រាជធានីភ្នំពេញ ៖ បុរសជាសន្តិសុខយាមបុរីម្នាក់ ត្រូវប៉ូលិសប៉ុស្តិ៍ទួលសង្កែឃាត់ខ្លួន បន្ទាប់ពីបង្ករបួសស្នាមបណ្តាលឱ្យបុរសម្នាក់ទៀតរងរបួស ខណៈឃើញបុរសរូបនោះដឹកប្រពន្ធរបស់ខ្លួនចូលផ្ទះសំណាក់រស្មីទួលសង្កែ ស្ថិតក្នុងភូមិទួលសង្កែ ខណ្ឌប្ញស្សីកែវ កាលពីវេលាទៀបភ្លឺថ្ងៃទី២៤ មេសា ។
បុរសសង្ស័យខាងលើឈ្មោះ យឹម គុណ អាយុ៣៥ឆ្នាំ ជាសន្តិសុខយាមបុរី ស្នាក់នៅក្នុងសង្កាត់ទួលសង្កែ មានប្រពន្ធឈ្មោះ ផន ភា អាយុ២៥ឆ្នាំ បម្រើការម៉ាស្សានៅក្នុងសណ្ឋាគារមួយ សង្កាត់ជ្រោយចង្វា ចំណែកបុរសដែលត្រូវគេវាយឱ្យរបួសឈ្មោះ ឈាង មករា អាយុ២៧ឆ្នាំ ស្នាក់នៅផ្ទះជួលភូមិគៀនឃ្លាំង សង្កាត់ជ្រោយចង្វា ។
បើតាមការរៀបរាប់ពីបុរសជាប្តីឈ្មោះ យឹម គុណ ឱ្យដឹងថា នៅវេលាម៉ោង៣ទៀបភ្លឺ ខ្លួនបានចេញពីធ្វើការ (យាមបុរី) ជិះម៉ូតូទៅកន្លែងស្នាក់នៅ ស្រាប់តែប្រទះឃើញបុរសម្នាក់ជិះម៉ូតូឆាលីឌុបប្រពន្ធរបស់ខ្លួនចូលផ្ទះសំណាក់រស្មីទួលសង្កែ ហើយភ្លាមៗបានចេញតាមនិងស្ទាក់សួរនាំ ។ ប្រភពបន្តថា ដោយទប់កំហឹងមិនបានខ្លួនក៏បានដកសោចាក់ម៉ូតូវាយទៅលើបុរសនោះ បណ្តាលឱ្យរងរបួសស្រាល រួចត្រូវប៉ូលិសឃាត់ខ្លួនតែម្តង ។ ប្រភពឱ្យដឹងទៀតថា ខ្លួននិងប្រពន្ធស្រឡាញ់គ្នាបានកូនមួយ តែមិនបានរស់នៅជាមួយគ្នាញឹកញាប់នោះទេ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ