ប្រទេសតួកគី-ស៊ីរី ៖ ក្រសួងការពារប្រទេសតួកគីគូសបញ្ជាក់ថា កងទ័ពតួកគីកាលពីថ្ងៃទី៩តុលាចាប់ផ្ដើមលើកចូលភាគឦសានស៊ីរី ក្នុងក្របខណ្ឌនៃការវាយលុកមួយរបស់ក្រុងអង់ការ៉ា ប្រឆាំងពួកជីវពលឃើតជួយទ្រទ្រង់ដោយពួកលោកខាងលិច។
អ្នកនាំពាក្យម្នាក់របស់ក្រុមឧទ្ទាមស៊ីរីជាសម្ព័ន្ធមិត្តតួកគី ចូលរួមក្នុងការវាយលុកនោះអះអាងថា ការវាយលុកនេះបានចាប់ផ្ដើមដោយសំដៅទីក្រុងTAL ABYAD ត្រួតត្រាដោយក្រុមជីវពលនៃកងឯកភាពការពារប្រជាជនYPGនាភាគឦសានស៊ីរី។ ចំណែកកងកម្លាំងប្រជាធិបតេយ្យស៊ីរីFDSក្របដណ្ដប់ដោយពួកYPGអះអាងថា បានរុញច្រានការវាយលុកនោះរបស់តួកគី។
ដោយប្រឈមមុខចំពោះការគាបសង្កត់របស់អន្តរជាតិ តួកគីកាលពីថ្ងៃទី៩តុលាបានបើកការវាយលុក ប្រឆាំងដែនដីស្ថិតនៅខាងកើតទន្លេEUPHRATE កាន់កាប់ដោយពួកYPGជាក្រុមជីវពលឃើតមួយជួយទ្រទ្រង់ដោយបណ្ដាប្រទេសលោកខាងលិចប្រឆាំងពួកជីហាដនៃក្រុមរដ្ឋអ៊ិស្លាម តែជាសត្រូវរបស់តួកគីដែលចាត់ទុកជាក្រុមភេរវកម្មដោយសារទំនាក់ទំនងរបស់់គេ ជាមួយគណបក្សពលករឃើតឌីស្ថានPKK។
យោងតាមក្រុងអង់ការ៉ាថា ទិសដៅនៃការវាយលុកថ្មីនេះ ជាការវាយលុកលើកទី៣ក្នុងរយៈពេល៣ឆ្នាំ គឺបង្កើតតំបន់សន្តិសុខមួយនៅចន្លោះទីតាំងរបស់ពួកYPGនិងព្រំដែនតួកគី ហើយបញ្ជូនជនភៀសខ្លួនស៊ីរីប្រមាណជាជិត៤លាននាក់នៅតួកគីមកកាន់ទីនោះ។
ការវាយលុកនោះតួកគីអាចប្រឈមមុខយ៉ាងឆាប់រហ័សនឹងបណ្ដាវិធានការដាក់ទណ្ឌកម្មរបស់អាមេរិក ដែលអាចឲ្យប្រទេសទាំង២ជាសម្ព័ន្ធមិត្ត ធ្លាក់ក្នុងវិបត្តិពុំធ្លាប់មានពីមុនមួយ។ ដោយសន្យាថានឹងធ្វើឲ្យតួកគីរងការបង់ខាតធ្ងន់ធ្ងរបំផុតចំពោះការវាយលុកនេះ ព្រឹទ្ធសមាជិកគណបក្សសាធារណរដ្ឋ លោកLINDSEY GRAHAMនិងព្រឹទ្ធសមាជិកគណបក្សប្រជាធិបតេយ្យលោកCHRIS VAN HOLLENលាតត្រដាងនាថ្ងៃទី៩តុលា សំណើមួយដែលសំដៅដាក់ទណ្ឌកម្មយ៉ាងម៉ឺងម៉ាត់បំផុតប្រឆាំងក្រុងអង់ការ៉ា ប្រសិនបើកងទ័ពតួកគីនិងពួកសម្ព័ន្ធមិត្តមិនដកចេញពីស៊ីរីទេនោះ។
លោកLINDSEY GRAHAMដែលតែងគាំទ្រលោកត្រាំតែចោទប្រកាន់ថាបោះបង់ចោលពួកឃើតដ៏គួរឲ្យអាម៉ាស់ បានសន្យាពីការដាក់ទណ្ឌកម្មធ្ងន់ធ្ងរបំផុតនិងយ៉ាងបំផ្លិចបំផ្លាញដល់សេដ្ឋកិច្ចតួកគីនិងកងទ័័ពប្រទេសនេះ។ កាលពីថ្ងៃទិ៧តុលាលោកត្រាំធ្លាប់បានព្រមានថា ខ្ញុំនឹងកម្ទេចសេដ្ឋកិច្ចតួកគីទាំងស្រុង បើការវាយលុកនោះមានភាពជ្រុលហួសព្រំដែន៕ (កែសម្រួលដោយ ៖ បុប្ផា)
ចែករំលែកព័តមាននេះ