ខេត្តបាត់ដំបង ៖ សេចក្តីរាយការណ៍បឋមឱ្យដឹងថា បុរសម្នាក់ទំនងធុញថប់នឹងជំងឺប្រចាំកាយ ទើបសម្រេចចិត្តធ្វើអត្តឃាតខ្លួនឯង នៅក្នុងមន្ទីរពេទ្យបង្អែកស្រុកមោងប្ញស្សី ដែលគេសង្ស័យអាចកើតឡើងនៅវេលារំលងអធ្រាត្រ ឈានចូលថ្ងៃទី០៤ តុលា ដែលនាំឲ្យមានការភ្ញាក់ផ្អើលពេញមន្ទីរពេទ្យ ។
សមត្ថកិច្ចបានរាយការណ៍ថា ជនរងគ្រោះឈ្មោះ រ៉េត វិន ភេទប្រុស អាយុ៥៧ឆ្នាំ រស់នៅភូមិទួលបល័ង្គ ឃុំគាស់ក្រឡ ស្រុកគាស់ក្រឡ ។ បុរសរូបនេះប្រើវិធីចង.កជាប់នឹងដើមល្ហុង នៅក្នុងបរិវេណនៃមន្ទីរពេទ្យបង្អែកស្រុកមោងប្ញស្សី ខណៈដែលជនរងគ្រោះកំពុងសម្រាកព្យាបាលជំងឺនៅទីនោះ ហើយព្រឹកឡើងទើបត្រូវគេប្រទះឃើញសាកសពជនរងគ្រោះ។
បើតាមការអះអាងពីបុគ្គលិកពេទ្យ និងអ្នកជំងឺនៅក្នុងមន្ទីរពេទ្យនេះគេសង្ស័យថា អ្នកជំងឺរូបនេះបាន
ធ្វើអត្តឃាតនៅវេលារំលងអធ្រាត្រ ព្រោះនៅមុនពាក់កណ្ដាលអធ្រាត្រ គេឃើញគាត់នៅអង្គុយត្រម៉ង់ត្រម៉ោចនៅក្នុងបរិវេណនៃមន្ទីរពេទ្យនៅឡើយ។
ប្រភពពីគ្រូពេទ្យឲ្យដឹងទៀតថា ជនរងគ្រោះមានជំងឺរបេងដ៏រាំរ៉ៃ ហើយបានមកសម្រាកព្យាបាលនៅទីនោះ ដោយមិនសូវមានសាច់ញាតិមកជួប ឬជួយថែទាំទេ។ គេតែងឃើញអ្នកជំងឺរូបនេះ បង្ហាញនូវភាពកណ្ដោចកណ្ដែង អស់សង្ឃឹមស្ថិតក្នុងភាពស្ងៀមស្ងាត់ រហូតដល់ថ្ងៃកើតហេតុតែម្ដង។
មន្ត្រីជំនាញបានប្រាប់ថា នៅព្រឹកថ្ងៃកើតហេតុ ក្រុមគ្រូពេទ្យនិងសមត្ថកិច្ចជំនាញបានធ្វើការត្រូតពិនិត្យសាកសពនៅកន្លែងកើតហេតុ។ បើតាមរបាយការណ៍បានឲ្យដឹងថា បើតាមការពិនិត្យ និងយោងការបំភ្លឺនានាពីសាក្សីផង ជនរងគ្រោះពិតជាបានធ្វើអត្តឃាតខ្លួនឯងដោយវិធីចងកប្រាកដមែន។
ចែករំលែកព័តមាននេះ