ខេត្តមណ្ឌលគិរី ៖ វត្ថុតាងនៃបទល្មើសព្រៃឈើដ៏ច្រើនសម្បើមមួយមាន រណារយន្ត ឬដែលមនុស្សភាគច្រើនស្គាល់ថា ត្រង់សឺន័រចំនួន២ពាន់គ្រឿងដែលរឹបអូសកន្លងមក បានត្រូវកែច្នៃទៅជារូបសំណាកសត្វដំរីដ៏ធំ សម្រាប់ដាក់តាំងបង្ហាញសាធារណជនក្នុងទីធ្លាសួនឧទ្យានសែនមនោរម្យ ដើម្បីលម្អបន្ថែមជាមួយសួនច្បារ និងជាការដាស់ស្មារតីមនុស្សគ្រប់រូប…
ខេត្តមណ្ឌលគិរី ៖ វត្ថុតាងនៃបទល្មើសព្រៃឈើដ៏ច្រើនសម្បើមមួយមាន រណារយន្ត ឬដែលមនុស្សភាគច្រើនស្គាល់ថា ត្រង់សឺន័រចំនួន២ពាន់គ្រឿងដែលរឹបអូសកន្លងមក បានត្រូវកែច្នៃទៅជារូបសំណាកសត្វដំរីដ៏ធំ សម្រាប់ដាក់តាំងបង្ហាញសាធារណជនក្នុងទីធ្លាសួនឧទ្យានសែនមនោរម្យ ដើម្បីលម្អបន្ថែមជាមួយសួនច្បារ និងជាការដាស់ស្មារតីមនុស្សគ្រប់រូប ចៀសវាងបំផ្លាញព្រៃឈើដែលជាអាយុជីវិតមនុស្សជាតិទូទាំងពិភពលោក ។
ក្នុងបទសម្ភាសន៍ជាមួយកោះសន្តិភាព លោកស្វាយ សំអ៊ាង អភិបាលខេត្ត បានឲ្យដឹងថា រូបលោករួមទាំងក្រុមការងារគណៈកម្មការរៀបចំសាងសង់សួនច្បារសែនមនោរម្យ បានចុះមើលទីតាំងដើម្បីដាក់តាំងរូបសំណាកដំរី ដែលកែច្នៃពីរណារយន្ត ជាវត្ថុតាងដែលរឹបអូសបានពីជនល្មើសនានា ដើម្បីកែលម្អសួនច្បារសែនមនោរម្យឱ្យមានសោភ័ណភាពល្អ និងអាចឱ្យសាធារណជន ក៏ដូចជាភ្ញៀវទេសចរមកទស្សនាកម្សាន្តនៅខេត្តមណ្ឌលគិរី ឱ្យកាន់តែច្រើនឡើងបន្ថែមទៀត ។
លោក ស្វាយ សំអ៊ាង បន្តថា ការរៀបចំដាក់តាំងរូបសំណាកដំរី នៅលើសួនច្បារសែនមនោរម្យក្នុងក្រុងសែនមនោរម្យនាពេលខាងមុខនេះ គឺជារូបសំណាកកែច្នៃអំពីរណារយន្ត ជាវត្ថុតាងដែលមន្ត្រីជំនាញរឹបអូសបាន ពីជនល្មើសនានា ដែលលួចកាប់ឈើកន្លងមក ក្នុងខេត្តមណ្ឌលគិរី ។រូបសំណាកដំរីនេះ មានកម្ពស់២,៨០ម៉ែត្រ សាងសង់ពីរណារយន្ត ដើម្បីតម្កល់ទុកជាវត្ថុតាងបង្ហាញដល់សាធារណជន ។ ដូច្នេះក្នុងនាមអាជ្ញាធរខេត្ត ក៏ដូចជាមន្ទីរជំនាញ បានធ្វើគម្រោងស្នើសុំទៅក្រសួង ដើម្បីយកវត្ថុតាងទាំងនេះកែច្នៃទៅជារូបដំរី ដើម្បីដាក់តាំងលើសួនច្បារសែនមនោរម្យ ក្នុងគោលបំណង ៖
ទី១-កែលម្អបរិវេណសួនច្បារ សម្រាប់ឱ្យប្រជាពលរដ្ឋចូលទស្សនា ។
ទី២-រូបសំណាកដំរីនេះ សាងសង់ពីរណារយន្តទាំងអស់ដែលជាវត្ថុតាងបម្រើឱ្យបទល្មើសព្រៃឈើដែលរឹបអូសបានពីជនល្មើស ដើម្បីតម្កល់ទុក ក៏ដូចជាសារមន្ទីរមួយបង្ហាញពីការកែច្នៃ ការដាក់តាំងទុកឱ្យសាធារណជននិងកូនចៅជំនាន់ក្រោយបានចាត់ទុកថា ស្នាដៃរបស់ថ្នាក់ដឹកនាំខេត្ត និងមន្ត្រីជំនាញជំនាន់មុន បានគិតគូរសាងសង់រូបសំណាកដំរីនេះ ។
ការកែច្នៃ និងរៀបចំដាក់តាំងរូបសំណាកដំរី នៅលើសួនច្បារសែនមនោរម្យ តម្លៃជាង២ម៉ឺនដុល្លារ នេះគ្រាន់តែថ្លៃឈ្នួល មិនទាន់គិតថ្លៃសម្ភារនៅឡើយទេ ។ លោកអភិបាលខេត្ត បានធ្វើការអំពាវនាវដល់បងប្អូនប្រជាពលរដ្ឋទូទៅ សូមកុំប្រព្រឹត្តបទល្មើសព្រៃឈើ ពិសេសការកាប់ទន្ទ្រានដីរបស់រដ្ឋធ្វើជាកម្មសិទ្ធិ ហើយសូមបញ្ឈប់មុខរបរកាប់ឈើដើម្បីយកទៅលក់ ដែលជាមុខរបរបណ្ដាលឱ្យគ្រោះថ្នាក់ដល់អាយុជីវិត និងបំផ្លាញធនធានធម្មជាតិ ឱ្យងាកមកប្រកបមុខរបរណាដែលត្រឹមត្រូវ ដូចជាការដាំដុះដំណាំកសិ-ឧស្សាហកម្ម ដែលជាមុខរបរយូរអង្វែងវិញ ។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន នៅថ្ងៃទី១៣ តុលា បានឲ្យដឹងថា រូបសំណាកសត្វដំរី ដែលធ្វើពីវត្ថុតាងរណារយន្ត មានទំហំដូចខាងក្រោម៖
ទី១-កម្ពស់២,៨០ម៉ែត្រ (គិតពីបាតជើង ដល់ចុងប្រមោយខាងលើ)
ទី២-បណ្ដោយប្រវែង ៣,១០ម៉ែត្រ (គិតពីក្បាលដល់ជើងក្រោយ)
ទី៣-ទទឹងចន្លោះពី០,៩០ម៉ែត្រ ទៅ១ម៉ែត្រ (គិតពីទំហំតួខ្លួន) ហើយបានប្រើប្រាស់វត្ថុតាង រណារយន្តសរុប៣០០គ្រឿង ក្នុងនោះមានម៉ាស៊ីនរណារយន្ត និងផ្លែរណារយន្ត ព្រមទាំងគ្រឿងម៉ូតូ ប្រព្រឹត្តបទល្មើស។
រដ្ឋលេខាធិការក្រសួងបរិស្ថាន លោក នេត្រ ភក្ត្រា បានគូសបញ្ជាក់ទៀតថា មន្ទីរបរិស្ថានខេត្តមណ្ឌលគិរី បានរៀបចំដំឡើងរូបចម្លាក់សត្វដំរី ធ្វើពីវត្ថុតាងរណារយន្តនេះឡើង ជាមួយជាងនៅក្នុងខេត្តមណ្ឌលគិរីដោយប្រើ រយៈពេលចំនួន៧ខែ និងដោយមានការចូលរួមគាំទ្រ ថវិកាពីសប្បុរសជន និងអង្គការដៃគូអភិវឌ្ឍន៍នានា ដើម្បីចូលរួមក្នុងសកម្មភាព នៃការរៀបចំ និងដំឡើងរូបចម្លាក់សត្វដំរី ដែលធ្វើពីវត្ថុតាងរណារយន្តមួយនេះ ។
លោកបញ្ជាក់ថា ពីសវតានៃការសាងសង់រូបសំណាកសត្វដំរីនេះ ដោយសារតែខេត្តមណ្ឌលគិរី មានការជាប់ទាក់ទងនឹងរឿងរ៉ាវសត្វដំរី ក្នុងនោះរួមមានព្រឹត្តិការណ៍កើតឡើង នៅអំឡុងឆ្នាំ២០០៧ ត្រង់ចំណុចត្រពាំងឈូក (បច្ចុប្បន្ននៅក្នុងភូមិសាស្ត្រដែនជម្រកសត្វព្រៃស្រែពក) កូនដំរីឈ្មោលមួយក្បាល បានដើរជាន់អន្ទាក់ព្រានព្រៃ ដាច់ជើងម្ខាង ត្រូវបានក្រុមអភិរក្សព្រៃឈើ និងសត្វព្រៃប្រទះឃើញ ហើយដឹកយកទៅសង្គ្រោះនៅឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ នៅគ្រានោះ«ឈូក» បានរួចផុតពីសេចក្តីស្លាប់ ។
បច្ចុប្បន្នដំរីឈ្មោះឈូកនេះបានប្រើប្រាស់ជើងសិប្បនិមិត្ត ហើយអាចដើរបាននិងមានសុខភាពល្អដូចសត្វដំរីដ៏ទៃដែរ ។ រូបសំណាកសត្វដំរី«ឈូក»នេះក៏ធ្លាប់ត្រូវបានកសាងឡើងធ្វើអន្ទាក់ ដែលបានប្រមូលពីព្រៃមកដែរ ។រដ្ឋលេខាធិការក្រសួងបរិស្ថាន បានបន្តថា នៅថ្ងៃទី២៥ ខែមីនា ឆ្នាំ២០១៧ ហ្វូងសត្វដំរីចំនួន១២ក្បាល បានធ្លាក់រណ្តៅទឹក និងជាប់ភុងក្នុងភក់ បង្កការភ្ញាក់ផ្អើលមួយ នៅភូមិអូរអាម ឃុំស្រែខ្ទុម ស្រុកកែវសីម៉ា ខេត្តមណ្ឌលគិរី ។
ក្រុមការងារមន្ទីរបរិស្ថានខេត្តមណ្ឌលគិរី ដោយសហការជាមួយអង្គការ WCS និងប្រជាពលរដ្ឋ បាននាំគ្នាជីកដីធ្វើជាផ្លូវដែលអាចធ្វើឲ្យហ្វូងដំរីទាំងនោះ ឡើងផុតពីភក់ហើយត្រឡប់ចូលទៅក្នុងព្រៃដោយសុវត្ថិភាព ។ ព្រឹត្តិការណ៍មួយទៀត គឺហ្វូងសត្វដំរីដែលតែងតែឧស្សាហ៍បង្ហាញខ្លួន នៅខាងក្រោយអគាររដ្ឋបាលសាលា ស្រុកកែវសីមា និងការបង្ហាញខ្លួនចូលមកជិតក្បែរលំនៅឋានរបស់ប្រជាពលរដ្ឋ និងស៊ីដំណាំនៅក្នុងស្រុកកែវសីមា ដែលបានបង្កជាទំនាស់រវាងសត្វដំរី និងមនុស្សជាដើម ។
លោក ឌិន ប៊ុនធឿន អនុប្រធានមន្ទីរបរិស្ថានខេត្ត បានឲ្យដឹងថា ការសាងសង់រូបសំណាកដំរីនេះ ដោយមានការគិតគូរពីថ្នាក់ដឹកនាំក្រសួងបរិស្ថាន ក៏ដូចជាអាជ្ញាធរខេត្ត មានការចូលរួមឧបត្ថម្ភពីអង្គការWWF អង្គការWCS និងក្រុមហ៊ុនរ៉េនីសង់ មន្ទីរបរិស្ថានខេត្ត បានរៀបចំកៃច្នៃរណារយន្ត ដែលមន្ត្រីជំនាញរឹបអូសពីជនល្មើស ដើម្បីសាងសង់ធ្វើជារូបសំណាកដំរីដែលមានកម្ពស់២,៨០ម៉ែត្រ ចំណាយថវិកាជាង២ម៉ឺនដុល្លារ សម្រាប់តម្កល់ទុកនៅលើបរិវេណសួនច្បារសែនមនោរម្យ ក្នុងខេត្តមណ្ឌលគិរី ។
តាមការថ្លែងឲ្យដឹងរបស់លោក នេត្រ ភក្ត្រា បច្ចុប្បន្ននេះ ប្រទេសកម្ពុជាមានដំរីព្រៃចំនួនប្រមាណ៥០០ក្បាល ដែលកំពុងតែរស់នៅក្នុងប្រទេសកម្ពុជា នៅក្នុងនោះតាមការសិក្សា សត្វដំរីព្រៃ នៅក្នុងដែនជម្រកសត្វព្រៃទាំង៥ នៅក្នុងខេត្តមណ្ឌលគិរីទាំងមូល មានប្រមាណជាង៣៧៥ក្បាល, នៅតំបន់ជួរភ្នំក្រវ៉ាញ មានដំរីចំនួនប្រមាណជិត២០០ក្បាល និងផ្សេងទៀត បាននិងកំពុងរស់នៅក្នុងតំបន់ការពារធម្មជាតិនានា របស់ប្រទេសកម្ពុជា ។
លោក នេត្រ ភក្ត្រា បានគូសបញ្ជាក់ថា ចំណែកដំរីស្រុកដែលចិញ្ចឹម ដោយអ្នកស្រុកមានចំនួនប្រមាណ៧០ក្បាល ។ ចំនួនដំរីស្រុកពិតជាមានការថយចុះ ដោយសារតែមិនមានការបន្តពូជបែបធម្មជាតិ និងដំរីខ្លះមានវ័យចាស់ និងបានស្លាប់ជាបន្តបន្ទាប់ ៕
ចែករំលែកព័តមាននេះ