រាជធានីភ្នំពេញ ប្រទេសកម្ពុជា (២៣ មេសា ២០១៤)៖ ប្រទេសកម្ពុជាកំពុងត្រៀមខ្លួនបានយ៉ាងប្រសើរ សម្រាប់ការបង្កើតសហគមន៍សេដ្ឋកិច្ចអាស៊ានដែលហៅកាត់ថា (AEC)នៅដំណាច់ឆ្នាំ២០១៥ ប៉ុន្ដែចាំបាច់ត្រូវតែពន្លឿនកំណែទម្រង់របស់ខ្លួន ដើម្បីលើកកម្ពស់តម្លាភាព និងភាពអាចជឿជាក់បាននៃប្រព័ន្ធបទដ្ឋានគតិយុត្ដរបស់ខ្លួន ទើបអាចលើកទឹកចិត្ដឱ្យមានការវិនិយោគកាន់តែច្រើនថែមទៀតបាន ។
នេះបើតាមការវិភាគមួយ ដែលធ្វើការពិនិត្យលើឧបសគ្គនានាដែលធ្វើឱ្យរាំងស្ទះដល់ការសម្រេចឱ្យបាននូវសហគមន៍សេដ្ឋកិច្ចអាស៊ាន ។ ការដោះស្រាយបញ្ហាពុករលួយ និងការអនុវត្ដដែលប្រឆាំងនឹងការប្រកួតប្រជែង ក៏ត្រូវតែជាអាទិភាពមួយផងដែរនៅក្នុងប្រទេសកម្ពុជា ក៏ដូចជានៅក្នុងបណ្ដាប្រទេសជាច្រើនផ្សេងទៀត ។ នេះបើតាមរបកគំហើញ និងអនុសាសន៍ដែលបានលើកឡើងនៅក្នុងសៀវភៅមួយដែលមានចំណងជើងថា «សហគមន៍សេដ្ឋកិច្ចអាស៊ាន៖ ការងារដែលកំពុងធ្វើ» ដែលរៀបចំឡើងដោយធនាគារអភិវឌ្ឍន៍អាស៊ី (ADB) សហការជាមួយវិទ្យាស្ថានសិក្សាពីអាស៊ីអាគ្នេយ៍ (ISEAS) ។
លោក Jayant Menon ដែលជាអ្នកចូលរួមចងក្រងសៀវភៅនេះ និងជាសេដ្ឋវិទូជាន់ខ្ពស់របស់ ADB បានមានប្រសាសន៍ថា «ប្រទេសកម្ពុជាធ្វើបានយ៉ាងល្អនៅក្នុងការត្រៀមរៀបចំខ្លួន សម្រាប់សហគមន៍សេដ្ឋកិច្ចអាស៊ាន ដោយហេតុថា ប្រទេសនេះមានសេដ្ឋកិច្ចបើកចំហ ។ ប៉ុន្ដែប្រទេសនេះ ចាំបាច់ត្រូវតែតាមឱ្យទាន់ការអនុវត្ដការងារគយតាមប្រព័ន្ធអេឡិចត្រូនិករបស់អាស៊ាន បញ្ជរតែមួយជាតិ និងនីតិវិធី បញ្ជរតែមួយតាមច្រកព្រំដែនរបស់អាស៊ាន» ។
សៀវភៅនេះលើកឡើងពីបញ្ហាប្រឈមសំខាន់ៗដែលប្រទេសកម្ពុជា និងប្រទេសជាសមាជិកអាស៊ានផ្សេងទៀតកំពុងជួបប្រទះ នៅក្នុងការសម្រេចនូវសហគមន៍សេដ្ឋកិច្ចអាស៊ាន និងរបៀបដែលគេអាចជម្នះបញ្ហាប្រឈមទាំងនេះបាន ។ សារគន្លឹះចេញពីការសិក្សានេះគឺថា កាលបរិច្ឆេទកំណត់ឆ្នាំ២០១៥ មិនគួរចាត់ទុកថាជាកាលបរិច្ឆេទដែលមានលក្ខណៈតឹងតែងពេកនោះទេ ប៉ុន្ដែជាគោលដៅមួយនៅក្នុងដំណើរផ្លូវដ៏វែងឆ្ងាយ ។ ប័ណ្ណពិន្ទុផ្ទាល់ខ្លួនរបស់អាស៊ានបង្ហាញឱ្យឃើញថា គេនឹងមិនអាចសម្រេចបាននូវសហគមន៍សេដ្ឋកិច្ចអាស៊ាននៅត្រឹមកាលបរិច្ឆេទដែលកំណត់ដោយខ្លួនឯងនេះឡើយ បើទោះជាកន្លងមក មានការសម្រេចបាននូវវឌ្ឍនភាពជាច្រើនយ៉ាងណាក៏ដោយ ។
ចំណុចសំខាន់ខ្លាំងមួយ គឺភាពចាំបាច់ដើម្បីបន្ដធ្វើការងារ ក្រោយឆ្នាំ២០១៥ ។ កិច្ចព្រមព្រៀងនានាដែលត្រូវបានចុះហត្ថលេខាមុន និងក្រោយកាលបរិច្ឆេទនេះ ត្រូវតែទទួលបានការផ្ដល់សច្ចាប័ន និងអនុវត្ដដោយស្របច្បាប់ ជាពិសេសនៅក្នុងប្រទេសដែលមានសេដ្ឋកិច្ចអន្ដរកាល ដូចជាប្រទេសកម្ពុជា ជាដើម ដែលការពិនិត្យតាមដាន ការអនុវត្ដកិច្ចព្រមព្រៀងនានាជារឿយៗធ្វើឡើងតែទៅតាមឆន្ទៈដែលមានតិចតួចប៉ុណ្ណោះ ។ ដូច្នេះ ជាការសំខាន់ដែលប្រទេសនានាដូចជាប្រទេសកម្ពុជា ជាដើម ជឿជាក់ខ្លួនឯងថា កំណែទម្រង់ទាំងនេះគឺធ្វើឡើងដើម្បីប្រយោជន៍ផ្ទាល់ខ្លួនរបស់ពួកគេ ។
ដើម្បីទាញប្រយោជន៍ពីកាលានុវត្ដភាពនានា ដែលផ្ដល់ដោយសហគមន៍សេដ្ឋកិច្ចអាសា៊ន ប្រទេសកម្ពុជា ចាំបាច់ត្រូវតែវិនិយោគបន្ថែមទៀតលើការអប់រំ និងសុខភាព ។ ក្រៅតែពីអាចកាត់បន្ថយវិសមភាពផ្នែកសង្គម និងវិសមភាពផ្នែកទ្រព្យធនដោយផ្ទាល់ ការវិនិយោគបែបនេះនឹងផលិតនូវកម្លាំងពលកម្ម ដែលកាន់តែមានសមត្ថភាពក្នុងការចូលរួមយ៉ាងសកម្មនៅក្នុងដំណើរការ ដើម្បីសម្រេចកំណើន និងក្នុងការសម្របខ្លួនទៅតាមបម្លាស់ប្ដូរសំខាន់ៗដែលកើតឡើងផ្ទាល់ ដោយសារតែសហគមន៍សេដ្ឋកិច្ចអាស៊ាននេះ ។
ចុងក្រោយ ដើម្បីកាត់បន្ថយការពឹងអាស្រ័យលើវិស័យកាត់ដេរ និងបង្កើនទំនាក់ទំនងពាណិជ្ជកម្មជាមួយប្រទេសជាសមាជិកអាស៊ាន ប្រទេសកម្ពុជាចាំបាច់ត្រូវតែធ្វើពិពិធកម្មមូលដ្ឋានទំនិញសម្រាប់នាំចេញរបស់ខ្លួន។ កសិផល សេវាទេសចរណ៍ និងសេវាទំនើបៗ សុទ្ធតែជាកាលានុវត្ដភាព ដែលផ្ដល់ដោយសហគមន៍សេដ្ឋកិច្ចអាស៊ាន ៕
ចែករំលែកព័តមាននេះ