ខេត្តតាកែវ ៖ អាជីវកររកស៊ីដឹកទំនិញតាមរថយន្តឆ្លងកាត់ខេត្តតាកែវយកទៅលក់នៅរាជធានីភ្នំពេញបាននាំគ្នាប្រតិកម្មជាខ្លាំងដល់ប៉ូលិសសេដ្ឋកិច្ចក្រសួងដែលមកដាក់កុងត្រួលជជុះចាំស្ទាក់ចាប់រថយន្តដឹកទំនិញគ្រប់ប្រភេទឱ្យបង់លុយឱ្យពួកគេស្រេចតែអំពើចិត្ត ខណៈពេលរថយន្តដឹកទំនិញទាំងអស់បើកតាមបណ្តោយផ្លូវជាតិលេខ២ និងផ្លូវជាតិលេខ៣យកទៅលក់នៅភ្នំពេញ បើសិនមិនព្រមឈប់រថយន្តពួកគេនឹងមានរថយន្តដេញស្ទាក់ជាមិនខាន។
ក្រុមអាជីវករនៅខេត្តតាកែវបាននាំគ្នានិយាយថា ប៉ូលិសសេដ្ឋកិច្ចក្រសួងដែលបានដាក់ប៉ុស្តិ៍ជជុះចាំស្ទាក់រថយន្តដឹកទំនិញឱ្យបង់លុយនោះមានទីតាំងជាប់ផ្លូវជាតិលេខ២ពីខាងត្បូងស្ថិតនៅភូមិព្រហ៊ូត សង្កាត់រកាក្រៅ ក្រុងដូនកែវ ហើយក្រុមនេះទើបតែថ្នាក់លើដាក់មក ដោយដកក្រុមចាស់ចេញ ហើយប៉ូលិសសេដ្ឋកិច្ចក្រសួងនេះកាលក្រុមចាស់ដាក់ប៉ុស្តិ៍ឱ្យលុយប៉ុន្មានក៏យកដែរ និងមិនដែលស្ទាក់រថយន្តដឹកទំនិញបែបអនាធិបតេយ្យដូចក្រុមថ្មីនេះទេ។
ក្រុមអាជីវករបានបញ្ជាក់ថា កន្លងមករាជរដ្ឋាភិបាលបានកំណត់ឱ្យអ្នករកស៊ីត្រូវបង់ពន្ធជូនរដ្ឋឱ្យបាន១០០% ពួកគាត់ដែលជាអ្នករកស៊ីបានបង់ពន្ធជូនរដ្ឋទៅតាមច្បាប់កំណត់ជានិច្ច ហេតុម្តេចបានជាប៉ូលិសសេដ្ឋកិច្ចក្រសួងបង្ខំពួកគេឱ្យបង់លុយទៀត ។ បើសិនជាថ្នាក់លើនៅតែមិនជួយអន្តរាគមន៍ដល់ពួកគាត់ទេ ពួកគាត់នឹងលើកគ្នាទៅសាលាខេត្តដើម្បីឱ្យលោកអភិបាលខេត្តជួយដោះស្រាយ ៕
ចែករំលែកព័តមាននេះ