រាជធានីភ្នំពេញ ៖ ទីបំផុតសាលាដំបូងរាជធានីភ្នំពេញចេញដីកាបង្គាប់ឲ្យចាប់ខ្លួនជនត្រូវចោទអតីតប្រធានគណបក្សសង្គ្រោះជាតិ និងអតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ចំនួន៩រូបទៀត ដែលជាប់ពាក់ព័ន្ធនឹងផែនការធ្វើរដ្ឋប្រហារ ។
យោងតាមសេចក្ដីប្រកាសព័ត៌មានរបស់សាលដំបូង អ្នកនាំសាលារាជធានីភ្នំពេញ ចេញផ្សាយ កាលពីថ្ងៃទី៣ ខែតុលា ឆ្នាំ២០១៩ បានឲ្យដឹងថា អ្នកទាំង៩នាក់ដែលនឹងត្រូវចាប់ខ្លួនរួមមាន១.ទណ្ឌិត សម រង្ស៊ី ២. លោក អេង ឆៃអ៊ាង ៣.លោកស្រី មូរ សុខហួរ ៤.លោក អ៊ូ ច័ន្ទឫទ្ធិ ៥.លោក ហូរ វ៉ាន់ ៦.លោកឡុង រឺ៧.លោក ម៉ែន សុថាវរិន្ទ្រ ៨.លោកស្រី ជូឡុង សូមួរ៉ា និង៩.លោកនុត រំដួល ។
បើតាមការបញ្ជាក់របស់អ្នកនាំពាក្យសាលាដំបូងរាជធានីភ្នំពេញនៅក្នុងសេចក្តីប្រកាសព័ត៌មានថា ជនត្រូវចោទទាំង៩ រូបនេះត្រូវបានអយ្យការអមសាលាដំបូងរាជធានីភ្នំពេញចោទ ប្រកាន់នៅក្នុងសំណុំរឿងព្រហ្មទណ្ឌលេខ ៦៥៣៦ ចុះថ្ងៃទី១៩ ខែកញ្ញា ឆ្នាំ២០១៩ ពីបទ «ឧបឃាត»ដោយយោងតាមមាត្រា២៧ និងមាត្រា៤៥១ នៃក្រមព្រហ្មទណ្ឌនៃព្រះរាជាណាចក្រកម្ពុជា ពាក់ព័ន្ធនឹងអង្គហេតុនៃ «ការប៉ុនប៉ងធ្វើរដ្ឋប្រហារ» ផ្តួលរំលំរាជរដ្ឋាភិបាលកម្ពុជា ស្របច្បាប់ ក្រោមឧបាយកលជា«ផែនការនៃការវិលត្រឡប់មកកម្ពុជាវិញរបស់ឧក្រិដ្ឋជន សម រង្ស៊ី» ដោយមានការអំពាវនាវ និងប្រើថវិកាប៉ុនប៉ងបង្កើតកងកម្លាំងឧទ្ទាមប្រដាប់អាវុធខុសច្បាប់ ដើម្បីចូលរួមអនុវត្តផែនការនេះ ។
អ្នកនាំពាក្យសាលាដំបូងរាជធានីភ្នំពេញបញ្ជាក់បន្ថែមថា ដីកាបង្គាប់ឲ្យចាប់ខ្លួនខាងលើត្រូវបានបញ្ជូនទៅស្ថាប័នមានសមត្ថកិច្ច ដើម្បីអនុវត្តស្របតាមច្បាប់ និងនីតិវិធីជាធរមាន រួចហើយ ។ ចំណែកលោក គឹម សន្តិភាព អ្នកនាំពាក្យក្រសួងយុត្តិធម៌បានអះអាងឲ្យដឹងថា បើសិនចង់រួមពីទោសនោះអ្នកចូលរួមផ្សំគំនិតត្រូវប្រញាប់សារភាព ។ លោកសរសេរលើបណ្តាញសង្គមយ៉ាងដូច្នេះថា ៖«ដើម្បីទទួលបានការលើកលែងឲ្យរួចផុតពីទោសក្នុងបទ «រួមគំនិតក្បត់» បុគ្គលនោះត្រូវចូលសារភាពមុនការចោទប្រកាន់! ។ ដូច្នេះ សូមបងប្អូនដែលកំពុងបន្តអនុវត្តផែនការប៉ុងប៉ងរដ្ឋប្រហារនេះ ដកខ្លួនមកសារភាពដល់ សមត្ថកិច្ចជាបន្ទាន់នោះបងប្អូននឹងរួចផុតពីទោសនេះ ដោយកុំរង់ចាំដល់មានការចោទ ប្រកាន់» ។
សូមជម្រាបថា តាមផែនការទណ្ឌិត សម រង្ស៊ី និងបក្ខពួកនឹងវិលស្រុកវិញនៅថ្ងៃទី៩ ខែវិច្ឆិកា ឆ្នាំ២០១៩ ចំថ្ងៃបុណ្យឯករាជ្យជាតិតែម្តង ។ ប៉ុន្តែនៅថ្ងៃនេះផងដែរ សម្តេចតេជោ ហ៊ុន សែននាយករដ្ឋមន្ត្រីបានប្រកាស និងអំពាវនាវដល់ប្រជាពលរដ្ឋធ្វើពិធីអកអំបុកនៅទូទាំងប្រទេស ដើម្បីអបអរសារទពិធីបុណ្យអ៊ុំទូកផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ