រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់បានធ្វើសកម្មភាពឆក់កាបូបពីស្ត្រីជាជនជាតិចិនម្នាក់មិនបានសម្រេច ក៏ត្រូវស្ត្រីរងគ្រោះទាញកន្ត្រាក់មកវិញ បណ្តាលឱ្យដួលទាំងជនរងគ្រោះ និងម៉ូតូជនសង្ស័យ ហើយត្រូវប្រជាពលរដ្ឋដែលឃើញហេតុការណ៍នាំគ្នាស្រែកថា «ចោរៗ» និងព្យាយាមដេញចាប់ធ្វើឲ្យជនសង្ស័យភ័យស្លន់ស្លោ…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់បានធ្វើសកម្មភាពឆក់កាបូបពីស្ត្រីជាជនជាតិចិនម្នាក់មិនបានសម្រេច ក៏ត្រូវស្ត្រីរងគ្រោះទាញកន្ត្រាក់មកវិញ បណ្តាលឱ្យដួលទាំងជនរងគ្រោះ និងម៉ូតូជនសង្ស័យ ហើយត្រូវប្រជាពលរដ្ឋដែលឃើញហេតុការណ៍នាំគ្នាស្រែកថា «ចោរៗ» និងព្យាយាមដេញចាប់ធ្វើឲ្យជនសង្ស័យភ័យស្លន់ស្លោ រត់គេចខ្លួនបាត់ស្រមោលបង្កឱ្យមានការភ្ញាក់ផ្អើលកាលពីម៉ោង9និង45នាទីយប់ ថ្ងៃទី9 ខែតុលា ឆ្នាំ២០១៩ នៅតាមបណ្តោយផ្លូវ143 កែងនឹងផ្លូវ276 នៅមុខផ្ទះលេខ138Eo ស្ថិតក្នុងសង្កាត់បឹងកេងកងទី2 ខណ្ឌបឹងកេងកង ។
សេចក្តីរាយការណ៍បន្តថា ជនសង្ស័យដែលធ្វើសកម្មភាពឆក់កាបូបពីស្ត្រីរងគ្រោះនោះមិនត្រូវបានស្គាល់អត្តសញ្ញាណនោះទេ ដោយបានជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ2019 ពណ៌ខ្មៅ ពាក់ស្លាកលេខភ្នំពេញ1GP:0546. ជិះតែម្នាក់ឯង។
ប្រភពពីប្រជាពលរដ្ឋដែលឃើញហេតុការណ៍បានប្រាប់ឱ្យដឹងថា មុនកើតហេតុ គេឃើញជនរងគ្រោះជាជនជាតិចិន2នាក់ប្តីប្រពន្ធ បាននាំគ្នាបណ្តើរកង់មួយគ្រឿងដើរតាមផ្លូវ143 ពីត្បូងទៅជើង ដោយស្ត្រីរងគ្រោះស្ពាយកាបូបនៅស្មាខាងស្តាំ ខណៈពេលដើរមកដល់កន្លែងកើតហេតុ ស្រាប់តែលេចមុខជនសង្ស័យខាងលើជិះម៉ូតូមួយគ្រឿងមកពីក្រោយយឺតៗអែបខាងស្តាំ និងបានបន្ថែមល្បឿនម៉ូតូយ៉ាងលឿន រួចភ្លាមៗនោះឆក់យកកាបូបយួរដៃពីនារីរងគ្រោះមិនបានសម្រច ក៏ត្រូវនារីរងគ្រោះទាញកន្ត្រាក់មកវិញ បណ្តាលឱ្យជនរងគ្រោះដួលបោកនឹងថ្នល់រងរបួសរលាត់ដៃជើង និងបែកក្បាល ចំណែកម៉ូតូជនសង្ស័យក៏បានដួលភ្លាមៗផងដែរ ។
ប្រភពដដែលបន្តថា បន្ទាប់ពីបង្កហេតុរួច ជនសង្ស័យបានព្យាយាមលើកម៉ូតូបម្រុងជិះរត់គេច ក៏ត្រូវប្រជាពលរដ្ឋឃើញហេតុការណ៍បាននាំគ្នាស្រែកថា «ចោរៗ» និងដេញចាប់ជនសង្ស័យ ធ្វើឲ្យជនសង្ស័យភ័យស្លន់ស្លោផ្តួលម៉ូតូរត់គេចខ្លួនយ៉ាងលឿន យកតែព្រះអាយុតែម្តង និងមានបក្សពួកជនសង្ស័យផ្សេងទៀតជិះម៉ូតូមិនចាំម៉ាកមួយគ្រឿងទៀត មករំដោះយកជនសង្ស័យគេចខ្លួនបាត់ស្រមោលទៅ។
ក្រោយពេលកើតហេតុស្ត្រីរងគ្រោះមិនបានទៅដាក់ពាក្យបណ្ដឹងទេ ក៏បានឡើងរថយន្តសង្គ្រោះឯកជនទៅព្យាបាលរបួសនៅមន្ទីរពេទ្យបាត់ទៅ ចំណែកម៉ូតូជនសង្ស័យត្រូវបានសមត្ថកិច្ចមូលដ្ឋានយកទៅរក្សាទុកនៅប៉ុស្តិ៍នគរបាលរដ្ឋបាលបឹងកេងទី2 ដើម្បីកំណត់មុខសញ្ញាស្រាវជ្រាវរកជនសង្ស័យ និងបក្សពួកមកផ្តន្ទាទោសតាមផ្លូវច្បាប់ ។ (កែសម្រួលដោយ ៖ បុប្ផា)
ចែករំលែកព័តមាននេះ