ប្រទេសចិន ៖ ចិនកាលពីថ្ងៃទី១តុលាបានធ្វើការបង្ហាញកម្លាំង ជាមួយក្បួនព្យុហយាត្រាយោធាដ៏ធំ នាឱកាសខួបលើកទី៧០នៃការបង្កើតសាធារណរដ្ឋប្រជាមានិតចិន ខណៈនៅហុងកុងពួកបាតុករស្និទ្ធលទ្ធិប្រជាធិបតេយ្យ បានបន្តផ្កើនដោយសន្យាធ្វើឲ្យបុណ្យជាតិនោះមានភាពស្រអាប់។
កងទាហានដល់ទៅ១៥.០០០នាក់ រថក្រោះជាច្រើនរយគ្រឿង បណ្ដាមីស៊ីលនិងយន្តហោះប្រយុទ្ធបានចូលរួមក្នុងព្យុហយាត្រាយោធានេះ នៅមុខបណ្ដាមេដឹកនាំជាន់ខ្ពស់របស់ប្រទេស នាទីលានធៀនអានមេនក្រុងប៉េកាំង ជាកន្លែងដែលលោកមៅ៉សេទុង ប្រកាសពីការបង្កើតសាធារណរដ្ឋប្រជាមានិតចិន នាថ្ងៃទី១តុលាឆ្នាំ១៩៤៩។
ក្នុងពិធីដ៏មហោឡារិកនោះ ប្រធានាធិបតីចិនលោកស៊ីជីនពីងថ្លែងថា គ្មានអ្វីអាចធ្វើឲ្យប៉ះពាល់ដល់គ្រឹះរបស់មហាប្រជាជាតិយើងបានឡើយ។ គ្មានអ្វីអាចរារាំងប្រជាជាតិយើងនិងប្រជាជនយើងក្នុងការដើរទៅមុខបានទេ។
យោងតាមកាសែតជាតិនិយមចិនGLOBAL TIMESថា នោះជាព្យុហយាត្រាយោធាដ៏ធំបំផុតដែលចិនពុំធ្លាប់ធ្វើ។ បណ្ដាឧទ្ធម្ភាគចក្របានបើកព្យុហយាត្រាតាមអាកាសជាមួយការហោះបង្កើតជាលេខ៧០ក្នុងលំហអាកាសនៃរដ្ឋធានីប៉េកាំង។ ក្បួនព្យុហយាត្រានោះបង្ហាញបណ្ដាបច្ចេកវីទ្យាយោធាទំនើបៗ ពិសេសមីស៊ីលនុយក្លេអ៊ែររំលងទ្វីបធុនDF-41 ដែលបង្ហាញជាលើកដំបូង។ មីស៊ីលនោះអាចបាញ់បានចម្ងាយដល់ទៅ១៤.០០០គីឡូម៉ែត្រ គឺអាចបាញ់ដល់ដែនដីអាមេរិក។
ព្រឹត្តិការណ៍នេះសំដៅបណ្ដុះគំនិតជាតិ និយម ដោយបង្ហាញពីការរីកចម្រើនយ៉ាងខ្លាំងរបស់សាធារណរដ្ឋប្រជាមានិតចិន រយៈពេលប៉ុន្មានទសវត្សចុងក្រោយនេះ និងលក្ខន្តិកៈរបស់ចិនដែលក្លាយជាមហាអំណាចសេដ្ឋកិច្ចធំទី២លើពិភពលោក។ ប៉ុន្ទែនៅចម្ងាយ២០០០គីឡូម៉ែត្រខាងត្បូងក្រុងប៉េកាំង ពួកបាតុករហុងកុងដែលផ្គើនដល់របបកុំមុយនីស្ត ចាប់តាំងពីជិត៤ខែមកហើយ បានអំពាវនាវឲ្យលើកគ្នាធ្វើទិវាចងកំហឹងមួយនាថ្ងៃទី១តុលានោះដែរ ក្នុងដែនដីអតីតអាណានិគមអង់គ្លេសនោះ។ មេប៉ូលិសក្រុងហុងកុងមួយរូបនិយាយថា ពួកបះបោររា៉ឌីកាល់កំពុងតែបង្កើនកម្រិតនៃអំពើហិង្សារបស់ពួកគេ។ អំពើហិង្សារបស់ពួកគេនិងគម្រោងនានារបស់ពួកគេបង្ហាញពីសកម្មភាពបែបភេរវកម្ម។
ចាប់តាំងពីព្រឹកថ្ងៃទី១តុលា អាជ្ញាធរក្រុងហុងកុងបានបង្កើនការត្រួតពិនិត្យអត្តសញ្ញាណ និងឆែកឆេរតាមបណ្ដាដងវិថី និងតាមមធ្យោបាយដឹកជញ្ជូនរួម ខណៈស្ថានីយមេត្រូប្រមាណជា១២កន្លែងត្រូវបិទ៕ (កែសម្រួលដោយ ៖ បុប្ផា)
ចែករំលែកព័តមាននេះ