ខេត្ដសៀមរាប ៖ ជាញយដងមកហើយ សម្ដេចអគ្គមហាសេនាបតីតេជោ ហ៊ុន សែន បានអំពាវនាវ និងព្រមានខ្លាំងៗចំពោះបញ្ជាការកងកម្លាំងប្រដាប់អាវុធទាំងអស់ដែលឈរជើងការពារបូរណភាពដែនដីក្នុងទឹកដីខេត្ដជាប់ព្រំប្រទល់ខ្មែរ-ថៃ គឺខេត្ដឧត្ដរមានជ័យ និងខេត្ដព្រះវិហារ ត្រូវជំរុញឱ្យមានការការពារព្រៃឈើឱ្យមានប្រសិទ្ធភាព និងហាមដាច់ខាតការរកស៊ីដឹកឈើគ្រប់ប្រភេទ ។
ខេត្ដសៀមរាប ៖ ជាញយដងមកហើយ សម្ដេចអគ្គមហាសេនាបតីតេជោ ហ៊ុន សែន បានអំពាវនាវ និងព្រមានខ្លាំងៗចំពោះបញ្ជាការកងកម្លាំងប្រដាប់អាវុធទាំងអស់ដែលឈរជើងការពារបូរណភាពដែនដីក្នុងទឹកដីខេត្ដជាប់ព្រំប្រទល់ខ្មែរ-ថៃ គឺខេត្ដឧត្ដរមានជ័យ និងខេត្ដព្រះវិហារ ត្រូវជំរុញឱ្យមានការការពារព្រៃឈើឱ្យមានប្រសិទ្ធភាព និងហាមដាច់ខាតការរកស៊ីដឹកឈើគ្រប់ប្រភេទ ។
ប៉ុន្ដែរហូតមកដល់ពេលនេះ គេនៅតែសង្កេតឃើញបុគ្គលមានឯកសណ្ឋានជាយោធាមួយចំនួនតូច នៅតែបន្ដប្រព្រឹត្ដកំហុសផ្គើនទៅនឹងការព្រមាននោះដដែល ។ ទាក់ទិននឹងបទល្មើសដឹកជញ្ជូនឈើគ្រញូងដែលប្រព្រឹត្ដឡើងដោយមន្ដ្រីកងយោធពលខេមរភូមិន្ទនោះដែរ នាយកតំបន់ការពារទេសភាពឧទ្យានអង្គរនៃក្រសួងបរិស្ថាន លោក ហុង តារាវុធ បានថ្លែងកាលពីរសៀលថ្ងៃទី១ មេសា ថា ជន៤នាក់ក្នុងចំណោម៥នាក់ ដែលមានឯកសណ្ឋានយោធាត្រូវបានចាប់ខ្លួនជាមួយនឹងកំណាត់ឈើគ្រញូងប្រមាណ៣០០ដុំ បង្កប់នៅបាតរថយន្ដទំនើបមួយគ្រឿងដែលមានបំពាក់ស៊ីរ៉ែន និងស្លាកលេខកងយោធពលខេមរភូមិន្ទ។
លោកបានបញ្ជាក់ថា ប្រតិបត្ដិការចាប់ខ្លួនមន្ដ្រីយោធាដែលមានជាប់ពាក់ព័ន្ធនឹងបទល្មើសឈើគ្រញូងទាំង៤នាក់នេះ ធ្វើឡើងកាលពីវេលាម៉ោង២រំលងអធ្រាត្រឈានចូលថ្ងៃទី១ មេសា នៅចំណុចផ្លូវកូម៉ៃ (ផ្លូវទៅអង្គរ) ក្នុងភូមិសាស្រ្ដភូមិទក្សិណត្បូង សង្កាត់គោកចក ក្រុងសៀមរាប ក្រោមការដឹកនាំរបស់លោក សំរិទ្ធ សុខុន ព្រះរាជអាជ្ញារងអមសាលាដំបូងខេត្ដ និងមានកម្លាំងប្រតិបត្ដិការដោយមន្ដ្រីបរិស្ថានតំបន់ការពារទេសភាពឧទ្យានអង្គរ រួមទាំងកម្លាំងនគរបាលក្រុងសៀមរាបផងដែរ ។
លោក ហុង តារាវុធ បានបន្ថែមថា រថយន្ដដែលបានបង្ក្រាបនោះម៉ាកទុនដ្រា ស៊េរីឆ្នាំ២០០៧ ពណ៌ទឹកប៊ិក តែបិទស្កុតពណ៌ស ពាក់ស្លាកលេខ ខេមរភូមិន្ទ០២-២៦៩៨ ។ នៅយប់នោះ រថយន្ដបានបើកក្នុងល្បឿនមធ្យមប្រមាណ៨០គីឡូម៉ែត្រក្នុងមួយម៉ោង ហើយបានធ្វើឱ្យសង្ស័យនៅពេលមានស្នូរអ្វីម៉្យាងចេញពីរថយន្ដនោះ ។ លោកបានបន្ថែមថា នៅពេលប្រតិបត្ដិការតាមប្រមាញ់ គេឃើញមនុស្សចំនួន៥នាក់ ស្ថិតក្នុងសម្លៀកបំពាក់ជាយោធានៅក្នុងរថយន្ត ។ ប៉ុន្ដែពេលដែលសមត្ថកិច្ចស្ទាក់រថយន្ដភ្លាម ជនម្នាក់ក្នុងចំណោមនោះដែលគេជឿថា ជាអ្នកពាក់ព័ន្ធជ្រៅនៅក្នុងបទល្មើសនោះបានចុះរត់បាត់ ។
នៅក្នុងការត្រួតពិនិត្យរួមគ្នាមួយនៅព្រឹកថ្ងៃទី១ មេសា នៅអធិការដ្ឋាននគរបាលក្រុងសៀមរាប គេបានរកឃើញប្រអប់ចំនួន២មានរាងដូចមឈូសបានផ្សារភ្ជាប់នៅផ្នែកខាងក្រោមបាតរថយន្ដ ដោយមានកំណាត់ឈើគ្រញូងពេញទាំង២ គឺសរុបទៅមានចំនួន១០៥ដុំ មានទម្ងន់៣៦៦គីឡូក្រាម ។
ស្រដៀងគ្នាដែរ លោក សឿន សូ ជំនួយការតំបន់ការពារទេសភាពអង្គរ បានថ្លែងឱ្យដឹងនៅរសៀលថ្ងៃដដែលនេះថា ជនដែលត្រូវបានចាប់ខ្លួននោះមាន ១-ឈ្មោះ តិល វិសុទ្ធ អាយុ៣៥ឆ្នាំ រស់នៅភូមិស្វាយ សង្កាត់សាលាកំរើក ក្រុងសៀមរាប ២-ឈ្មោះ សៅ វា៉ន់ អាយុ២៩ឆ្នាំ រស់នៅភូមិព្រះ ឃុំតាំងក្រាំង ស្រុកបាធាយ ខេត្តកំពង់ចាម ៣-ឈ្មោះ នី វណ្ណថន អាយុ២៨ឆ្នាំ រស់នៅភូមិពួក ឃុំពួក ស្រុកពួក ខេត្តសៀមរាប។ ៤-ឈ្មោះ ហេង ធី អាយុ២៧ឆ្នាំ នៅភូមិពោចិនតុង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ ជាអ្នកបើកបររថយន្តដែលប្រព្រឹត្តបទល្មើស ។
លោក សឿន សូ បានបញ្ជាក់ថា នៅពេលចាប់ខ្លួនជនទាំងបួននាក់ ស្ថិតនៅក្នុងឯកសណ្ឋានយោធា និងបានអះអាងថា ពួកគាត់បម្រើការនៅអង្គភាពកងពលលេខ៧០ ប៉ុន្តែមិនដឹងថានៅក្នុងអង្គភាពនេះមែនឬក៏អត់នោះទេ ។ បន្ទាប់ពីធ្វើកំណត់ហេតុសាកសួររួច ជនទាំងបួននាក់នោះត្រូវបានចងក្រងសំណុំរឿងបញ្ជូនទៅតុលាការពីបទ «ប្រមូល និងដឹកជញ្ជូនឈើប្រណីតគ្មានច្បាប់អនុញ្ញាត» ដែលជាបទល្មើសព្រហ្មទណ្ឌមានចែងនៅក្នុងមាត្រា៦២ ចំណុចទី២នៃច្បាប់ស្តីពីតំបន់ការពារធម្មជាតិ ។ លោក ហុង តារាវុធ បានអះអាងថា នេះជាការបង្ក្រាបសកម្មភាពដឹកឈើគ្រញូងលើសច្បាប់ដែលមានទាំងចាប់បានអ្នកពាក់ព័ន្ធចំនួនច្រើននាក់ ជាលើកដំបូងហើយសម្រាប់ឆ្នាំ២០១៤នេះ ។
ថ្វីបើយា៉ងនេះក្តី ពេញមួយរសៀលថ្ងៃទី១ មេសា គេមិនអាចស្វែងរកជួបមេបញ្ជាការកងពលលេខ៧០ ឬមន្ត្រីណាម្នាក់ ដែលអាចផ្តល់ព័ត៌មានបានទេ ដោយគ្មានអ្នកស្គាល់លេខទូរស័ព្ទ ។ ដូច្នេះហើយគេមិនអាចសុំការបំភ្លឺជុំវិញការចាប់ខ្លួនជនទាំងបួនខាងលើនោះបានឡើយ ហើយក៏រឹតតែមិនដឹងថារថយន្តទុនដ្រា ដែលមានបំពាក់សីុរ៉ែននោះជារបស់អង្គភាពឬគ្រាន់តែជាល្បិចកែខៃរបស់ជនកំហូចឬយា៉ងណានៅឡើយទេ ។ គួរបញ្ជាក់ថា ជុំវិញករណីមន្ត្រីយោធាយកតួនាទីរបស់ខ្លួនទៅប្រព្រឹត្តបទល្មើសឈើគ្រញូង និងឈើព្រៃគ្រប់ប្រភេទនាពេលកន្លងមក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាធ្លាប់បានធ្វើការព្រមានធ្ងន់ៗជាសាធារណៈថា សុំឱ្យមន្ត្រីទាំងអស់ដកខ្លួនចេញជាបន្ទាន់ កុំពាក់ព័ន្ធនឹងបទល្មើសព្រៃឈើគ្រប់ប្រភេទ បើពុំដូច្នេះទេ ត្រូវប្រឈមមុខនឹងផ្លូវច្បាប់ ឬអាចដកហូតចេញពីមុខតំណែង ដោយសង្កត់ធ្ងន់ថា «កុំថាឡើយពាក់ត្រឹមផ្កាយ សូម្បីតែលោកខែក៏ត្រូវដកចេញដែរ» ៕
ចែករំលែកព័តមាននេះ