រាជធានីភ្នំពេញ ៖ បន្ទាប់ពីការប្រកួតដណ្តើមខ្សែក្រវាត់ដ៏កក្រើករវាងកីឡាករវង្ស ណយ និងកីឡាករកែវ រំចង់ កាលពីថ្ងៃម្សិលមិញបានធ្វើឱ្យមានភាពរញ្ជួយ និងជក់ចិត្តពីសំណាក់អ្នកទស្សនា និងពីសំណាក់អ្នកស្នេហាវិស័យកីឡាប្រដាល់ភាគច្រើននោះ នៅសង្វៀនស្ទឹងមានជ័យនាល្ងាចថ្ងៃសៅរ៍ ទី៥ មេសា ស្អែកនេះ ក៏មានគូល្អប៉ះគ្នាដែលរំពឹងថា នឹងជក់ចិត្តដូចគ្នាផងដែរ ។
រាជធានីភ្នំពេញ ៖ បន្ទាប់ពីការប្រកួតដណ្តើមខ្សែក្រវាត់ដ៏កក្រើករវាងកីឡាករវង្ស ណយ និងកីឡាករកែវ រំចង់ កាលពីថ្ងៃម្សិលមិញបានធ្វើឱ្យមានភាពរញ្ជួយ និងជក់ចិត្តពីសំណាក់អ្នកទស្សនា និងពីសំណាក់អ្នកស្នេហាវិស័យកីឡាប្រដាល់ភាគច្រើននោះ នៅសង្វៀនស្ទឹងមានជ័យនាល្ងាចថ្ងៃសៅរ៍ ទី៥ មេសា ស្អែកនេះ ក៏មានគូល្អប៉ះគ្នាដែលរំពឹងថា នឹងជក់ចិត្តដូចគ្នាផងដែរ ។
កីឡាករដែលមហាជនកំពុងផ្តោតការចាប់អារម្មណ៍នោះ គឺកីឡាករចៅ ផលឌឿ មកពីក្លិបសំរោងកោងកីឡាខេត្តបាត់ដំបង ប៉ះជាមួយនឹងកីឡាករនន់ ជំនិត មកពីក្លិប CMAC ។ រវាងពួកគេទាំង២ធ្លាប់ប៉ះគ្នាច្រើនលើករួចមកហើយ ដោយជួបគ្នាលើកដំបូងកីឡាករនន់ ជំនិត យកឈ្នះប្រកបដោយមោទនភាព និងលើកចុងក្រោយកីឡាករចៅ ផលឌឿ បានយកឈ្នះដោយពិន្ទុប្រកបដោយមោទនភាពវិញ ។ ជំនួបជាថ្មីនាល្ងាចថ្ងៃសៅរ៍នេះមិនត្រូវបានគេរំពឹងថា អាចរញ្ជួយសង្វៀនដូចគ្នានឹងការប្រកួតរវាងកីឡាករវង្ស ណយ និងកីឡាករកែវ រំចង់ ដែលបានប៉ះគ្នាកាលពីថ្ងៃម្សិលមិញក្នុងជំនួបលើកទី៣ ហើយជាការប្រកួតដែលមានលក្ខណៈ វង្ស ណយ ឡើងដណ្តើមខ្សែក្រវាត់ពីកីឡាករកែវ រំចង់ នោះទេ បុ៉ន្តែអ្វីដែលគេមានជំនឿចិត្ត គឺកីឡាករចៅ ផលឌឿ និងនន់ ជំនិត ក៏ពិតជាធ្វើឱ្យជក់ចិត្តដូចគ្នាបន្ទាប់ពីពួកគេប៉ះគ្នាបុ៉ន្មានលើកកន្លងមក គឺតែងធ្វើឱ្យជក់ចិត្តដិតអារម្មណ៍ ។
ក្រុមអ្នកស្នេហាកីឡាប្រដាល់កំពុងផ្តល់ការវិភាគថា ចៅ ផលឌឿ អាចមានប្រៀបសម្រាប់ល្ងាចនេះ បុ៉ន្តែម្នាក់ៗហាក់មិនហ៊ានផ្តល់ការជឿជាក់នោះឡើយ ក្នុងពេលភាគីម្ខាងៗដែលជាអ្នកប្រកួតលើរេញសុទ្ធតែមានចំណុចខ្លាំង និងចំណុចខ្សោយប្រហាក់ប្រហែលគ្នាបែបនេះ ។ អ្នកខ្លះយល់ថា ចៅ ផលឌឿ នឹងឈ្នះដោយព្យាយាមសំអាងថា គេមានស្នៀតប្រកួតរស់រវើក និងមិនទុកដៃឱ្យនៅទំនេរនាំឱ្យខាតពេលវេលាទេ ។ គេមានកម្លាំងស៊ុហ្វរឹងមាំ និងមានមាឌល្អ ដែលពិបាកឱ្យគូប្រកួតយកប្រៀប បុ៉ន្តែគេមានចំណុចខ្សោយមួយគឺវាយចេញច្រើន ហើយមិនសូវត្រូវចំគោលដៅដែលនាំឱ្យខ្ជះខ្ជាយកម្លាំងចោលផង និងងាយមានចន្លោះប្រហោងផង ។ ងាកមកកាន់កីឡាករនន់ ជំនិត វិញ ដ្បិតថាគេមិនខ្លាំង ហើយមិនបានឈានដល់ចំណុចកំពូលដូចអំឡុងពេលមុន បុ៉ន្តែកម្លាំងនិងស្នៀតរបស់គេ ក៏អាចកំដរសិស្សប្អូន ចៅ ផលឌឿ ដល់បញ្ចប់៥ទឹកដោយគ្មានការពិបាកនោះដែរ ។ ម្យ៉ាងកីឡាករចៅ ផលឌឿ កាលឈ្នះគេក្នុងជំនួបចុងក្រោយ ក៏ឈ្នះទាំងវេទនាបំផុត ។
កីឡាកររូបនេះវាយចេញមួយៗ បុ៉ន្តែកម្រនឹងខុសគោលដៅណាស់ ។ ក្នុងនោះសូម្បីតែកម្លាំងស៊ុហ្វ ក៏គេមិនចាញ់ដៃគូជាក្មេងៗនោះដូចគ្នា ។ ទោះបីយ៉ាងណា នន់ ជំនិត ហាក់មានចំណុចខ្សោយតូចមួយ គឺវាយមិនសូវរហ័ស ដែលអាចចាញ់ប្រៀបកីឡាករ ចៅ ផលឌឿ បើគេប្តូរស្នៀតវាយឆ្វេងផងវាយស្តាំផងព្រមគ្នា ។ ចាំមើល តើរវាងកីឡាករចៅ ផលឌឿ និងនន់ ជំនិត មួយណាទទួលបានជោគជ័យនៅវគ្គចុងក្រោយ ? នៅលើសង្វៀននាថ្ងៃសៅរ៍ស្អែកនេះដែរ កីឡាករជួប ជាង មកពីក្លិបនិរោធមានជ័យ នឹងប៉ះជាមួយកីឡាកររិទ្ធិ កៅ មកពីមជ្ឈមណ្ឌលកីឡាខេមរភូមិន្ទ ក្នុងវគ្គផ្តាច់ព្រ័ត្រដណ្តើមខ្សែក្រវាត់ BTV ប្រចាំឆ្នាំ២០១៤ និងកីឡាករម៉ន បារាំង មកពីក្លិបការិយាល័យទី៦ ទ័ពជើងគោក ជួបជាមួយកីឡាករនួន តុលា មកពីក្លិបរស្មីកុមារកំព្រា ។
ដោយឡែក នៅថ្ងៃអាទិត្យខានស្អែក កីឡាករសារឹម ង៉ា មកពីសមាគមកីឡាប្រដាល់ក្រសួងការពារជាតិ នឹងប៉ះជាមួយកីឡាករទេស សំខាន់ មកពីក្លិបកងពលតូចលេខ៧០ និងកីឡាករថន វាសនា មកពីក្លិបនាគមានជ័យ ប៉ះជាមួយកីឡាករឡង់ ភីរម្យ មកពីក្លិបរាហ៊ូកីឡានៅសង្វៀនបឹងស្នោរួមគ្នា និងកីឡាករឌុន រដ្ឋា មកពីក្លិបអេភូថងកីឡា នឹងប៉ះជាមួយកីឡាករមាស ភីរម្យ មកពីក្លិបកងទ័ពជើងទឹកនៅសង្វៀនស្ទឹងមានជ័យ ៕
ចែករំលែកព័តមាននេះ