រាជធានីភ្នំពេញ៖ រឿងភាគខ្មែរ«ពិសស្នេហ៍» ផលិតដោយទូរទស្សន៍ប៉ុស្តិ៍លេខ៥ ដែលយកសាច់រឿងថៃមកថតនោះបានឡើងកម្តៅរិះគន់កាន់តែខ្លាំង ។ ការឡើងកម្តៅគឺដោយសារតែរហូតមកដល់ពេលនេះភាគីទូរទស្សន៍ប៉ុស្តិ៍លេខ៥នៅមិនទាន់ចេញមុខបកស្រាយនៅឡើយ ខណៈព័ត៌មានមួយនេះនៅតែត្រូវបានគេចែកចាយតាមហ្វេសប៊ុក ។
ចុងក្រោយនេះ ហ្វេសប៊ុកMa Nout បានសរសេបង្ហោះសាររិះគន់ខ្លាំង និងដាក់កំហុសលើក្រសួងវប្បធម៌ និងវិចិត្រសិល្បៈផងដែរ ។ Ma Noutសរសេរថា «ការថតក្រោយគេនេះវាអាចជាចេតនា ដោយបានតាំងចិត្តរបស់ម្ចាស់ស្ថានីយទូរទស្សន៍លេខ៥ក្នុងការវៃ៉បំបាក់វិស័យភាពយន្ត និងប្រមាថវប្បធម៌ខ្មែរ ប្រជាជនខ្មែរ ដោយមានការគាំទ្រពីមន្ត្រីចោលម្សៀតនៃក្រសួងវប្បធម៌មួយចំនួន ។
ពេលខ្លះក៏គួរតែអរគុណដល់ថៅកែស្ថានីយទូរទស្សន៍ប៉ុស្តិ៍លេខ៥ ដែលបានបង្ហាញថា គេអាចជះលុយទិញក្បាលមន្ត្រីក្រសួងវប្បធម៌មួយចំនួនឲ្យអនុញ្ញាតថតរឿងនេះឡើង ព្រោះបើគ្មានមន្ត្រីវប្បធម៌ទទួលខុសត្រូវផ្នែកនេះឲ្យថតទេ តើអ្នកណាហ៊ានថត?កំហុសមួយនេះគឺជាទទួលខុសត្រូវផ្ដាច់មុខរបស់ក្រសួងវប្បធម៌ នាយកដ្ឋានភាពយន្ត ឬអស់លោកណាដែលមានសិទ្ធិសម្រេច ឲ្យភាពយន្តនេះបានថតចេញជារូបរាងរហូតបានចាក់ផ្សាយ ។
ដោយសារតែផលប្រយោជន៍អស់លោកសុខចិត្តអនុញ្ញាតឲ្យថត ដោយពុំបានគិតពីផលប៉ះពាល់កិត្តិយសជាតិវែងឆ្ងាយទៅថ្ងៃអនាគត ។ នេះវាបង្ហាញពីកម្រិតIQខួរក្បាលដ៏អាត្មានិយមរបស់មន្ត្រីវប្បធម៌មួយចំនួនដែលគិតតែពីប្រយោជន៍បក្សពួក ។ មិនគិតពីប្រយោជន៍ជាតិ និងវប្បធម៌ជាធំនោះទេ ។ ឬអស់លោកគិតមិនឃើញមែន ? ថានឹងទទួលបានការប្រមាថពីគេ ? បើគិតមិនឃើញគួរណាស់ឈប់កាន់ការងារនេះទៅ។
ទង្វើរបស់មន្ត្រីវប្បធម៌ចោលម្សៀតដែលអនុញ្ញាតឲ្យគេថតរឿងនេះ គឺជាការចូលដៃចូលជើងឲ្យបរទេសប្រមាថមើលងាយសង្គមជាតិ វប្បធម៌ខ្មែរ ដោយផ្ទាល់ពិតជាមិនអាចលើកលែងឲ្យបានមែន ។ តាមពិតក្នុងក្រសួងវប្បធម៌សំបូរដោយមន្ត្រី ល្អៗ តែមន្ត្រី បំបង់បាយដែលអនុញ្ញាតឲ្យថតរឿងនេះធ្វើឲ្យខូចឈ្មោះមន្ត្រី ល្អៗផ្សេងទៀតជាច្រើន មន្ត្រីបែបនេះពិតជាមិនសមបន្តតួនាទីទេ ។
បើលោកមានសារជាតិជាមនុស្ស លោកគួរតែ ចេញមកបកស្រាយនឹងដោះស្រាយបញ្ហានេះ ឬសារជាតិជាមនុស្សរបស់លោកត្រូវឆ្កែសុីអស់ហើយ ? ការសម្រេចចិត្តរបស់អស់លោកតែមួយគ្រា តែវាបានធ្វើឲ្យខ្មែរទូទាំងប្រទេសខ្មាសគេ ទទួល ភាពអាម៉ាស់ ទទួលការប្រមាថមើលងាយ ។ តើអ្នកឯងមានមនសិការជាតិខ្លះដែរទេ ? បើអ្នកឯងមាន… ហេតុអ្វីពួកអ្នកឯងអាចធ្វើរឿងបែបនេះបាន ? មនុស្សដូចអ្នកឯងមិនសមកាន់ការងារជាមន្ត្រីវប្បធម៌សោះឡើយ ។
សង្គមកម្ពុជាមិនត្រូវការមនុស្សដែលចូលដៃចូលជើងជាមួយបរទេសបំផ្លាញកេរ្តិ៍ឈ្មោះជាតិ ដូចក្រុមពួកអ្នកឯងទាំងនេះទេ ។ ទាំងនេះកើតឡើងពីការសម្រេចចិត្តរបស់មន្ត្រីវប្បធម៌មួយចំនួនដែលមានជំងឺប្រចាំកាយ ហើយល្មមដល់ពេលដែលត្រូវវះកាត់ហើយ »។
ជាការតបតទៅMa Nout នាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈបានបញ្ជាក់ថា «ក្នុងនាមថ្នាក់ដឹកនាំ និងមន្ត្រីរាជការនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្ប: នាយកដ្ឋាននឹងចាត់វិធានការតាមផ្លូវច្បាប់ ចំពោះម្ចាស់ Account Facebook ឈ្មោះ Ma Nout ដែលបានបង្ហោះព័ត៌មាន ដោយប្រើពាក្យពេចន៍ប្រមាថមាក់ងាយ បរិហារកេរ្តិ៍ដោយគ្មានមូលដ្ឋានមកលើមន្ត្រីរាជការនាយកដ្ឋានសិល្បៈភាពយន្ត ជាហេតុធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់មន្ត្រីរដ្ឋបាលសាធារណៈ »។
កាលពីថ្ងៃទី១១ តុលា ២០១៩ ប្រធាននាយកដ្ឋានភាពយន្តលោកប៉ុក បូរក្ស បានចាត់ទុកការប្រើពាក្យរបស់ម្ចាស់ហ្វេសប៊ុក គឺជាការប្រមាថមើលងាយ ប្រមាថកាតទានគ្មានមូលដ្ឋានច្បាស់លាស់ ។ លោកបញ្ជាក់ថា «ការរិះគន់នេះគឺមិនមែនជាការរិះគន់ក្នុងន័យស្ថាបនានោះឡើយ ពោលគឺជាការបញ្ឆេះឲ្យមានការរើសអើង ស្អប់មកលើមន្ត្រីនៅក្នុងក្រសួងវប្បធម៌ ។
យើងស្វាគមន៍ចំពោះមហាជនដែលមានការឈឺឆ្អាលចំពោះវិស័យសិល្បៈវប្បធម៌ខ្មែរយើង ប៉ុន្តែប្រសិនបើយើងជាបុគ្គលដែលមានការអប់រំគួរប្រើពាក្យពេចន៍ ឬសួរនាំឲ្យបានច្បាស់មុនពេលចង់បញ្ចេញមតិ និងបង្ហោះសារតាមហ្វេសប៊ុក ចៀសវាងនាំឲ្យមានការយល់ច្រឡំ »។
លោកប៉ុក បូរក្ស បញ្ជាក់ថាជុំវិញការផលិតរឿងពិសស្នេហ៍របស់ស្ថានីយប៉ុស្តិ៍លេខ៥ នោះនៅមិនទាន់ហ៊ានសន្និដ្ឋានបាននៅឡើយទេថាគាត់បានចម្លង ឬទិញសិទ្ធិពីថៃមកផលិតនោះ។ ក្រសួងកំពុងធ្វើកិច្ចការក្នុងរឿងនេះ ប៉ុន្តែតាមច្បាប់កម្មសិទ្ធិបញ្ញារបស់ប្រទេសយើង ប្រសិនបើមានការប្តឹងពីម្ចាស់កម្មសិទ្ធិនោះក្រសួងមាននឹងវិធានការបិទ ឬហៅម្ចាសស្ថានីយមកដោះស្រាយតាមផ្លូវច្បាប់ ។
ក្នុងនាមក្រសួងវប្បធម៌គឺយើងគ្រប់គ្រងទៅលើស្ថាប័នដែលពាក់ព័ន្ធវិស័យភាពយន្ត ប៉ុន្តែភាពយន្តភាគចាក់ផ្សាយតាមទូរទស្សន៍គឺមិនបានសុំច្បាប់ពីក្រសួងនោះឡើយ ។ បញ្ហានេះគឺជាសិទ្ធិគ្រប់គ្រងនិងទទួលខុស ត្រូវរបស់ក្រសួងព័ត៌មាន ហើយកាលណាក្រសួងនេះមិនមានការខ្វល់ខ្វាយទើបបណ្តាលឲ្យមានរឿងនេះកើតឡើង។
តែយ៉ាងណាប្រសិនបើមានលិខិតផ្លូវការណាមួយ ក្រសួងវប្បធម៌នឹងធ្វើលិខិតសុំអន្តរាគមន៍ទៅក្រសួងព័ត៌មានដើម្បីបញ្ឈប់ការផ្សាយ ។ ទោះជាយ៉ាងណាក្រសួងវប្បធម៌ក៏មានបំណងចង់ឲ្យស្ថានីទូរទស្សន៍ប៉ុស្តិ៍៥ចេញមុខបកស្រាយជុំវិញរឿងនេះបន្ទាប់ពីមានការរិះគន់ពីមហាជន ៕
ចែករំលែកព័តមាននេះ