ខេត្តកំពត ៖ កាលពីវេលាម៉ោង១២ និង៣០នាទីថ្ងៃទី១២ តុលា នេះថា មានបុរសចំណាស់ម្នាក់បានតខ្សែភ្លើងពីបារ៉ែតភ្លើងនៅផ្ទះ ដើម្បីឆក់ត្រីមកចម្អិនធ្វើម្ហូបនៅអូរខាងក្រោយផ្ទះចម្ងាយ៤០ម៉ែត្រ ស្រាប់តែឆ្លងចរន្តភ្លើងបណ្តាលឱ្យឆក់ស្លាប់ភ្លាមៗនៅនឹងកន្លែង ។
សេចក្តីរាយការណ៍ថា ជនរងគ្រោះខាងលើឈ្មោះ យ៉េន ធឿន អាយុ៥០ឆ្នាំ រស់នៅភូមិត្រសេកកោង ឃុំថ្មី ស្រុកទឹកឈូ ខេត្តកំពត ។ ប្រភពព័ត៌មានពីប្រជាពលរដ្ឋដែលធ្លាប់ស្គាល់បុរសរងគ្រោះបានឲ្យដឹងថា កន្លងមក ជនរងគ្រោះធ្លាប់តែរកចាប់ត្រីធ្វើម្ហូប ដោយប្រើតែឧបករណ៍ឆក់ច្នៃចេញពីបារ៉ែតភ្លើងអីចឹងរហូត ហើយឃើញបានត្រីយកមកចែកបងប្អូនសាច់ញាតិហូបជាហូរហែ នាពេលកន្លងមក ។
ប៉ុន្តែនៅថ្ងៃនេះ គាត់ត្រូវភ្លាត់ស្នៀតមិនបានមើលខ្សែភ្លើងមានមុខតំណរ ទើបបណ្តាលឲ្យឆក់ខ្លួនឯងស្លាប់
យ៉ាងអណោចអធ័មដូច្នេះ ។ សូមបញ្ជាក់ថា កន្លងមកសមត្ថកិច្ចនគរបាលប៉ុស្តិ៍រដ្ឋបាលធ្លាប់បានណែនាំដល់ប្រជាពលរដ្ឋ ដោយហាមមិនឱ្យរកម្ហូបដោយប្រើឧបករណ៍ឆក់យ៉ាងដូច្នេះទេ ប៉ុន្តែការណែនាំរបស់សមត្ថកិច្ច ប្រជាពលរដ្ឋមួយចំនួនក៏ស្តាប់ការណែនាំ រីឯមួយចំនួនទៀត មិនបានគោរពតាមការណែនាំទៅលួចច្នៃតខ្សែយកទៅឆក់ត្រីនៅតាមអណ្តូង ឬអូរ ហើយចៃដន្យអាក្រក់ ក៏បណ្តាលឱ្យជួបហេតុការណ៍យ៉ាងដូច្នេះ ៕
ចែករំលែកព័តមាននេះ