ខេត្តកំពង់ចាម ៖ បើតាមសេចក្តីរាយការណ៍បឋមបានឱ្យដឹងថា នៅថ្ងៃទី៣០ កញ្ញា និងថ្ងៃទី១ តុលា ឆ្នាំ២០១៩នេះ ទឹកទន្លេមេគង្គបានស្រក និងបានធ្វើឲ្យសសរព្រះវិហារដែលមានអាយុកាលជាង១០០ឆ្នាំ…
ខេត្តកំពង់ចាម ៖ បើតាមសេចក្តីរាយការណ៍បឋមបានឱ្យដឹងថា នៅថ្ងៃទី៣០ កញ្ញា និងថ្ងៃទី១ តុលា ឆ្នាំ២០១៩នេះ ទឹកទន្លេមេគង្គបានស្រក និងបានធ្វើឲ្យសសរព្រះវិហារដែលមានអាយុកាលជាង១០០ឆ្នាំ ក្នុងបរិវេណវត្តធម្មយុត្តិចុងកោះ ស្ថិតនៅភូមិទី៩ ឃុំកោះសូទិន ស្រុកកោះសូទិន នោះ បានបាក់បេតុងចំនួន២ដើមចូលទៅក្នុងទឹកទន្លេមេគង្គ ហើយធ្វើឲ្យពុទ្ធបរិស័ទចំណុះជើងវត្ត និងអាជ្ញាធរមូលដ្ឋាននាំគ្នាសោកស្តាយគ្រប់ៗគ្នា និងព្រួយបារម្ភខ្លាចបាក់ព្រះវិហារចូលទឹកទាំងមូលទៀតផងដែរ។
បើតាមព្រះតេជគុណ ជឹម ចន្ទថុនា ចៅអធិការវត្តមានសង្ឃដីកាឲ្យដឹងថា ក្នុងរដូវប្រាំងកន្លងទៅ ច្រាំងទន្លេនៅក្រោយព្រះវិហារបុរណមានចំងាយប្រមាណជាង១០ម៉ែត្រ ដោយមានក្តីព្រួយបារម្ភ និងពុទ្ធបរិស័ទខ្លាចបាក់ចូលទៅក្នុងទឹកទន្លេមេគង្គ ក៏បានស្នើសុំមកមន្ទីរវប្បធម៌ និងវិចិត្រសិល្បៈខេត្ត ដើម្បីលើកសំណើរសុំរុះរើជៀសវាងកុំឲ្យបាក់បែកខូចខាត ។ ស្របពេលដែលទឹកទន្លេឡើងមកក្នុងរដូវវស្សាឆ្នាំ២០១៩ ប្រហែល១ខែមុននេះ បានបាក់យកចេតីយរបស់លោកយាយ ម៉ម នូ នៅជិតព្រះវិហារដែល កសាងក្នុងអំឡុងឆ្នាំ១៨៨៥ ត្រូវបានបាក់ធ្លាក់ចូលទៅក្នុងទឹកទន្លេបាត់ ។
ព្រះចៅអធិការវត្តចុងកោះមានសង្ឃកាបន្តថា លុះព្រឹកថ្ងែទី៣០ កញ្ញា ទឹកទន្លេបានស្រក ស្រាប់តែបាក់ច្រាំងដោយនាំយកសសរបេតុងព្រះវិហារចំនួន២ដើមចូលក្នុងទន្លេទៀត ដូច្នេះព្រះអង្គ ក៏ដូចជាពុទ្ធិបរិស័ទចំណុះជើងវត្តមានការសោកស្តាយជាខ្លាំងដែលព្រះវិហារមានអាយុកាលជាង១០០ឆ្នាំត្រូវបានខាងមន្ទីរវប្បធម៌ខេត្តចាត់ទុកជាសម្បត្តិវប្បធម៌ជាតិ ត្រូវបានបាក់ចូលទន្លេ ក្រោយពីសំណើរសុំរុះរើហាក់ដូចជាមានភាពយឺតយាវ។ ហើយការរុះរើដំបូលក្បឿងបានមួយចំនួន ក៏ត្រូវមន្ទីរវប្បធម៌ខេត្តមកឃាត់មិនឲ្យរុះរើបន្តទៀត រហូតដល់ទឹកឡើងមកធ្វើឲ្យបាក់សសរអស់២ដើម ទើបឲ្យរុះរើ ប៉ុន្តែមិនមានអ្នកណាហ៊ានឡើងរុះក្បឿងទេ ព្រោះខ្លាចបាក់បង្កគ្រោះថ្នាក់ដល់មនុស្ស ។
ព្រះចៅអធិការមានសង្ឃដីកាបន្តទៀតថា ទាំងព្រះសង្ឃ និងពុទ្ធបរិស័ទចំណុះជើងវត្ត បាននាំគ្នារុះមេននៅជាប់នឹងព្រះវិហារ និងរបស់របរមួយចំនួន ក្នុងនោះមានទ្វារ និងបង្អួចឈើ រហូតមកដល់ព្រឹកថ្ងៃទី១ តុលា ក៏បន្តសកម្មភាព ដោយប្រជាជនមានភាពផុលផុសក្នុងការជួយជាកម្លាំងដល់វត្ត ។
ព្រះចៅអធិការវត្តក៏សូមអំពាវនាវដល់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សូមមេត្តាជួយសង្គ្រោះវត្តចុងកោះនេះផង ដោយធ្វើយ៉ាងណាកុំឲ្យបាក់ច្រាំងបន្តទៀត ព្រោះថាវត្តនេះបានចាប់ផ្តើមកសាងរហូតមកដល់សព្វថ្ងៃមានអាយុកាលជិត២០០ឆ្នាំហើយ ។
បើតាមអ្នកស្រីមេឃុំកោះសូទិន បានឲ្យដឹងដែរថា ក្នុងនាមអាជ្ញាធរមូលដ្ឋានពិតជាមានការសោកស្តាយចំពោះព្រះវិហារមានអាយុកាលចូលដល់ជាង១០០ឆ្នាំ ត្រូវបានច្រាំងបាក់យកសសរអស់ចំនួន០២ដើមចូលទៅក្នុងទន្លេមេគង្គ ក្រោយពីទទួលបានដំណឹងនេះ ទើបនៅព្រឹកថ្ងែទី១ តុលា ក៏បានជិះទូកឆ្លងមកមើល។ ហើយប្រសិនបើទឹកស្រកក្នុងពេលខាងមុខ មិនបាក់បន្តទៀតនោះ និងចាត់ចែងឲ្យគណៈកម្មការវត្តវត្តរុះរើយកសសរឈើចំនួន១០ដើមសុទ្ធល្អៗ ហើយក្លឹមជាប្រភេទឈើកកោះ ដើម្បីទុកធ្វើអ្វីបន្តទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ