ខេត្តពោធិ៍សាត់ ៖ សេចក្តីរាយការណ៍បឋមបានឲ្យដឹងថា ជាការយកចិត្តទុកដាក់ជាប្រចាំ សំដៅពង្រឹងសុវត្ថិភាព គុណភាពម្ហូប និងចំណីអាហារដែលកំពុងចរាចរណ៍លើទីផ្សារជូនបងប្អូនប្រជាពលរដ្ឋ កាលពីថ្ងៃទី០៨ ខែតុលានេះ មន្ត្រីសាខាកាំកុងត្រូលខេត្តពោធិ៍សាត់ សហការជាមួយមន្ទីរពាណិជ្ជកម្មខេត្ត រួមជាមួយអាជ្ញាធរមូលដ្ឋានបានចុះត្រួតពិនិត្យគុណភាពទំនិញនៅផ្សារមេទឹក និងតូបលក់ដូរមួយចំនួននៅខាងមុខសាលាបឋមសិក្សាកោះខ្សាច់ ស្ថិតក្នុងឃុំមេទឹក ស្រុកបាកាន ដើម្បីស្វែងរកទំនិញខូចគុណភាព និងចំណីអាហារដែលផ្ទុកដោយសារធាតុគីមីធ្វើឲ្យប៉ះពាល់ដល់សុខភាពអ្នកទទួលទាន ។
ក្នុងការចុះពិនិត្យគុណភាពទំនិញនេះ មន្ត្រីជំនាញបានធ្វើការពិនិត្យទៅលើគុណភាពអាហារកំប៉ុង ភេសជ្ជៈដប ចំណីអាហារដែលវេចខ្ចប់ដោយក្រដាស និងថង់ប្លាស្ទិក និងផលិតផលផ្សេងៗទៀត ដែលមានសភាពខូចគុណភាព កំពិត ហួសកាលបរិច្ឆេទ និងគ្រឿងឧបភោគបរិភោគដែលដាក់តាំងលក់នៅក្នុងផ្សារ និងតាមលំនៅដ្ឋានក្នុងគោលបំណងធានាបាននូវសុវត្ថិភាព ចំណីអាហារសម្រាប់អ្នកទទួលទាន ។ ជាមួយគ្នានេះ មន្ត្រីជំនាញបានចែកស្ទីកឃ័រ ផ្សព្វផ្សាយពីសុវត្ថិភាពចំណីអាហារជូនដល់ប្រជាពលរដ្ឋ និងអាជីករ ដើម្បីបានយល់ដឹងបង្ការទប់ស្កាត់ទាំងអស់គ្នាផងដែរ ។
ប្រធានសាខាកាំកុងត្រូលខេត្តពោធិ៍សាត់ លោក តូច ចៅកុយ បានក្រើនរំលឹកដល់អាជីវករទាំងអស់ត្រូវលក់តែផលិតផលដែលមានសុវត្ថិភាព មានកាលបរិច្ឆេទត្រឹមត្រូវ ចៀសវាងប្រពលរដ្ឋទិញយកទៅទទួលទាននាំឲ្យប៉ះពាល់ដល់សុខភាពកើតជំងឺផ្សេងៗត្រូវចំណាយថវិកាមួយផ្នែកធំ ដើម្បីព្យាបាលព្រោះតែចំណីអាហារដែលគ្មានសុវត្ថិភាពនេះ ។ លោកបានណែនាំដល់អាជីវករកុំលក់ទំនិញវេចខ្ចប់ដែលគ្មានស្លាកសញ្ញាទទួលខុសត្រូវច្បាស់លាស់ ឈប់លក់នំកម្ទេចមី ចាហួយដូង នាំចូលពីប្រទេសវៀតណាម ត្រីចង្កាក់ និងសាច់ងៀតសំប៉ែតៗ ដែលច្រកថង់ប្លាស្ទិក ព្រោះអាហារទាំងអស់នេះ វាបណ្ដាលឲ្យក្អក រលាកបំពង់ក គ្រុនពោះវៀន និងក្ដៅខ្លួន ពិសេសក្មេងៗដែលចូលចិត្តទទួលទាន ។
ត្រូវរៀបចំទុកដាក់មុខទំនិញឱ្យបានត្រឹមត្រូវទៅតាមប្រភេទដោយបែងចែកប្រភេទចំណីអាហារ និងប្រភេទគីមីដូចជា សាប៊ូឱ្យនៅដាច់ឆ្ងាយពីគ្នាព្រមទាំងបានបង្រៀនដល់អ្នកលក់ និងអ្នកទិញអោយចេះមើលទំនិញហួសសុភលភាព និងអនុវត្តទៅតាមច្បាប់ស្តីពីការគ្រប់គ្រងគុណភាព សុវត្ថិភាព លើផលិតផលទំនិញ ជៀសវាងបង្កផលប៉ះពាល់ដល់សុខភាពប្រជាពលរដ្ឋ និងអាចប្រឈមចំពោះមុខច្បាប់ថែមទៀត ។
ក្នុងការចុះប្រតិបត្តិការនេះមន្ត្រីជំនាញបានរកឃើញទំនិញខូចគុណភាពចំនួន០៥មុខ មានកាកសំណល់កម្ទេចមី ទឹកក្រូចចំរុះ ទឹកស៊ីរ៉ូ ប្រេងប័រ និងស្ករគ្រាប់ចំរុះ សរុប១៩៩គក្រ ហើយបានដកហូតយកទៅដុតកម្ទេចចោលនៅសាលាឃុំមេទឹក ដោយមានការចូលរួមពីលោកមេឃុំ នគរបាលប៉ុស្តិ៍រដ្ឋបាល និងប្រជាពលរដ្ឋផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ