧបទ្ទវហេតុដែលនឹកស្មានមិនដល់ ហេតុនេះសូមបួងសួងសូមឧទ្ទិសកុសលជូនដល់ដួងវិញ្ញាណក្ខ័ន្ធសពជនរងគ្រោះទាំង២នាក់ បានទៅកាន់សុខគតិភពកុំបីឃ្លៀងឃ្លាតឡើយ។
សូមបញ្ជាក់ថា ទេយ្យវត្ថុចូលរួមក្នុងពិធីបុណ្យសពជនរងគ្រោះទាំង២នាក់ខាងលើ ក្នុងនោះមួយគ្រួសារទទួលបាន មុង១ ភួយ១ សារុង១ ក្រមា១ អាវយឺត១ មី១កេស ត្រីខ២យួរ ទឹកបរិសុទ្ធ ១កេស អង្ករ៣០គីឡូក្រាម និងថវិកា១លានរៀល៕ (កែសម្រួលដោយ ៖ ធីតា)
ចែករំលែកព័តមាននេះ