ខេត្តប៉ៃលិន ៖ អ្នករស់នៅក្នុងភូមិផ្សារព្រំខាងជើង បាននាំគ្នាហួសចិត្តនឹកអាណិតអាសូរអ្នកមីងជាស្ត្រីមេម៉ាយក្រខ្សត់ម្នាក់ ស្ទើរខ្លោចផ្សារក្នុងចិត្ត ខណ:ដីជាង១ហិកតា ដែលគាត់ខំកាប់ឆ្ការព្រៃជាមួយប្តីរហូតស្រឡះល្អ បែរជាត្រូវក្រុមឈ្មួញយកទៅលក់ឱ្យអ្នកមានលុយ(ឧកញ៉ា) បានប្រាក់រាប់សែនដុល្លារ តែមិនចេញថ្លៃសំណងឱ្យគាត់ សូម្បីតែ១០០រៀលនោះឡើយ ។ ពេលនេះ គាត់មានតែឈរយំលើកដៃសំពះស្រែកប្រាប់លោកា និងសុំអង្វរឱ្យអាជ្ញាធរគ្រប់លំដាប់ថ្នាក់ ជួយអន្តរាគមន៍ ។
ហេតុការណ៍ស្ត្រីមេម៉ាយក្រខ្សត់ម្នាក់ឈរយំនៅក្បែរដី ដែលខ្លួនធ្លាប់អាស្រ័យផលបានកើតឡើង កាលពីរសៀលថ្ងៃទី៨ តុលា ឆ្នាំ២០១៩ ស្ថិតនៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ ស្ត្រីមេម៉ាយដែលត្រូវក្រុមឈ្មួញយកដីលក់ឱ្យក្រុមហ៊ុនឯកជន(ឧកញ៉ា)នោះ មានឈ្មោះ ឡុង នឿន អាយុ៥៥ឆ្នាំ ជាស្រី្តមេម៉ាយក្រខ្សត់ មាននិងជំងឺប្រចាំកាយ ហើយត្រូវប្តីស្លាប់ចោលកាលពី៨ឆ្នាំមុន មានកូន៦នាក់ ប្រុស៣ ស្រី៣ រស់ក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
បច្ចុប្បន្ន គាត់ទុកផ្ទះខ្ទមដ៏តូចកំសត់មួយខ្នងនេះឱ្យកូនៗស្នាក់នៅ រីឯខ្លួនគាត់សុខចិត្តទៅសុំវត្តព្រះសង្ឃ
(វត្តសារវណ្ណ)ក្បែរនោះ ដើម្បីស្នាក់អាស្រ័យបណ្តោះអាសន្ន ទម្រាំតែអស់ជីវិតនៅលើផែនដី ។ បើតាមប្រភពព័ត៌មានពីស្ត្រីមេម៉ាយទុរគតខាងលើ បាននិយាយទាំងអួលដើមក និងហូរទឹកភ្នែកហូររហាម រៀបរាប់ឱ្យភ្នាក់ងារយើងដឹងថា មានឈ្មួញកណ្តាលរកស៊ីដី១ក្រុម ដែលគាត់ស្គាល់បុរសម្នាក់ ឈ្មោះ ឈីវ វ៉ាន់សែត រស់ក្នុងខេត្តប៉ៃលិន បានឃុបឃិតគ្នាជាមួយអ្នកមានអំណាចក្នុងខេត្តប៉ៃលិន មួយចំនួន លួចធ្វើប្លង់ដីរបស់គាត់ រួចយកទៅលក់ឱ្យក្រុមហ៊ុនឯកជន (ឧកញ៉ាម្នាក់ឈ្មោះ ហេង ហាក់ម៉ុង) រស់នៅរាជធានីភ្នំពេញ ក្នុងតម្លៃរាប់សែនដុល្លារឯណោះ ដោយបន្ទាប់ពីទ ទួលបានប្រាក់មក ពួកគេមិនបានចេញថ្លៃសំណងឱ្យគាត់ សូម្បីតែមួយរយរៀលនោះឡើយ។
អ្នកមីងបន្ថែមថា តាំងពីគេយកដីគាត់លក់ គាត់មិនបានបន្តទៅដាំដុះនៅកន្លែងនោះទៀតទេ ព្រោះត្រូវបានគេហាមឃាត់ ហើយគាត់និងកូនៗ មានតែដើរធ្វើកម្មករ ស៊ីឈ្នួលគេ ដើម្បីរកប្រាក់ចិញ្ចឹមជីវិត ។ អ្នកមីងក៏សុំអំពាវនាវដល់ថ្នាក់ដឹកនាំខេត្ត គឺឯកឧត្តម ផាន់ ចាន់ធុល អភិបាលខេត្តប៉ៃលិន លោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន ព្រមទាំងសម្តេចតេជោ ហ៊ុន សែន ឱ្យជួយអន្តរាគមន៍ និងដោះស្រាយជូនគាត់ផង ព្រោះដីខាងលើនេះ គាត់បានកាន់កាប់ជិតជាង១០ឆ្នាំមកហើយ។
ម្យ៉ាងវិញទៀត ជីវភាពក្រីក្រលំបាកតោកយ៉ាកវេទនា ដោយមានជំងឺប្រចាំកាយមិនអាចធ្វើការធ្ងន់អ្វីបាននោះទេ ។ ពាក់ព័ន្ធទៅនឹងបញ្ហានេះ លោក ប៉ាង គឹមអេង ជំទប់ទី១ ឃុំស្ទឹងកាច់ លោក ព្រាប សារុន មេភូមិផ្សារព្រំជើង បានឱ្យដឹងដូចៗ គ្នាថា ដីខាងលើ ពិតជាដីរបស់ស្ត្រី ឈ្មោះ ឡុង នឿន កាន់កាប់ ពីមុនប្រាកដមែន ព្រោះគាត់បានឆ្ការព្រៃ និងអាស្រ័យផល តាំងពីយូរណាស់មកហើយ តែដល់ពេលដីឡើងថ្លៃ មានការលក់ដូរ ប្រហែលជាគាត់ធ្វើការដោះដូរជាមួយឈ្មួញយ៉ាងណានោះ ខាងលោកក៏មិនសូវបានដឹងច្បាស់នោះដែរ។
ព័ត៌មានបន្ថែមនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ