រាជធានីភ្នំពេញ ៖ អ្នកស្រី ចាន់ លីណា ថៅកែហាងកាត់សក់ អ៊ុតសក់ និងម៉ាស្សាយីហោលីណា ដែលត្រូវកងរាជអាវុធហត្ថឃាត់ខ្លួន ពាក់ព័ន្ធនឹងការយកមាសកាឡៃជាង១រយដុំទៅលក់បន្ដឱ្យម៉ូយរបស់ខ្លួនត្រូវបានដោះលែងឱ្យមានសេរីភាពវិញ ព្រោះតែថៅកែហាងរូបនេះ បានចាញ់បោកកលល្បិចជនជាតិចិនទេ ។
រាជធានីភ្នំពេញ ៖ អ្នកស្រី ចាន់ លីណា ថៅកែហាងកាត់សក់ អ៊ុតសក់ និងម៉ាស្សាយីហោលីណា ដែលត្រូវកងរាជអាវុធហត្ថឃាត់ខ្លួន ពាក់ព័ន្ធនឹងការយកមាសកាឡៃជាង១រយដុំទៅលក់បន្ដឱ្យម៉ូយរបស់ខ្លួនត្រូវបានដោះលែងឱ្យមានសេរីភាពវិញ ព្រោះតែថៅកែហាងរូបនេះ បានចាញ់បោកកលល្បិចជនជាតិចិនទេ ។
អ្នកស្រី ចាន់ លីណា អាយុ ៥៩ឆ្នាំ បើកហាងកាត់សក់ អ៊ុតសក់ និងម៉ាស្សា នៅផ្ទះលេខ៨៤Eo ផ្លូវលេខ៦៣ ក្នុងសង្កាត់ផ្សារថ្មីទី៣ ខណ្ឌដូនពេញ ។ កាលពីថ្ងៃទី១៨ មេសាកន្លងទៅ ថៅកែហាងរូបនេះត្រូវកងរាជអាវុធហត្ថខណ្ឌដូនពេញឃាត់ខ្លួន ខណៈអ្នកស្រីយកមាសកាឡៃចាក់ជាប្រាក់ស្ដូកបុរាណចំនួន១២០ដុំ(មួយដុំមានទម្ងន់២តម្លឹង)ទៅលក់ឱ្យអ្នកស្គាល់គ្នា ។ ការដោះលែងថៅកែហាងរូបនេះឱ្យមានសេរីភាពវិញ ត្រូវបានសមត្ថកិច្ចឱ្យដឹងថា ក្រោយពីស្រាវជ្រាវរកឃើញថា អ្នកស្រី ចាន់ លីណា ពិតជាចាញ់បោកជនជាតិចិនម្នាក់ដែលយកមាសកាឡៃ១២០ដុំឱ្យជួយលក់នោះប្រាកដមែន ។
មន្ដ្រីកងរាជអាវុធហត្ថឱ្យដឹងថា ចំពោះរឿងហេតុនេះដំបូងមានជនជាតិចិន២នាក់ ប្រុសម្នាក់ ស្រីម្នាក់ បានចេញចូលធ្វើសក់ និងម៉ាស្សានៅហាងរបស់អ្នកស្រី ។ ថ្ងៃមួយ ជនជាតិចិនរូបនោះបានយកមាសកាឡៃចំនួន៥ដុំ ដែល១ដុំទម្ងន់២តម្លឹងពឹងអ្នកស្រីឱ្យជួយលក់ ហើយក៏បានយកប្រាក់ទៅបាត់ ។ លុះនៅថ្ងៃទី១៨ មេសា ជនជាតិចិននោះបានយកមាស១២០ដុំ ឱ្យអ្នកស្រីជួយលក់ទៀត ហើយប្រាប់ថា លក់បានប៉ុន្មានក៏យកដែរ ព្រោះនេះជាកំណប់ដែលគេទើបនឹងជីកបានពីផ្នូរបុរាណរបស់ជនជាតិចិន ។ ពេលនោះ អ្នកស្រី ចាន់ លីណា បានយកមាសទាំង១២០ដុំនេះទៅលក់ឱ្យអ្នកស្រី ឆាយ លាងហេង ដែលជាអាជីវករលក់អង្ករបានប្រាក់ប្រមាណ៣ម៉ឺុនដុល្លារឱ្យជនជាតិចិននោះ ។ ក្រោយពីជនជាតិចិនយកប្រាក់ហើយ អ្នកស្រី ឆាយ លាងហេង បានយកមាសនោះទៅដុតមើលដើម្បីចង់ដឹងថា សុទ្ធឬមិនសុទ្ធ និងបានធ្វើឡើងនៅចំពោះមុខអ្នកស្រី ចាន់ លីណា ។ ពេលអ្នកទិញនិងអ្នកលក់យកមាសទៅដុត ស្រាប់តែមាសក្លាយជាស្ពាន់ទាំងអស់ ភ្លាមនោះ អ្នកទិញបានចាប់ឃាត់អ្នកលក់នាំខ្លួនឱ្យសមត្ថកិច្ចចាត់ការតាមច្បាប់ ។
តាមរយៈនៃការសាកសួរបង្ហាញថា អ្នកទិញនិងអ្នកលក់សុទ្ធតែជាជនរងគ្រោះដូចគ្នា ទើបសមត្ថកិច្ចដោះលែងអ្នកស្រី ចាន់ លីណា ឱ្យមានសេរីភាពវិញ និងបានសហការគ្នាជួយស្វែងរកចាប់ខ្លួនជនជាតិចិន ដែលយកមាសក្លែងក្លាយមកលក់បោកប្រាស់យកលុយទៅបាត់ដើម្បីផ្ដន្ទាទោសតាមច្បាប់ ៕
ចែករំលែកព័តមាននេះ